Զեղծարարները ներկայանում են որպես ղեկավար և գումար պահանջում. ինչպե՞ս չդառնալ նման խաբեության զոհ

Ամեն օր չարագործներն ավելի ու ավելի շատ նոր միջոցներ են գտնում դյուրահավատ մարդկանցից փող գողանալու համար: Վերջերս, ինչպես զգուշացնում է Ռուսաստանի «Սբերբանկ»-ի թիմը, նրանք սկսել են ավելի ու ավելի հաճախ ձևանալ, թե ընկերությունների մենեջերներ կամ գլխավոր հաշվապահներ են և գումար կորզել աշխատակիցներից։

Ինչպե՞ս են դա նրանք անում

Չարագործները կեղծ օգտահաշիվներ են ստեղծում մեսենջերներում՝ ներկայանալով որպես ընկերության հիմնադիր կամ տնօրեն՝ դյուրահավատ աշխատակիցներին խաբելու համար: Դրա համար նրանք օգտագործում են լուսանկարներ հասանելի աղբյուրներից, ինչպիսիք են ընկերության կայքէջը կամ ղեկավարների իրական պրոֆիլները, և ստեղծում են համոզիչ արտաքինով կեղծ օգտահաշիվներ:

Տուժողի հետ կապ հաստատելուց հետո չարագործները զրույցը սկսում են ընդհանուր արտահայտություններով, վստահություն ձեռք բերում, ապա հրահանգներ են տալիս շտապ գումար փոխանցել նշված հաշվին կամ վարկ վերցնել։ Եթե ​​պոտենցիալ զոհը փորձում է զանգել իր ղեկավարին, խաբեբաները չեն պատասխանում զանգին՝ ուղարկելով հաղորդագրություն, որ «Զբաղված եմ» կամ «Չեմ կարող խոսել»:

Դեպքերից մեկի ժամանակ խաբեբաները ներկայացել են որպես ընկերության երկու հիմնադիրներ և սկսել են ճնշում գործադրել գործադիր տնօրենի վրա: Հետաքրքիր է, որ չարագործները լավ պատրաստված են եղել այդ «առաքելությանը». նրանց հաջողվել է ուսումնասիրել այդ մարդկանց հաղորդակցման ոճը, ինչպես նաև կազմակերպության կառուցվածքն ու ներքին գործընթացները։

Ինչպե՞ս խուսափել խաբեբաների զոհը դառնալուց

«Սբերբանկ»-ը զգուշացնում է, որ եթե կասկածելի հաղորդագրություններ եք ստանում գումար փոխանցելու հրահանգներով, չպետք է շտապել հետևելու այդ հրահանգներին: Եթե ​​«մենեջերը» շտապեցնում է, ճնշում է գործադրում, բայց զանգերին չի պատասխանում, պետք է առանձնապես զգույշ լինել։

Մասնագետները խորհուրդ են տալիս չտրվել ճնշումներին և չշտապել գումար փոխանցել, հատկապես, եթե նույնիսկ ամենաչնչին կասկածներ կան դրա իսկության վերաբերյալ, նույնիսկ եթե ձեզնից գումար պահանջողը կարծես ծանոթ մարդ է թվում։

Մասնագետները հիշեցնում են, որ խարդախության այս սխեման առաջին անգամ արձանագրվել է այս տարվա հունվարին։ Սակայն վերջերս այն կրկին սկսել է մեծ տարածում գտնել չարագործների շրջանում։