նախընտրելի դարձնել
Հայաստանը չպետք է ձգտի միկրոչիպերի արտադրության սեփական գործարան կառուցել միայն այն բանի համար, որ համարվի համաշխարհային կիսահաղորդչային արդյունաբերության մասնակից։ Շատ ավելի կարևոր է որոշել այն ուղղությունները, որոնցում երկիրն արդեն ունի կարողություններ և կարող է դառնալ միջազգային ընկերությունների անփոխարինելի գործընկեր։ Այս մասին հայտարարել է SEMI Europe-ի նախագահ Լեյթ Ալթիմիմը՝ ելույթ ունենալով Երևանում անցկացվող Silicon Mountains Summit & Expo 2026 միջոցառմանը։
Նրա գնահատմամբ՝ Հայաստանի համար նման ուղղություններ կարող են դառնալ միկրոսխեմաների և էլեկտրոնային համակարգերի նախագծումը, էլեկտրոնիկայի նախագծման ավտոմատացման ծրագրային ապահովման (EDA) մշակումը, ինչպես նաև ֆիզիկական, եզրային և ներկառուցված արհեստական բանականությանն առնչվող տեխնոլոգիաները։ «Կիսահաղորդչային թիթեղների արտադրության գործարանի առկայությունն ինքնին չի երաշխավորում, որ երկիրը ներդրումների և դրանցից ստացվող արդյունքի տեսանկյունից կդառնա ռազմավարական առումով ավելի նշանակալի դերակատար», - ընդգծել է Ալթիմիմը։
Նա ուշադրություն է հրավիրել այն հանգամանքի վրա, որ աշխարհում արդեն նախատեսվում է մոտ 100 նոր կիսահաղորդչային գործարանի կառուցում։ Ուստի ևս մեկ արտադրական հարթակի ստեղծումը պարտադիր չէ, որ երկրին մրցակցային առավելություն ապահովի։ Նրա կարծիքով՝ Հայաստանը պետք է հենվի միկրոէլեկտրոնիկայի ոլորտում իր ունեցած ժառանգության վրա և զարգացնի այն կարողությունները, որոնք պահանջված են կիսահաղորդիչների ստեղծման համաշխարհային շղթայում։ «Դուք չեք կարող ամեն ինչ անել։ Պետք է հենվել ուժեղ կողմերի վրա՝ ելնելով նրանից, թե որտեղ են հնարավորություններ ի հայտ գալիս, և հասկանալ, թե ինչպես կարող է Հայաստանն ապագայում դառնալ ավելի անփոխարինելի», - նշել է SEMI Europe-ի ղեկավարը։ Հայաստանը պետք է դառնա համաշխարհային շղթայի տեսանելի մասնակից
Ալթիմիմը Հայաստանի համար ձևակերպել է երեք առաջնահերթություն՝ ինժեներական կադրերի զարգացում, հետազոտությունների կապակցում համաշխարհային արդյունաբերության հետ և ռազմավարական գործընկերների ներգրավում։
Նա նաև կոչ է արել հայկական ընկերություններին, համալսարաններին և կրթական հաստատություններին ավելի ակտիվ մասնակցել SEMI Europe-ի միջազգային նախաձեռնություններին՝ տեղական տեխնոլոգիական էկոհամակարգը երկրի սահմաններից դուրս ավելի տեսանելի դարձնելու համար։
«Հայաստանը կարող է միկրոէլեկտրոնիկայի ոլորտում իր ժառանգությունը վերածել մրցակցային առավելության՝ դառնալով համաշխարհային կիսահաղորդչային արդյունաբերության անփոխարինելի և հուսալի գործընկեր», - հայտարարել է SEMI Europe-ի ղեկավարը։
Այսպիսով, նրա առաջարկած ռազմավարությունը ենթադրում է ոչ թե կիսահաղորդչային արտադրության բոլոր հատվածներն ընդգրկելու փորձ, այլ կոնկրետ ուղղությունների ընտրություն, որոնցում Հայաստանը կարող է միջազգային շուկային առաջարկել պահանջված կարողություններ։
