Նախընտրելի
Տասնյակ գիտափորձեր, որոնց կարելի է հետևել և մասնակցել, սպիրտի մեջ պահպանված միջատներ, որոնք կրում են տարբեր հիվանդություններ, 3D ակնոցներ, որոնց միջոցով կարելի է ուսումնասիրել շրջակա աստղերը... այս ամենը ներկայացված է Հայաստանի գիտական կազմակերպությունների տաղավարներում, որոնք մասնակցում են այսօր մեկնարկած «Գիտության շաբաթ» փառատոնին (ֆոտոռեպորտաժ)։
Վերոնշյալ 3D ակնոցները ներկայացված են Բյուրականի աստղադիտարանի տաղավարում, և դրանք իսկապես մեծ ուշադրության են արժանանում ինչպես երիտասարդների, այնպես էլ միջոցառման չափահաս այցելուների շրջանում։ Այս ակնոցները դնելով՝ կարող եք զգալ, որ գտնվում եք այլ մոլորակի մակերեսին, որտեղից կարող եք նայել շրջապատող աստղերին և նույնիսկ տեղեկություններ ստանալ նրանց մասին, որոնց ուղղված է ձեր հայացքը։
Հնագիտության և ազգագրության ինստիտուտն իր հերթին հնարավորություն է ընձեռել իրականացնել փոքրիկ պեղումներ և ավազի մեջ կերամիկայի կտորներ փնտրել։
Մատենադարանը ցուցադրում է հին հայկական ձեռագրերից ստացված եթերայուղեր և հիդրոզոլներ։ Գիտնականներն ուսումնասիրում են այս յուղերի հատկությունները և օգտագործում դրանք որոշ ձեռագրերի պահպանման և ախտահանման համար:
Շատ հետաքրքիր բաներ կարելի է գտնել «Գիտության շաբաթ»-ին մասնակցող մյուս բոլոր կազմակերպությունների տաղավարներում։
«Գիտուժ» նախաձեռնության անդամ, Robomart ընկերության համահիմնադիր Տիգրան Շահվերդյանը NEWS.am Tech-ի հետ զրույցում ասաց, որ «Գիտության շաբաթ»-ը գիտությունը հանրահռչակելու «Գիտուժ»-ի ամենահավակնոտ նախագծերից է։ Միջոցառումը հետապնդում է կարևոր նպատակ՝ ոչ միայն հետաքրքրել երիտասարդներին գիտությամբ և այս ոլորտում կարիերայի հեռանկարներով, այլև հանրությանը ցույց տալ, թե ինչու է գիտությունը ոչ միայն հետաքրքիր, այլև չափազանց կարևոր, այդ թվում՝ Հայաստանի զարգացման, բարեկեցության և անվտանգության համար։
«Գիտությունը և դրա հանրահռչակումը հենց այն գործիքն է, որով մենք պետք է ապահովենք մեր բարեկեցությունն ու անվտանգությունը»,- ասաց նա։
Հիշեցնենք, որ «Գիտության շաբաթ»-ը Հայաստանում տեղի է ունենում հոկտեմբերի 1-ից 6-ը։ Դրա շրջանակում Երևանում և հանրապետության բոլոր մարզերում անցկացվում են գիտությանը և տեխնոլոգիաներին նվիրված միջոցառումներ։
Միջոցառումը բաժանված է երեք թեմատիկ մասի.
Հոկտեմբերի 1-2. Գիտություն ամենուր
Գիտական փորձերի, գիտնականների հետ շփվելու, ցուցադրությունների և քննարկումների միջոցով դուք կիմանաք, թե ինչ խնդիրներ է լուծում գիտությունը՝ տիեզերական հետազոտությունից, մարդաբանությունից մինչև մոլեկուլային կենսաբանություն, թե ինչպես է զարգացել գիտական մտածողությունը՝ սկսած զուտ մտավոր վարժություններից և վերջացրած մինչև հսկայական արագացուցիչների ու տիեզերակայանների կառուցմամբ, ինչ է անում գիտությունը Հայաստանում և ինչպես են աշխարհն ու գիտությունը փոխազդում միմյանց հետ։
Հոկտեմբերի 3-4. Մասնագիտական կողմնորոշում․ ապագա գիտնականներ
Մասնագիտական կողմնորոշում։ Ինչո՞ւ դառնալ ֆիզիկոս, քիմիկոս, կենսաբան կամ մարդաբան: Ի՞նչն է հետաքրքիր նեյրոֆիզիոլոգի մասնագիտության մեջ: Ի՞նչ տպավորիչ երևույթներ են ուսումնասիրում տիեզերաբանները։ Ինչպե՞ս կարող է մաթեմատիկոսը ձեռք բերել արհեստական բանականության հմտություններ: Ինչո՞ւ է կարևոր հետազոտական բազան լավ մասնագետ դառնալու համար: Ո՞ր համալսարանում կամ ինստիտուտում պետք է սովորել: «Կարիերայի ուղղորդում» գիտական փառատոնի թեմատիկ բաժինը կդառնա հարթակ, որտեղ երեխաներն ու երիտասարդները, շփվելով գիտնականների և գիտությանը մոտ կանգնած մարդկանց հետ, կստանան այս և այլ հարցերի պատասխաններ։
Հոկտեմբերի 5-6. Գիտական ֆանտաստիկա. երևակայիր
Գիտաֆանտաստիկ գրականություն այն աղբյուրներից է, որը գիտնականներին ոգեշնչում է երևակայականը իրական դարձնելու համար: Հոկտեմբերի 5-6-ը «Գիտության շաբաթ» փառատոնը նվիրված է լինելու գիտաֆանտաստիկայի՝ գրականությունից մինչև կինո, կոմիքսներից մինչև գեղանկարչություն։ Երևանի Ազատության հրապարակը կդառնա ֆանտաստիկ մոլորակ. այստեղ դուք կտեսնեք ձեր սիրելի հերոսներին, կլսեք զարմանալի պատմություններ և հնարավորություն կունենաք մասնակցել տարբեր մրցույթների։
«Գիտության շաբաթ» առաջին փառատոնի ընթացքում ապակենտրոնացված միջոցառումներ կանցկացվեն նաև ողջ հանրապետության կրթական հաստատություններում՝ բուհերում, դպրոցներում և նույնիսկ մանկապարտեզներում:
Հիշեցնենք նաև, որ «Գիտության շաբաթ»-ը նախաձեռնել և իրականացնում է «Գիտուժ» նախաձեռնությունը՝ ՀՀ ԳԱԱ-ի հետ համատեղ և ՀՀ կրթության, գիտության, մշակույթի և սպորտի նախարարության և Երևանի քաղաքապետարանի աջակցությամբ։
