Աստղագետներն անսովոր կառուցվածքով արտասովոր ռադիոգալակտիկա են հայտնաբերել․ ինչո՞ւ է այն կարևոր

Գիտնականները հայտնաբերել են եզակի ռադիոգալակտիկա, որը կարող է փոխել այս օբյեկտների էվոլյուցիայի վերաբերյալ մարդկության պատկերացումները: Աստղագետների թիմը՝ Հնդկաստանի Միդնապուր քոլեջից Շոբհա Կումարի գլխավորությամբ, LOw-Frequency ARray (LOFAR) ռադիոաստղադիտակի կիրառմամբ հայտնաբերել է անսովոր հատկանիշներով նոր ռադիոգալակտիկա, որն ստացել է J0011+3217 անունը:

Ռադիոգալակտիկաները տիեզերքի ամենապայծառ օբյեկտներից են, որոնք իրենց միջուկներից արտանետում են հսկայական քանակությամբ ռադիոալիքներ: Այս միջուկները հաճախ պարունակում են գերզանգվածային սև խոռոչներ, որոնք սպառում են գազ և փոշի՝ ձևավորելով պլազմայի հզոր շիթեր լույսի արագությանը մոտ արագությամբ։

Իրենց կյանքի ցիկլի ակտիվ փուլում (մինչև 100 միլիոն տարի) ռադիոգալակտիկաները սովորաբար ունենում են սիմետրիկ կառուցվածք, ներառյալ միջուկը, նյութերի հոսքերը և շրջանները, որտեղ հոսքերը փոխազդում են միջգալակտիկական միջավայրի հետ: Այնուամենայնիվ, ժամանակի ընթացքում գալակտիկական միջուկի գործունեությունը կարող է դադարել, և գալակտիկան իր կյանքի վերջնական ցիկլում կարող է մտնել այսպես կոչված «մնացորդային փուլ»:

Սակայն J0011+3217-ը տարբերվում է դասական էվոլյուցիոն պատկերից։ Այն ունի առաջնային հսկա «բլթակներ», որոնք միմյանց հետ համահունչ չեն, և միակողմանի երկրորդական «բլթակ», ինչը չափազանց հազվադեպ է հանդիպում մարդկությանը հայտնի ռադիոգալակտիկաներում:

Բացի դրանից՝ աստղագետները հայտնաբերել են, որ J0011+3217-ի երկրորդական «բլթակն»  անսովոր մեծ է՝ 2,77 միլիոն լուսատարի, որը կազմում է առաջնային «բլթակի» մոտ 85%-ը։ Դիտարկումները նաև ցույց են տալիս նյութի հոսքի մի փոքր թեքություն, որն ավելի բնորոշ է հզոր, կոր ռադիոաղբյուրների լայնանկյուն պոչերին, որոնք սովորաբար կապված են կլաստերների կամ գալակտիկաների խմբերի գերիշխող գալակտիկաների հետ: Այս կապակցությամբ գիտնականները ենթադրում են, որ նոր հայտնաբերված գալակտիկան կապ ունի Աբել 7 գալակտիկաների կուտակման հետ:

J0011+3217-ի հայտնաբերումը մարտահրավեր է նետում ռադիոգալակտիկաների էվոլյուցիայի վերաբերյալ ընդունված գաղափարներին և հուշում, որ այս առեղծվածային օբյեկտները լիովին հասկանալու համար հետագա հետազոտություններ են անհրաժեշտ: Հետազոտության հեղինակները նշում են, որ ապագա մոդելավորումները և լրացուցիչ դիտարկումները կարևոր կլինեն այս արտասովոր ռադիոգալակտիկայի առեղծվածները բացահայտելու համար: