Samsung-ը սմարթֆոնների վաճառքով ԱՄՆ-ում առաջ է անցել Apple-ից

Ամերիկյան ներքին շուկայում սմարթֆոնների վաճառքի ցուցանիշով Samsung-ն առաջին անգամ առաջ է անցել Apple-ից։ CIRP վերլուծական ընկերության վերջին տվյալների համաձայն՝ Samsung-ը վերջին 12 ամիսների ընթացքում գրավել է շուկայի 38%-ը, մինչդեռ Apple-ը՝ 33%-ը։ Այս մասին հայտնում է WCCFTech-ը։

Մասնագետները Samsung-ի հաջողությունը կապում են ընկերության արտադրանքի լայն տեսականու հետ, որը ներառում է ինչպես առաջատար Galaxy S մոդելները, այնպես էլ ցածրակարգ տարբերակները, ինչպիսիք են Galaxy A շարքը:

Սա կորեական հսկային հնարավորություն է տալիս ներգրավել սպառողների ավելի լայն լսարան: Apple-ը շարունակում է կենտրոնանալ պրեմիում մոդելների վրա, և միայն iPhone SE-ն կարող է դասակարգվել որպես 500 դոլարից պակաս արժողությամբ սարք:

Չնայած Apple-ը պահպանում է բարձր եկամտաբերությունը, Samsung-ի ավելի մատչելի գնային քաղաքականությունը թույլ է տվել ամրապնդել իր դիրքերը շուկայում: Այնուամենայնիվ, պետք է նշել, որ սպառողների նախասիրությունները կրկին կարող են փոխվել, երբ այս աշնանը թողարկվի նոր iPhone 16 շարքը, որոնք ըստ լուրերի, կունենան արհեստական ​​բանականության մի շարք գործառույթներ։

2023-ի չորրորդ եռամսյակի տվյալներով՝ աշխարհում ամենաշատ վաճառվող սմարթֆոններն են iPhone 15-ը, iPhone 13-ը և Samsung Galaxy S23 FE-ն։ Նշված ժամանակահատվածում Apple-ը վաճառել է 5,3 մլն iPhone 15 և 2,4 մլն iPhone 13: Samsung Galaxy S23 FE-ը վաճառվել է 2,2 մլն միավոր: Լավագույն հնգյակում ներառվել են նաև iPhone 14 և Galaxy S23 հիմնական մոդելները՝ համապատասխանաբար 1,9 մլն սմարթֆոն և 1,7 մլն միավոր արդյունքով։