Սմարթֆոնը ճիշտ չլիցքավորելու ամենատարածված պատճառը սնուցման կամ մալուխի անսարքությունն է: Այս և հեռախոսի լիցքավորման հետ կապված այլ ընդհանուր խնդիրների, ինչպես նաև դրանց լուծումների մասին Газета.Ru-ին պատմել է МТС-ի մանրածախ ցանցի հեռախոսային բաժնի ղեկավար Նատալյա Գոլիցինան։
«Լիցքավորիչի [անսարք լինելու] վարկածն ստուգելու համար միացրե՛ք ձեր սմարթֆոնը էներգիայի այլ աղբյուրի: Եթե դա չի օգնում, ապա փորձե՛ք միացնել սմարթֆոնը ձեր համակարգչին կամ նոութբուքին USB միակցիչի միջոցով: Խորհուրդ է տրվում օգտագործել միայն օրիգինալ արտադրության լարեր»,- ասել է Գոլիցինան։
Նրա խոսքով՝ փոշու պատճառով լիցքավորման միակցիչի խցանումը նույնպես կարող է հանգեցնել լիցքավորման խնդիրների: Այս դեպքում պետք է միակցիչը զգուշորեն մաքրել փափուկ խոզանակով և խուսափել միակցիչի ներսի հատվածը խոնավության ներթափանցումից։
«Երբեմն սմարթֆոնները դադարում են լիցքավորվել ծրագրային ապահովման սխալների կամ անսարքությունների պատճառով: Թարմացրե՛ք ձեր սմարթֆոնի ծրագրաշարը ամենաթարմ տարբերակով և կարգավորումները բերեք գործարանային վիճակի: Միևնույն ժամանակ մի՛ մոռացեք պատճենել ձեր տվյալները»,- հավելել է Գոլիցինան։
Սմարթֆոնը կարող է չլիցքավորվել նաև մարտկոցի անսարքության հետևանքով։ Այս տարբերակը ստուգելու համար անհրաժեշտ է վերագործարկել սարքը և ստուգել մարտկոցի կարգավիճակը կարգավորումներում: Եթե մարտկոցը մաշված է կամ վնասված, այն պետք է փոխարինել նորով։
Շոգ սեզոնին հեռախոսները կարող են տուժել ջերմաստիճանի փոփոխություններից, ինչը ևս կարող է հանգեցնել լիցքավորման խնդիրների։ Այս դեպքում պետք է թույլ տալ, որ սմարթֆոնը մի փոքր սառի ստվերում կամ գրպանում։ Ապա կարելի է այն հանգիստ լիցքավորել։
Եթե վերը նշված բոլոր մեթոդները չեն օգնում, ապա հնարավոր է, որ ձեր սմարթֆոնը ներքին բաղադրիչների հետ կապված լուրջ խնդիր ունի, ինչպիսիք են լիցքավորման միակցիչը կամ հոսանքի կարգավորիչը: Այս դեպքում ախտորոշման և վերանորոգման համար խորհուրդ է տրվում դիմել պրոֆեսիոնալ սպասարկման կենտրոն:
ամիս
շաբաթ
օր