Լավ մարքեթոլոգն արդեն այսօր գիտի, թե ինչ կուզեք 5 տարի հետո. ո՞ր որակներն են կարևոր մարքեթոլոգի համար և ինչպե՞ս ԱԲ-ը կփոխի այս մասնագիտությունը

Հասարակության մեջ թյուր կարծիք կա, որ մարքեթինգը ստեղծագործականության մասին է: Սակայն Hexact ընկերության համահիմնադիր և բիզնեսի զարգացման տնօրեն Արմեն Ավագ Ավագյանը վստահ է, որ դա այդպես չէ. մարքեթինգը, նրա կարծիքով, բիզնեսի հիմնական գործառույթներից է, և դրա հիմնական նպատակը գումար աշխատելն է։

«Մարքեթինգն ամենևին էլ ստեղծագործականության մասին չէ: Մարքեթինգը փողի մասին է, թե ինչպես գումար աշխատել»,- NEWS.am Tech-ի հետ զրույցում նշեց նա։

Նրա խոսքով՝ մարքեթինգը հիմնված է թվերի, ալգորիթմների ու բանաձևերի վրա, և եթե մարդը չի սիրում աշխատել չոր թվերի ու տվյալների հետ, ուրեմն լավ մարքեթոլոգ չի դառնա։

«Իմ կարիերայի առաջին չորս տարիների ընթացքում, իսկ ես այս ոլորտում եմ ավելի քան 15 տարի, ես տեսել եմ միայն Excel-ի ֆայլեր, աշխատել միայն տվյալների հետ: Ես ո՛չ հաճախորդներ եմ տեսել, ո՛չ բովանդակություն, ո՛չ գովազդ: Միայն թվեր։ Քանի որ փողի գաղտնիքը հենց թվերի մեջ է թաքնված։ Մեկ ադամանդ գտնելու համար պետք է շատ հող փորել: Սակայն այս ադամանդը, եթե գտնեք, կարող է հինգ տարի շահույթ բերել ձեզ»,- ասաց մասնագետը։

Ժամանակակից տեխնոլոգիաները, մասնավորապես արհեստական բանականությունը, իսկապես կարող են օգնել հսկայական քանակի տվյալների հետ աշխատելու հարցում: Բայց կան մի քանի կարևոր որակներ, որ պետք է ունենա լավ մարքեթոլոգը, որոնց արհեստական ​​բանականությունը չի կարող փոխարինել։

Առաջինը, ըստ Ավագյանի, հետաքրքրասիրությունն է։

««Ինչո՞ւ» հարցը պետք է ավելի շատ հետաքրքրի, քան «ի՞նչ»-ը և այլ հարցեր: «Ի՞նչ ես գնել», «Որտե՞ղ ես գնացել»: Այս հարցերի պատասխանները պետք է ինձ ավելի քիչ հետաքրքրեն, քան այնպիսի հարցերի պատասխանները, ինչպիսիք են՝ «ինչո՞ւ ես սա գնել», «ինչո՞ւ ես Կոկա-կոլա խմում», «ինչո՞ւ ես շոկոլադ ուտում»։ Փողը թաքնված է «ինչո՞ւ»-ով սկսվող հարցերի պատասխաններում։ «Ինչո՞ւ»-ից դուք պատկերացում կկազմեք, դրա հիման վրա՝ արշավ, իսկ այդ արշավը գումար կբերի»,- նշեց մասնագետը։

Երկրորդ հատկանիշը, որը կարևոր է մարքեթոլոգի համար, «ապագան տեսնելու» ունակությունն է. արհեստական բանականությունը, չնայած տվյալների վերլուծության առաջադեմ հնարավորություններին, դեռ չունի այս հմտությունը. այստեղ անհրաժեշտ են հենց մարդկային բնազդն ու ըմբռնումը:

Բրենդի դիրքավորումը, ինչպես բացատրեց Ավագյանը, աշխատում է ոչ թե այսօրվա սպառողի, այլ ապագայի սպառողի հետ. մարքեթինգային արշավներն ուղղված են նրան, որ մարդիկ ապագայում՝ երեք տարի, հինգ տարի հետո, ունենան որոշակի տպավորություն, որոշակի կարծիք տվյալ ապրանքանիշի մասին։

«Դա նշանակում է, որ ես հենց հիմա հինգ տարի հետոյի դիրքն եմ որոշում։ Դա նշանակում է նաև, որ ես թիրախավորում եմ ոչ թե այսօրվա սպառողին, այլ ապագայի սպառողին, որոնք կլինեն հինգ տարի հետո։ Սա նշանակում է, որ ես պետք է հասկանամ, թե ինչպիսին կլինի աշխարհը, ինչպիսին կլինի շուկան հինգ տարի հետո, ինչ կարիք կունենա իմ սպառողը հինգ տարի հետո, և այսօրվանից ես պետք է սկսեմ դիրքավորվել այնտեղ, այդ ապագայում»,- ասաց նա։  

Ի՞նչ այլ որակներ են պետք լավ մարքեթոլոգին: Արդյոք արհեստական բանականությունը կկարողանա՞ փոխարինել նրանց։ Ինչպե՞ս նոր տեխնոլոգիաները կփոխեն այս մասնագիտությունը։ Այս և շատ ավելիի մասին դիտեք Արմեն Ավագ Ավագյանի հետ NEWS.am Tech-ի հետ հարցազրույցում։