Minecraft-ում վիրուս է հայտնվել, որով հաքերները կարող են վարակել օգտատերերի համակարգիչները ողջ աշխարհում

Հայտնի Minecraft խաղում նոր վիրուս է հայտնվել՝ BleedingPipe-ը, որը հաքերներին հնարավորություն է տալիս կոտրել օնլայն խաղերի սերվերները և վարակել խաղացողների համակարգիչները ամբողջ աշխարհում։

Ինչպես տեղեկացնում է Tom's Hardware պորտալը, BleedingPipe-ն օգտագործում է Java-ի խոցելիությունը՝ սերվերին վնասակար կոդ փոխանցելու համար: Երբ սերվերը վարակվում է, վիրուսը տարածվում է առանձին օգտատերերի համակարգիչների վրա: Հարձակվողները կարող են հեռակա կարգով տարբեր գործողություններ կատարել վարակված համակարգիչների վրա, այդ թվում՝ ներբեռնել զոհի անձնական ֆայլերը կամ գաղտնագրել տվյալները, որպեսզի հետագայում փրկագին պահանջեն դրանց ապագաղտնագրման համար:

Ըստ հետազոտողների, որոնք զբաղվում են Minecraft-ում վնասակար ծրագրերի տարածման կանխարգելմամբ, BleedingPipe-ը կարող է հեշտությամբ ներբեռնվել օգտատերերի համակարգիչներում՝ խաղի ռեժիմներից մեկի հետ մեկտեղ: Պարզվել է, որ նոր վիրուսով վարակված են արդեն Minecraft-ի առնվազն 30 տարբեր ռեժիմներ, ներառյալ այնպիսի հայտնիները, ինչպիսիք են AetherCraft-ը և ttCore-ը։

Dogboy21 կեղծանունով էնտուզիաստը թողարկել է ծրագրային շտկում՝ նախատեսված խոցելիությունը վերացնելու համար: Այն կիրառելու համար խաղացողները պետք է նոր *.jar ֆայլը ներբեռնեն և տեղափոխեն իրենց ռեժիմների թղթապանակ: Այնուամենայնիվ, օգտատերերը պետք է համոզվեն, որ չեն օգտագործում խաղի 1.7.10 կամ 1.12.2 խոցելի տարբերակները, որոնք առավել շատ են ենթարկվում BleedingPipe-ի հարձակումներին:  

Վերջերս խաղի միջոցով տարածված մեկ այլ վիրուս է հայտնաբերվել։ Այն վարակում է խաղացողների համակարգիչները Call of Duty Modern Warfare 2-ի (2009) խաղի բազմախաղացող ռեժիմում: Այս վիրուսի պատճառով խաղը մշակած Activision ընկերությունը նույնիսկ ստիպված է եղել ժամանակավորապես դադարեցնել խաղի այս ռեժիմը Steam հարթակում։

Մեկ այլ վտանգավոր վիրուս՝ Big Heat-ը, քողարկվում է որպես Windows-ի թարմացում, և համակարգիչ թափանցելուց հետո գաղտնագրում է բոլոր ֆայլերը և գումար կորզում օգտատերերից։