Գերտաքացած սմարթֆոնը կամ այլ գաջեթը սառցարան դնելու խորհուրդը կարող է թվալ արագ միջոց՝ սարքը բարձր ջերմաստիճանից փրկելու համար։ Իրականում նման եղանակը կարող է արագացնել դրա փչացումը։ Կտրուկ սառեցումը պայմաններ է ստեղծում խտացքի առաջացման համար և կարող է վնասել թե՛ էլեկտրոնիկան, թե՛ մարտկոցը։

Այս մասին «Газете.Ru»-ին պատմել է ՌՏՈՒ ՄԻՐԷԱ-ի ֆիզիկայի և տեխնիկական մեխանիկայի ամբիոնի ավագ դասախոս Նիկոլայ Զենչենկոն։

Գլխավոր վտանգը՝ խտացքը կորպուսի ներսում

Տաք սարքը սառցախցիկում տեղադրելու դեպքում դրա մակերեսն ու ներքին բաղադրիչները սկսում են կտրուկ սառել։ Ջերմաստիճանների մեծ տարբերության պատճառով կորպուսի ներսում կարող է խտացք առաջանալ։

Խոնավությունը կարող է նստել միկրոսխեմաների, կոնտակտների և տպագիր պլատի վրա։ Արդյունքում առաջանում է կարճ միացման, կոնտակտների օքսիդացման և կոռոզիայի վտանգ։ Նույնիսկ եթե նման սառեցումից հետո սմարթֆոնը շարունակի աշխատել, կոնտակտների վնասումը կարող է դրսևորվել ավելի ուշ և հանգեցնել առանձին բաղադրիչների խափանման։

Ուստի ցածր ջերմաստիճանն ինքնին գլխավոր խնդիրը չէ։ Ավելի վտանգավոր է ուժեղ տաքացման, կտրուկ սառեցման և դրանից հետո սարքի ներսում խոնավության առաջացման համադրությունը։

Ջերմաստիճանի կտրուկ տատանումը վտանգավոր է նաև բաղադրիչների համար

Կա նաև մեկ այլ խնդիր։ Գաջեթի ներսում գտնվող տարբեր նյութերն ունեն ջերմային ընդարձակման տարբեր գործակիցներ։ Կտրուկ սառեցման դեպքում դրանք սեղմվում են ոչ միատեսակ։

Առաջացող մեխանիկական լարումների պատճառով կարող են վնասվել զոդված միացումները և շլեյֆները։ Նման տատանումները հատկապես անցանկալի են բարդ էլեկտրոնիկայի համար, որտեղ բազմաթիվ բաղադրիչներ միմյանց միացված են փոքր մակերեսի վրա։

Այսպիսով, սարքի ջերմաստիճանը արագ իջեցնելու փորձը կարող է առաջացնել լրացուցիչ վնասներ, որոնք մինչ սառեցնելը չեն եղել։

Սառցարանը հատկապես վտանգավոր է վնասված մարտկոցի համար

Առանձին ռիսկ է առաջանում, եթե գաջեթում արդեն տեղադրված է փքված կամ վնասված կուտակիչ մարտկոց։

Զենչենկոյի խոսքով՝ կտրուկ սառեցումը կարող է խախտել կուտակիչ տարրի ներքին շերտերի ամբողջականությունը։ Ընդ որում վտանգը պարտադիր չէ, որ դրսևորվի անմիջապես․ սարքը սառցարանից հանելուց հետո մարտկոցը կրկին կսկսի տաքանալ մինչև սենյակային ջերմաստիճան, և վնասված տարրը կարող է դառնալ հրդեհման պատճառ։

Այդ պատճառով մարտկոցի վնասման նշաններ ունեցող գաջեթը առավել ևս չարժե փորձել «փրկել» սառցարանի օգնությամբ։

Այստեղ գլխավոր կանոնը պարզ է․ գերտաքացած գաջեթը պետք չէ կտրուկ սառեցնել։ Սառցարանը կարող է սարքի ջերմաստիճանը նվազեցնելու փորձը վերածել էլեկտրոնիկայի և մարտկոցի համար լրացուցիչ ռիսկի։