Նախընտրելի
Նոյեմբերի 15-ից 16-ը Երևանում կանցկացվի Silicon Mountains-2024 միջազգային տեխնոլոգիական գագաթնաժողովը։
Տեղեկատվական և հաղորդակցության տեխնոլոգիաների գործատուների միության (UEICT) կողմից կազմակերպվող Silicon Mountains տեխնոլոգիական ամենամյա գագաթնաժողովն անցկացվում է 2019-ից։
Այս տարիների ընթացքում միջոցառումը հաստատվել է որպես առաջատար հարթակ՝ քննարկելու տեխնոլոգիական առաջընթացի ապագան՝ պաշտոնյաների, միջազգային և տեղի փորձագետների մասնակցությամբ: Գագաթնաժողովը ծառայում է որպես համագործակցային տարածք՝ ուսումնասիրելու բարձր տեխնոլոգիական նորարարությունները և դրա սոցիալ-տնտեսական ազդեցությունն ամբողջ աշխարհում, ինչպես նաև բացահայտելու Հայաստանի համար հնարավորություններն ու մարտահրավերները:
Silicon Mountains 2024-ը կկենտրոնանա տնտեսությունում ԱԲ կիրառման և դրա խնդիրների վրա
Ավելի քան 1000 մասնակից կունենա եզակի հնարավորություն՝ միջազգային և տեղական փորձագետներից տեղեկություններ ստանալու արհեստական բանականության (ԱԲ) մասին։
Հայաստանի Տեղեկատվական և հաղորդակցության տեխնոլոգիաների գործատուների միության գործադիր տնօրեն Էդուարդ Մուսայելյանը նոյեմբերի 13-ին հրավիրված մամուլի ասուլիսի ժամանակ (ֆոտոշարքը՝ այստեղ) ասաց, որ այս տարի սա երկրորդ միջոցառումն է, որ տեղի կունենա Silicon Mountains-2024-ի շրջանակում․ առաջինը տեղի է ունեցել Գյումրիում։
Նա հավելեց, որ հաջորդ տարի ևս նախատեսվում է անցկացնել երկու միջոցառում՝ Հայաստանի մարզերից մեկում և Երևանում։
Մուսայելյանը մատնանշեց մասնակիցների թվի կտրուկ աճը՝ հաշվի առնելով, որ առաջին գագաթնաժողովներին մասնակցում էր 100-150 մարդ, իսկ այս տարի այդ թիվը տասնապատկվել է։
«Մենք կարևորում ենք Հայաստանում արհեստական բանականության զարգացումը պետության և մասնավոր հատվածի համագործակցությամբ»,- նշեց նա։
ԱԲ ազդեցությունը սոցիալական գործընթացների վրա
Տեղեկատվական և հաղորդակցության տեխնոլոգիաների գործատուների միության նախագահ Արմեն Բալդրյանն իր հերթին ասաց, որ ԱԲ կիրառումը կսկսի ազդել արդյունաբերության, կառավարման և կրթության ոլորտների վրա։
Նրա կարծիքով՝ ԱԲ-ն, ինչպես բարձր տեխնոլոգիաների ոլորտի մյուս ուղղությունները, առանցքային կդառնա ինչպես երկրների տնտեսություններում, այնպես էլ մարդկանց առօրյա կյանքում։
«Փոփոխություններից կշահեն այն երկրները, որոնք կդառնան ոլորտի առաջատարներ և կոնկրետ առավելություն կստանան համաշխարհային մրցակցության մեջ։ Հաջողության ճանապարհին առանցքային կլինի մարդկային կապիտալը»,- համոզմունք հայտնեց Բալդրյանը։
Հայաստանի բարձր տեխնոլոգիական արդյունաբերության փոխնախարար Ռուբեն Սիմոնյանն իր հերթին ևս ԱԲ-ն անվանեց մեր ժամանակների կարևորագույն տեխնոլոգիաներից մեկը։
Նրա գնահատմամբ՝ այս ոլորտում ներդրումները տնտեսական կտրուկ աճ կապահովեն։
Նա ընդգծեց, որ ՀՀ կառավարությունը կարևորում է այս ոլորտում գիտահետազոտական և զարգացման ոլորտների զարգացումը, հավելելով, որ դրան են միտված օրենսդրական փոփոխությունները, այդ թվում՝ հարկային արտոնությունների վերանայումը։
Նրա համոզմամբ՝ Silicon Mountains 2024-ի նման միջոցառումների անցկացումը հարթակ է ստեղծում նորագույն տեխնոլոգիաների վերաբերյալ մտքերի և փորձի փոխանակման համար։
«Ընդհանուր կարծիք կա, որ արհեստական բանականությունը գալիս է մրցելու մարդկանց հետ, բայց տեխնոլոգիայի ճիշտ օգտագործումն օգնում է մեր առօրյա կյանքում: Մարդն զգում է տեխնոլոգիական զարգացումը, եթե դա ուղղակիորեն ազդում է իր վրա։ Միաժամանակ բոլորս էլ հասկանում ենք ռիսկերը, բայց ճիշտ մոտեցման դեպքում այդ ռիսկերը վերածվում են հնարավորությունների»,- պարզաբանեց պաշտոնյան։
ԱԲ ոլորտում ամենակարևոր մարտահրավերը, ըստ նրա, մարդու նույնականացումն է։
«Արդյոք վստահելի՞ է այս կամ այն համակարգը, որը հավաքում է մարդու մասին տեղեկություններ։ Նոր տեխնոլոգիաների ներդրման ժամանակ շատ կարևոր է նաև կիբեռանվտանգության ասպեկտը»,- նշեց Սիմոնյանը։
Նա վստահեցրեց, որ Հայաստանը շահագրգռված է սփյուռքից մարդկային ռեսուրսներ ներգրավելու մեջ և ակտիվորեն աշխատում է այդ ներուժի հետ։
Silicon Mountains Summit 2024-ը՝ կարևոր հարթակ փորձի փոխանակման համար
Ucom ընկերության գլխավոր տնօրեն Ռալֆ Յիրիկյանն իր հերթին ասաց, որ ներկայիս թվային դարաշրջանում շատ կարևոր է հետևել բոլոր նորամուծություններին և հետ չմնալ միտումներից։
«Մենք պետք է առաջատար լինենք, պետք է զարգացնենք մեր կարողությունները։ Միջոցառումները, ինչպիսիք են Silicon Mountains 2024-ը, շատ օգտակար են և թույլ են տալիս փոխանակվել փորձով և գաղափարներով, հաստատել նոր կապեր: Ucom-ը, որպես հեռահաղորդակցության ոլորտի ընկերություն, որն անմիջականորեն առնչվում է բարձր տեխնոլոգիաներին, կարևորում է այս միջոցառման անցկացումը։ Մենք ուրախ ենք մասնակցել դրան և՛ մեր փորձով, և՛ գիտելիքներով աջակցել դրա իրականացմանը։ Մենք պատրաստ ենք սովորել ուրիշներից և մեր գիտելիքներն ու փորձը փոխանցել ուրիշներին: Սա կարևոր հարթակ է, որտեղ կարելի է լսել կարևոր մտքեր և գաղափարներ»,- ասաց Յիրիկյանը։
Նա հավելեց, որ միջոցառման նկատմամբ հետաքրքրությունն աճում է` նշելով պետության և մասնավոր հատվածի համագործակցության կարևորությունը։
Միջոցառման շրջանակում տեղի կունենա 3 պանելային քննարկում
Առաջին պանելային քննարկման ժամանակ, որը վերնագրված է «Industry.ai», կքննարկվի ԱԲ զարգացումն ու կիրառումը արդյունաբերության տարբեր ոլորտներում:
«Invest.ai» խորագրով երկրորդ պանելային քննարկումը նվիրված կլինի ԱԲ ֆինանսական ասպեկտներին, ԱԲ ստեղծման, զարգացման և կիրառման մեջ ներդրումներ կատարելու առավելություններին: Մասնակիցները կքննարկեն, թե ինչպես է ԱԲ-ն ազդում ներդրումային ռազմավարությունների, ֆինանսական կանխատեսելիության և ներդրումային արդյունավետության վրա բազմաթիվ ոլորտներում ֆինանսական հաստատությունների, ներդրումային հիմնադրամների և անհատ ներդրողների համար:
Երրորդ պանելային քննարկման՝ «Impact.ai»-ի ժամանակ, կքննարկի ԱԲ սոցիալական ազդեցությունը:
Գագաթնաժողովն անցկացվում է Հայաստանի բարձր տեխնոլոգիական արդյունաբերության նախարարության աջակցությամբ։
Ucom-ը գագաթնաժողովի պլատինե գործընկերն է։
Միջոցառման մեդիա գործընկերը NEWS.am տեղեկատվական-վերլուծական գործակալությունն է:
Գագաթնաժողովի գործընկերների թվում են նաև EasyPay-ը, Visa-ն, Synospys-ը, Staffmedia-ն, Վերակառուցման և զարգացման եվրոպական բանկը, USAID-ն, UNICOMP-ը:
Միջոցառման հատուկ հյուրը կլինի Հնդկաստանի ՏՏ ոլորտի առանցքային դեմքերից համարվող Նարայանա Մուրտին, որը Infosys ընկերության հիմնադիրն է, ՀՀ պետական մրցանակի 2023 թվականի դափնեկիր։
