Apple-ը պարզաբանել է, թե ինչու iPhone-ի հին մոդելները և Vision Pro խառը իրականության սարքերը չեն ստանա Apple Intelligence արհեստական բանականության աջակցություն: Այս մասին հայտնում է WCCF Tech կայքը։

Հունիսի սկզբին տեղի ունեցած WWDC 2024 ժամաժողովի ժամանակ հայտարարվեց, որ Apple Intelligence-ի գործառույթները հասանելի կլինեն միայն iPhone 15 Pro, iPad և Mac սարքերում, որոնք աշխատում են Apple-ի սեփական արտադրության M1 և ավելի նոր սերնդի չիպերով: Նշվում է, որ Apple M1-ի նեյրոնային պրոցեսորը (NPU միավոր) իր կատարողականությամբ համատեղելի է iPhone 12-ում օգտագործվող Apple A14-ի NPU-ի հետ:

Այնուամենայնիվ, ինչպես պարզաբանել է Apple-ը, M2-ի վրա հիմնված Vision Pro-ն չունի Apple Intelligence-ի աջակցություն, քանի որ սարքի NPU-ն արդեն զբաղված է արհեստական բանականության այլ առաջադրանքներով, ինչպիսիք են օբյեկտների և ժեստերի ճանաչումը, և չունի հաշվարկային ազատ հզորություն այլ առաջադրանքների համար:

Նմանատիպ իրավիճակ է iPhone-ի հին մոդելների դեպքում: Թեև դրանց NPU-ն հզորությամբ մոտ է Apple M1-ի միավորին, նոութբուքների և պլանշետների համար այս միավորներն ավելի քիչ ծանրաբեռնված են, քան սմարթֆոններում: Բացի դրանից՝ հին iPhone-ներն ունեն 8 ԳԲ-ից պակաս օպերատիվ հիշողություն, ինչը նույնպես ազդում է նոր գործառույթների աջակցության վրա:

Apple Intelligence-ի աջակցությունը կհայտնվի iPhone 15 Pro-ի և ընկերության այլ սարքերի վրա 2024-ի վերջին: Ավելին, ԱԲ որոշ գործառույթներ կհայտնվեն հաջորդ տարի։