Sperasoft. ի՞նչ խնդիրների է բախվում տեսախաղեր մշակող ընկերությունը Հայաստանում

Խաղեր մշակող միջազգային հանրահայտ Sperasoft ընկերության հայաստանյան գրասենյակը բացվել է մեկուկես տարի առաջ։ Այսօր այն արդեն ունի տասնյակ ծրագրավորողներ, դիզայներներ, ինժեներներ, նկարիչներ և այլ մասնագետներ, որոնք մի շարք այլ երկրների գործընկերների հետ միասին աշխատում են այնպիսի հանրաճանաչ ֆրենչայզինգներին վրա, ինչպիսիք են Halo-ն, Assassin’s Creed-ը, Battlefield-ը և Rainbow 6-ը:

Sperasoft-ի ավագ տնօրեն և Sperasoft Armenia-ի գլխավոր տնօրեն Դենիս Լոպանցևը NEWS.am Tech-ի հետ զրույցում պատմել է Հայաստանում աշխատելու առանձնահատկությունների, ընկերության առջև ծառացած մարտահրավերների ու խնդիրների և դրանց լուծման ուղիների մասին։

3+1 գործոններ, որոնք ազդել են ՀՀ-ում գրասենյակ բացելու որոշման վրա

Sperasoft-ն այսօր ակտիվորեն աճում և զարգանում է, և երբ ընկերությունը պետք է որոշեր, թե որ երկրներում է իմաստ ունի նոր ստուդիաներ բացել, Հայաստանը հայտնվեց կարճ ցուցակում էր: Այս հարցում վճռորոշ դեր է խաղացել երեք կարևոր գործոն։

«Հայաստանում նոր կազմակերպություն բացելու համար օրենքները բավականին պարզ են։ Բացի դրանից, մենք ակնկալում էինք, որ Հայաստանում բարձր տեխնոլոգիաների ոլորտի համար լրացուցիչ աջակցության ծրագրեր կլինեն։ Այդ ժամանակ կառավարությունն արդեն քննարկում էր այս հարցը, և մենք հասկացանք, որ եթե գանք այստեղ, կարող ենք հույս դնել կառավարության որոշակի աջակցության վրա։ Մենք նաև հասկացանք, որ Հայաստանում ուսանողներն ու շրջանավարտները մաթեմատիկական լավ հիմք ունեն. այստեղ բուհերը բավականին բարձր մակարդակի կրթություն են տալիս գիտելիքատար ոլորտներում, իսկ խաղերի մշակման ոլորտում, որտեղ ակտիվորեն օգտագործվում են ցածր մակարդակի ծրագրավորման լեզուներ, սա շատ կարևոր է»,- ասաց Դենիս Լոպանցևը։

Հայաստանում գրասենյակ բացելու որոշման վրա ազդած բոնուսային գործոնը երկրի ստեղծագործական ներուժն էր. Հայաստանում շատ ստեղծագործող մարդիկ կան, և ընկերության ղեկավարությունը հույս ուներ, որ դժվար չի լինի գտնել 2D, 3D նկարիչներ, անիմատորներ և այլ մասնագետներ, որոնք կաշխատեին ժամանակակից խաղերի համար այդքան կարևոր գեղարվեստական ​​բաղադրիչի վրա:  

Հայաստանի աշխատաշուկան այնքան էլ պատրաստ չէր

Sperasoft-ի փորձագետները խաղերի ոլորտում Հայաստանի ներուժը բավականին բարձր էին գնահատել։ Սակայն իրականում աշխատաշուկան այնքան էլ պատրաստ չէր այս ոլորտի ակտիվ զարգացմանը, և բավականին քիչ կադրեր կային, որոնք կարող էին անմիջապես սկսել աշխատանքը։ Սա հասկանալի է. քանի որ այստեղ խաղային շատ քիչ ընկերություններ կային։ Շատ երիտասարդներ, որոնց համար տեսախաղերի ոլորտը նույնիսկ շատ, շատ գրավիչ էր թվում, նախընտրում էին այնպիսի մասնագիտություններ, որոնց շնորհիվ հնարավորինս հեշտ աշխատանք կգտնեին: Ահա թե ինչու էին մարդիկ պատրաստակամորեն սովորում ծրագրավորման Java լեզուն, իսկ խաղի դիզայների մասնագիտությունը միայն քչերն էին կարողանում ընտրել:

Sperasoft-ի ղեկավարությունն այս ամենը հասկանում էր։ Հասկանում էր նաև այն, որ հենց բիզնեսը պետք է ձևավորի աշխատաշուկան։ Ուստի ի սկզբանե տրամադրված էր, որ անհրաժեշտ կլինի ներդրումներ անել կրթական գործընթացում և կադրեր «աճեցնել» իր համար։

Այդ նպատակով ընկերությունն սկսել է համագործակցել Երևանի գրեթե բոլոր բուհերի հետ՝ իրականացնելով կրթական ծրագրեր, ինտերնատուրա  և պրակտիկա ուսանողների համար՝ սովորեցնելով նրանց այն, ինչ անհրաժեշտ է իմանալ խաղերի մշակման ոլորտում աշխատելու համար: Ավելին, ընկերությունը դասասենյակային սարքավորումներ է տրամադրում համալսարաններին ուսուցման արդյունավետությունը բարձրացնելու համար:

«Մենք պատրաստ ենք նաև վերապատրաստել բուհերի դասախոսներին, որպեսզի նրանք կարողանան այդ գիտելիքները տարածել ուսանողների շրջանում. սա է ուսուցման գործընթացի մասշտաբավորման միակ միջոցը: Մի բան է, երբ մենք մեր ուժերով ենք անցկացնում վերապատրաստման միջոցառումներ, և բոլորովին այլ բան, երբ բուհերը ձեռք են բերում փորձագիտական անհրաժեշտ գիտելիքներ և իրենց դասախոսների միջոցով ուսանողներին տալիս են գիտելիքներ, որոնք կարևոր են մեր ոլորտի համար»,- նշեց Դենիս Լոպանցևը։

Ինչպե՞ս կարող է պետությունն օգնել ՀՀ-ում խաղեր մշակող ընկերությունների զարգացմանը

Պետության կողմից աջակցությունը կարող է զգալիորեն բարձրացնել կրթական ծրագրերի արդյունավետությունը և դրանով իսկ բարելավել երկրում կադրերի հետ կապված իրավիճակը:

«Դասավանդմամբ պետք է զբաղվեն միայն բարձր որակավորում ունեցող մասնագետները։ Սակայն բոլորս էլ հասկանում ենք, որ նման մասնագետները բարձր աշխատավարձ են ստանում։ Իսկ ներկայումս ընկերությունն ինքն է վճարում նման ուսուցիչների աշխատանքի համար։ Եթե ​​պետությունը կարողանար համաֆինանսավորել նման կրթական ծրագրերը՝ վճարելով նման նախագծերին մասնակցող աշխատողների աշխատավարձերի գոնե մի մասը, դա մեծապես կմեծացներ մեր հնարավորությունները և թույլ կտար շատ ավելիին հասնել»։

Այսօր, ինչպես նշեց Լոպանցևը, Հայաստանում կան կրթական նախագծերի համաֆինանսավորման պետական ​​ծրագրեր, սակայն դրանք ունեն սահմանափակումներ, որոնք խաղերի մշակման ոլորտի համար այդ ծրագրերը դարձնում են ոչ տեղին։ Օրինակ՝ պահանջներ կան ուսուցիչների կրթության կամ գիտական ​​աստիճանի հետ կապված։ Սակայն տեսախաղերի մշակման ոլորտում նման պահանջներն տեղին չեն, քանի որ բարձր որակավորում ունեցող փորձագետ կարող է լինել ոչ միայն շատ լավ համալսարան ավարտած մարդը, այլև ինքնուսույցը, որը մեծ բարձունքների է հասել:

«Մենք կցանկանայինք, որ ավելի ճկուն ծրագրեր լինեին, որպեսզի ուսուցիչների դերում կարողանայինք նշանակել մասնագետների, որոնք ինչ-որ բան ունեն ուսանողներին փոխանցելու, որպեսզի կարողանանք համակարգել ծրագիրը և ուսումնական գործընթացի կազմակերպման հետ կապված այլ հարցեր, և կարողանանք գոնե մասնակի փոխհատուցում ստանալ կրթական այս նախաձեռնության նպատակով մեր արած ծախսերի դիմաց»,- ասաց Դենիս Լոպանցևը:

Բարձր տեխնոլոգիաների ոլորտի լրացուցիչ աջակցության ծրագրերը նույնպես մեծապես կնպաստեն տեսախաղերի ոլորտի ընկերությունների զարգացմանը։ Նման ծրագրերը ներկայումս քննարկվում են Հայաստանի կառավարության հետ՝ Ինֆորմացիոն տեխնոլոգիաների ձեռնարկությունների միության (ԻՏՁՄ) և Ձեռնարկությունների ինկուբատոր հիմնադրամի միջնորդությամբ։ Դոլարի նկատմամբ դրամի արժեվորումը հարվածել է այլ երկրների հետ աշխատող և դոլարով եկամուտ ստացող ընկերությունների բյուջեներին, և թեև այս խնդրի մասին վերջին շրջանում քիչ է խոսվում, այս խնդիրը դեռ արդիական է։

«Որպեսզի մենք կարողանանք այստեղ իսկապես լավ, մեծ մասշտաբով արդյունաբերություն կառուցել և զարգացնել, լրացուցիչ աջակցության ծրագրերը, թեկուզ որոշ ժամանակով, մեզ իսկապես կօգնեին»,- ասաց նա:   

Հարկերի հետ վերադարձի ծրագրերը նույնպես կարող են մեծ աջակցություն ցուցաբերել: Երկրի կառավարութունը քննարկում է նման ծրագիր, և տեխնոլոգիական շատ ընկերություններ հույս ունեն, որ այն կընդունվի և կիրականացվի. դա նրանց կտրամադրի լրացուցիչ միջոցներ, որոնք կարող են օգտագործվել աշխատակիցների աշխատավարձերը բարձրացնելու, լրացուցիչ սարքավորումներ ձեռք բերելու կամ նույն կրթական ծրագրերի համար։

«Այսօր տնտեսական բարդության մասին շատ է խոսվում. սա քաղաքների, երկրների կամ մարզերի արտադրական հնարավորությունների ցուցիչ է: Կարծում եմ, որ Հայաստանը լավ հնարավորություն ունի ավելացնելու իր տնտեսության բարդությունը նոր ճյուղերի միջոցով, այդ թվում՝ բարձր տեխնոլոգիաների ոլորտում։ Նորարարության եւ բարձր տեխնոլոգիաների ոլորտն այսօր կառավարության լուրջ ուշադրությանն է արժանի: Այս ոլորտն ընտրելով որպես տնտեսության գերակա ոլորտ՝ ապագայում կարող եք հասնել շատ լավ արդյունքների: Ինձ թվում է, որ Հայաստանը մեծ ներուժ և գերազանց ապագա ունի»,- ասաց Դենիս Լոպենսևը: