SpaceX-ը շուտով սմարթֆոնները կմիացնի անմիջապես Starlink-ի արբանյակային․ բջջային կապի թեստավորումը կսկսվի դեկտեմբերին

Անցյալ տարեվերջին հայտնի դարձավ, որ SpaceX-ը մտադիր է Starlink հեռահաղորդակցության արբանյակները զինել սարքավորումներով, որոնք թույլ կտան դրանք օգտագործել բջջային կապի համար. դրանց կկարողանան միանալ ամենասովորական սմարթֆոնները՝ առանց որևէ մոդիֆիկացիայի: Այժմ հաղորդվում է, որ Իլոն Մասկի ընկերությունը նախատեսում է սկսել արբանյակային բջջային ծառայությունների փորձարկումը 840 արբանյակների միջոցով արդեն հաջորդ ամիս։

Այս շաբաթ SpaceX-ը դիմում է ներկայացրել ԱՄՆ Հաղորդակցության դաշնային հանձնաժողովին (FCC) արտոնագիր ստանալու համար, որն ընկերությանը թույլ կտա Starlink արբանյակների միջոցով բջջային ծառայության փորձնական թեստավորում իրականացնել: Միևնույն ժամանակ, կարգավորիչը մտածում է SpaceX-ին նման արտոնագիր տրամադրելու նպատակահարմարության մասին, քանի որ մտահոգություններ կան առ այն, թե որքանով որակյալ կլինեն այդ ծառայությունները:

FCC ներկայացված փաստաթղթերից պարզ է դառնում, որ SpaceX-ը պահանջում է «ժամանակային հատուկ իրավասություններ» դեկտեմբերի 10-ից սկսած 180 օրվա ընթացքում մի շարք թեստեր անցկացնելու համար: Այս ընթացքում SpaceX-ը, T-Mobile-ի հետ համագործակցելով, նախատեսում է փորձարկել բջջային կապը՝ օգտագործելով բջջային օպերատորի արտոնագրված հաճախականության սպեկտրը, որպեսզի արբանյակներից ազդանշաններ փոխանցի 2000 փորձարկվող սարքերին:

«180-օրյա փորձնական ժամանակահատվածում SpaceX-ը նախատեսում է շահագործել մոտ 840 արբանյակ ուղիղ բջջային կապի համար օգտակար ծանրաբեռնվածությամբ: Ցանկացած պահի 840 արբանյակներից 60-ը կսպասարկեն բջջային հեռախոսները Միացյալ Նահանգներում այս փորձարկման շրջանակում տրամադրված թույլտվությանը համապատասխան»,- ասվում է SpaceX-ի հայտում:

Այս փուլում ընկերությունը ցանկանում է փորձարկել արբանյակային բջջային ծառայությունը երկրի 13 շրջաններում այդ թվում՝ Կալիֆոռնիայի Մաունթին Վյու, Կանզասի Կանզաս Սիթի և Տեխասի Հյուսթոն բնակավայրերում:

Նշենք, որ սա առաջին անգամը չէ, որ SpaceX-ը հայտ է ներկայացնում բջջային կապի փորձարկման համար։ Նմանատիպ հայտ, որով ընկերությունը նախատեսում էր 60 օրվա ընթացքում թեստեր անցկացնելու թույլտվություն ստանալ, ներկայացվել էր հոկտեմբերին։ Այնուամենայնիվ, SpaceX-ի հայտը բախվել էր AT&T-ի և Rural Wireless Association-ի հակազդեցությանը, որը նշել էր, որ ժամանակավոր արտոնագիր ստանալու համար ընկերությունը պետք է հայտը ներկայացներ FCC-ի ինժեներական մշակումների և տեխնոլոգիաների գրասենյակ: Այս շաբաթ SpaceX-ի ներկայացրած փաստաթղթերն ուղարկվել են FCC-ի հենց այդ ստորաբաժանում։