Նախընտրելի
ԱՄՆ Վայոմինգ նահանգում գտնվող առցանց երաժշտության մանրածախ վաճառքով զբաղվող Musicians Club ընկերության գործադիր տնօրենն աշխատանքից ազատել է իր աշխատակազմի 90%-ին՝ 110 հոգուց 99-ին՝ նոյեմբերի 15-ին նշանակված ժողովը բաց թողնելու համար: Բոլդուին Օդսոնն աշխատակիցներին ազատման մասին տեղեկացրել է Slack-ով։
«Ձեզանից նրանց համար, ովքեր չեն ներկայացել հանդիպմանն այս առավոտ, հաշվի առեք այս պաշտոնական ծանուցումը. դուք բոլորդ հեռացված եք աշխատանքից»,- գրել է Օդսոնը։
Նա բացատրել է, որ աշխատանքից ազատվածները չեն կատարել պայմանագրի իրենց մասը՝ բաց թողնելով պարտադիր ժողովը։ Օդսոնն աշխատակիցներից պահանջել է դուրս գալ բոլոր աշխատանքային օգտահաշիվներից, վերադարձնել ընկերության գույքը և համարել իրենց աշխատանքային պայմանագրերը դադարեցված:
«Ես ձեզ հնարավորություն տվեցի բարելավել ձեր կյանքը, քրտնաջան աշխատել և աճել: Սակայն դուք ինձ ցույց տվեցիք, որ լուրջ չեք վերաբերվում դրան»,- ընդգծել է Musicians Club-ի գործադիր տնօրենը։
Նրա խոսքով, ժողովին մասնակցել է միայն 11 աշխատակից, որոնք կշարունակեն աշխատել։
Կրճատվածներից շատերն աշխատել են հեռավար կարգով և առանց վարձատրության, խանութն առաջարկում է թափուր աշխատատեղեր այն ուսանողներին, որոնք հետաքրքրված են աշխատանքային փորձով: Երաժիշտների ակումբում օպերացիոն մենեջերի չվճարվող պաշտոնի համար դիմել է 51 դիմորդ։
Աշխատանքի նկարագրությունում նշվում է, որ դիմորդը կունենա «էլեկտրոնային առևտրի մասին խորը պատկերացում մրցակցային շուկայում», «առցանց վաճառքի հարթակների կառավարման և օպտիմալացման գործնական փորձ» և «2025-ին մշտական վճարովի աշխատանքի բարձր ներուժ»:
Musicians Club-ի LinkedIn-ի էջում այս պահին նշվում է, որ առցանց խանութն ունի 11-ից 50 աշխատակից: Գլխավոր տնօրենի խոսքով՝ իրենց այցերի թիվն անցել է 20,000-ը, իսկ վաճառքը «բոլոր ժամանակների ամենաբարձր մակարդակի վրա է»։
