Նախընտրելի
Աշխարհի 12 երկրից 32 ներդրող կժամանի Հայաստան՝ մասնակցելու առաջին անգամ իրականացվող Investor Tour (Ներդրողների տուր) միջոցառմանը։
WCIT2024/DigiTec-ի շրջանակում BANA Angels-ը ստեղծել էր հատուկ հնարավորություն, որի շնորհիվ արտերկրի ներդրողները կարող են դիմել, հավատարմագրվել և WCIT2024/DigiTec-ի օրերին լինել Հայաստանում, ոչ միայն այցելել կոնֆերանսի տարածք, այլ բացահայտել Հայաստանի ստարտափների էկոհամակարգը։
Տուրի մասնակիցները հոկտեմբերի 4-7-ը՝ WCIT2024/DigiTec-ի բոլոր օրերին կլինեն Երևանում։
«Ուրախ ենք, որ այսքան կարճ ժամանակահատվածում մենք ունեցանք նման մեծ հետաքրքրվածություն մեր միջազգային գործընկներիներից, որոնք մեծ ցանկություն հայտնեցին այցելել Հայաստան, ծանոթանալ այստեղի ստարտափների էկոհամակարգին և ստեղծել նոր կապեր»,- նշում է BANA Angels-ի տնօրեն Սոնա Վեզիրյանը։
Նա ընդգծում է՝ մասնակցելով իրադարձությանը՝ ներդրողները հնարավորություն կունենան այցելել Հայաստանի ամենահաջողակ տեխնոլոգիական ընկերություններից մի քանիսը, համագործակցել ձեռներեցների հետ և ուսումնասիրել տարածաշրջանի աճը խթանող նորարարական նախագծերը:
Բացի մասնագիտական ներգրավվածություններից, ներդրողների այցի ծրագրում ներառված են նաև մշակութային միջոցառումներ։ Կազմակերպիչները վստահ են՝ ներդրողներն անպայման սիրելու են Հայաստանը։
Նորարարությունների և տեխնոլոգիաների համաշխարհային կոնգրեսը (WCIT) հեղինակավոր համաշխարհային միջոցառում է, որը կազմակերպվել է ՏՏ և ծառայությունների համաշխարհային դաշինքի (WITSA) կողմից: WCIT-ը համախմբում է տեխնոլոգիայի առաջնորդներին, ոլորտի մասնագետներին, կառավարության ներկայացուցիչներին ամբողջ աշխարհից՝ ուսումնասիրելու և ձևավորելու տեխնոլոգիայի ապագան և դրա ազդեցությունը հասարակության վրա:
Ներդրողների տուրի մանրամասները՝ այստեղ։
