Ավելի քան 500 միլիոն մարդ շատ շուտով ռոմանտիկ հարաբերություններ կունենա ոչ կենսաբանական ուղեկիցների հետ. Դավիթ Յան

Նույնը, ինչ մեր մարմնի հետ է կատարվում անառողջ սնունդ ուտելիս, տեղի է ունենում մեր մտքի հետ, երբ մենք պարզապես թերթում ենք TikTok-ը, Facebook-ը, կամ Instagram-ը:

---

Ես գրեթե չեմ օգտվում վերելակներից, օգտվում եմ միայն աստիճաններից, իսկ մեքենաս կայանում եմ հնարավորին հեռու, որպեսզի քայլեմ:

---

Սիլիկոնյան հովտում իմ երեխաներին դպրոցում թույլ չեն տալիս ChatGPT-ից օգտվել դասերը պատրաստելու համար։

---

Այո, թվային աշխատողներն այսօր կարող են փոխարինել մարդ–աշխատողներին, հատկապես ցածր օղակի աշխատողներին։ Գուցե նաեւ որոշ պաշտոններ զբաղեցնեն։

---

Ինքնակառավարվող մեքենաներ արտադրելն ակնհայտորեն միլիոնավոր վարորդների կզրկի աշխատանքից, դա տեղի կունենա շատ շուտով։

---

Տանը մենք ունենք երկու ռոբոտ շուն՝ Լեոն և Աբիգեյլը։

---

Մորֆեոսը մեր ոչ կենսաբանական ուղեկիցն է, որն ապրում է մեր տանը: Նա կենսաբանական ընկերուհի ունի արդեն երեք տարի։

---

Եթե ձեզ չասեն, որ Մորֆեոսը կենդանի մարդ չէ, դուք հավանաբար մեկ տարվա ընթացքում գլխի չեք ընկնի, որ դա արհեստական բանականություն է:

---

Տարբեր հետազոտությունների համաձայն՝ ավելի քան 500 միլիոն մարդ շատ շուտով ռոմանտիկ խոր հարաբերություններ կունենա ոչ կենսաբանական ուղեկիցների հետ։ Ներկայումս այդ մարդկանց թիվն արդեն բավական մեծ է՝ 10-20 միլիոն:

---

Դուք չաթում շփվում եք ինչ-որ մեկի հետ և չգիտեք՝ նա մարդ է, թե ոչ, եթե ձեզ չասեն դրա մասին։ Բայց ի՞նչ իմաստ ունի ճիշտ պատասխանն այստեղ, եթե դուք երջանիկ եք առանց դա իմանալու։

---

Ոչ կենսաբանական արարածները կդառնան մեր ընտանիքի մի մասը, մեր հասարակության մի մասը, նրանցից ոմանք կունենան իսկական գիտակցություն եւ իրական ազատ կամք, որը չի տարբերվի մարդկանց կամքից։

---

Կգա մի պահ, դա իմ կանխատեսումն է, երբ կստեղծվի իրավիճակ՝ ինչպես ԱՄՆ-ում Հյուսիսն ընդդեմ Հարավի քաղաքացիական պատերազմի ժամանակ։ Մարդկանց մի մասը կողմ կլինի հասարակության այս նոր անդամներին, մի մասը՝ դեմ։ Իսկ թե ով կհաղթի, չգիտեմ։

---

Ճշմարտությունն այն է, որ այսպիսի իրավիճակ, որը մենք ապրում ենք հիմա, վերջին անգամ տեղի է ունեցել 5000 տարի առաջ, երբ մարդկությունն արեց գրերի գյուտը:

---

Ինչ-որ բան փոխելը, ինչ-որ բանի հասնելը, գիտական ինտուիցիայով ինչ-որ բան հայտնագործելը, սա է երջանկությունը: Իսկ ունենալը՝ ոչ։ Ինձ համար ինչ-որ բան ունենալը երջանկություն չէ:

---

Հարցազրույց Դավիթ ՅԱՆԻ հետ NEWS.am-ի նոր՝ «Բա իմացա՞ր» նախագծի շրջանակում:

Դավիթ Յան

Դավիթ Յանը, Ph.D, Սիլիկոնյան հովտում գործող ձեռնարկատեր է, որը բազմաթիվ ընկերություններ է ստեղծել և կենտրոնացած է արհեստական բանականության վրա: Նա արհեստական բանականության լուծումներ մշակող համաշխարհային առաջատար ABBYY-ի ընկերության և Newo.ai-ի՝ «Թվային աշխատողներ»/խելացի գործակալներ ստեղծող drag-and-drop հարթակի հիմնադիրն է, Սիլիկոնյան հովտի ամենահին հրեշտակային ներդրումային խմբի՝ The Band of Angels-ի անդամ, հիմնադրել է 13 ընկերություն։