Կրքեր OpenAI-ի շուրջ. ինչո՞ւ Սեմ Ալթմանը հեռացվեց աշխատանքից և ի՞նչ է սպասում նրան և ընկերությանը

ChatGPT չատբոտի մշակմամբ հայտնի OpenAI ընկերության տնօրենների խորհուրդը հանգստյան օրերին Սեմ Ալթմանին հեռացրել է ընկերության գործադիր տնօրենի պաշտոնից՝ նրան մեղադրելով «անկեղծ չլինելու մեջ»: Այժմ, սակայն, նրան ցանկանում են վերադարձնել։ Ի՞նչ է կատարվում ընկերությունում և ի՞նչ է սպասվում դրան։ Ինչո՞ւ Ալթմանը հեռացվեց աշխատանքից և ի՞նչ է նա անելու ապագայում։

Ինչո՞ւ Ալթմանը հեռացվեց աշխատանքից

Ընկերության տարածած մամուլի պաշտոնական հաղորդագրությունում ասվում է, որ Ալթմանը հեռացվել է աշխատանքից, երբ տնօրենների խորհրդի վերլուծությունը պարզել է, որ «նա հետևողական կերպով անկեղծ չի եղել տնօրենների խորհրդի հետ շփումներում, ինչը նրան խանգարում է կատարել իր պարտականությունները: Եվ տնօրենների խորհուրդն այլևս վստահ չէ, որ նա ունակ է շարունակել ղեկավարել OpenAI-ը։

Հաղորդագրությունում նաև նշվում է, որ ընկերությունը ստեղծվել է արհեստական բանականությունը զարգացնելու և մարդկությանն օգուտ բերելու համար, և ընկերությունը հավատարիմ կմնա այս առաքելությանը:

Ալթմանի պաշտոնը ժամանակավորապես զբաղեցրել է Միրա Մուրատին, որը մինչ այդ OpenAI-ի տեխնոլոգիական տնօրենն էր:

Հետաքրքիր է, որ Ալթմանին աշխատանքից հեռացնելու կարգն ինքնին միանգամայն «ոչ ստանդարտ» էր․ տնօրենների խորհուրդը նրա հետ կապվել է Google Meet-ի միջոցով և հայտնել աշխատանքից նրան ազատելու մասին: Ամենայն հավանականությամբ, դա շատ հանկարծակի է եղել անձամբ Ալթմանի համար, ում համար անմիջապես փակել են հասանելիությունն աշխատանքային էլփոստին և կորպորատիվ սարքերին: Ավելին, այս լուրը զարմացրել է նաև OpenAI-ի խոշորագույն ներդրող Microsoft-ի ղեկավարությանը։ Ըստ Bloomberg-ի աղբյուրի՝ կորպորացիայի ղեկավար Սաթյա Նադելլան «ապշել» է այս լուրից և նույնիսկ զայրացել։

Ինքը՝ Ալթմանը, իրեն աշխատանքից հեռացնելը X սոցիալական ցանցում իր մեկնաբանել է այսպես.

«Ինձ իսկապես դուր էր գալիս OpenAI-ում անցկացրած ժամանակը: Անձամբ ինձ և, հուսով եմ, աշխարհի համար դա փոխակերպումների ժամանակ էր: Ամենից շատ ինձ դուր էր գալիս նման տաղանդավոր մարդկանց հետ աշխատելը»։

Աշխատանքից ազատման պատճառների մասին նա ոչինչ չի ասել։

Որոշ աղբյուրների համաձայն՝ Սեմ Ալթմանը կոնֆլիկտներ ու տարաձայնություններ ուներ OpenAI-ի տնօրենների խորհրդի անդամների, հատկապես ընկերության համահիմնադիր և գլխավոր գիտաշխատող Իլյա Սուցկևերի հետ։ Տարաձայնությունները հիմնականում վերաբերում էին գեներատիվ արհեստական բանականության արագ զարգացման, ապրանքների առևտրայնացման և արհեստական բանականության կողմից հասարակությանը սպառնացող հնարավոր սպառնալիքների նվազեցմանն ուղղված միջոցառումներին:

Քանի որ Ալթմանի հեռացման պատճառների մասին բավարար տեղեկատվություն չկա, համացանցում ակտիվորեն տարբեր տեսություններ են կառուցվում այս մասին: Այսպիսով, ոմանք պնդում են, որ Ալթմանը տնօրենների խորհրդից թաքցրել է փաստը, որ ընկերությունն իրականում մշակել է այսպես կոչված ուժեղ արհեստական ​բանականություն (AGI), որն ունակ է մտածել, գիտակցել և ինքն իրեն ընկալել որպես անհատ: Մեկ այլ, նույնիսկ ավելի խելահեղ տեսության համաձայն, ուժեղ արհեստական բանականությունը զավթել է իշխանությունն ընկերությունում և ազատել է ղեկավարին։ Այլ օգտատերեր պնդում են, թե Ալթմանը ընկերության ղեկավարությունից թաքցրել է փաստը, որ ChatGPT-ն իրականում տասնյակ հազարավոր մարդիկ են, որոնք նստած են նկուղում և պատասխանում են արհեստական ​​բանականությանը տրվող հարցերին։

Իհարկե, այս բոլոր տեսությունները հումորային են։ Ալթմանի պաշտոնանկության իրական պատճառը, ցավոք, դեռ հայտնի չէ։

Ալթմանը մենակ չի հեռացել

Սեմ Ալթմանի աշխատանքից ազատվելուց հետո ևս մի քանի աշխատակիցներ կամավոր լքել են ընկերությունը, այդ թվում՝ երեք ավագ հետազոտողներ՝ Յակուբ Պախոցկին (հետազոտության տնօրեն), Ալեքսանդր Մադրին (գլխավորել է հավանական ռիսկերի գնահատման բաժինը) և Շիմոն Սիդորը, որն աշխատում էր ընկերությունում արդեն յոթ տարի։ Բացի դրանից, համահիմնադիր Գրեգ Բրոքմանը նույնպես լքել է տնօրենների խորհրդի նախագահի և ընկերության նախագահի պաշտոնը։

X սոցիալական ցանցի իր էջում Բրոքմանը գրել է հետևյալը.

«Ես շատ հպարտ եմ այն ​​ամենով, ինչ կառուցել ենք ութ տարի առաջ իմ տանը հիմնադրվելուց հետո: Մենք միասին անցել ենք դժվար ժամանակների և հիանալի ժամանակների միջով՝ հասնելով մեծ հաջողությունների՝ չնայած բոլոր պատճառներին, որոնք դա անհնարին դարձրին, բայց ինչպես այսօր լուրերում են հաղորդում, ես հեռանում եմ: Մաղթում եմ ձեզ ամենայն բարիք, քանի որ շարունակում եմ հավատալ անվտանգ AGI ստեղծելու առաքելությանը, որն օգուտ է բերում ողջ մարդկությանը»:

Ալթմանին փորձում են հե՞տ բերել

Ընկերության տնօրենների խորհուրդը, կարծես թե, շատ արագ զղջացել է իր որոշման համար՝ ըստ The Verge-ի՝ խորհրդի անդամները դիտարկում են Ալթմանին գլխավոր տնօրենի պաշտոնին վերադարձնելու հնարավորությունը։ Ավելին, Ալթմանն ինքը, կարծես թե, դեմ չէ դրան, սակայն ցանկանում է վերացնել ղեկավարության մեջ առկա հակասությունները։

Կա տեսակետ, որ եթե Ալթմանը չվերադառնա իր պաշտոնին, ընկերությունը կարող է պառակտվել։ Նախ, ինչպես արդեն նշվեց, շատ աշխատակիցներ հեռանում են ընկերությունից, ինչը, անշուշտ, բացասաբար կանդրադառնա նրա աշխատանքի վրա։ Բացի դրանից, բոլոր այս աշխատակիցները կարող են միանալ Ալթմանի նոր նախագծին, եթե նա ստեղծի այն։ Ընկերության ներդրողները նույնպես, կարծես, շփոթված են այս իրավիճակից. այս բոլոր խնդիրները հակասում են նրանց շահերին։

Բացի դրանից, ըստ Bloomberg-ի, 86 միլիարդ դոլար կապիտալիզացիա ունեցող OpenAI-ի բաժնետոմսերը ընկերության աշխատակիցներին վաճառելու գործարքները, որոնք պատրաստվել էին այս իրադարձություններից մի քանի շաբաթ առաջ, այժմ առնվազն օդում կախված են մնացել. ոմանք գոնե ինչ-որ որոշակիություն են ակնկալում, մինչդեռ մյուսներն արդեն հրաժարվել են բաժնետոմսեր գնելու իրենց մտադրություններից: Այս ամենի լույսի ներքո ընկերության ապագան առավել քան անորոշ է թվում։

Սեմ Ալթմանը նոր նախագի՞ծ կստեղծի

Bloomberg-ը, հղում անելով անանուն աղբյուրին, հայտնում է, որ ընկերության տնօրենների խորհուրդը մտահոգված էր Ալթմանի ձեռնարկատիրական նախագծերով։ Ըստ աղբյուրի՝ նա ցանկանում էր ստեղծել արհեստական բանականության համար արագացուցիչներ արտադրող ստարտափ, որը կարող էր մրցել NVIDIA-ի հետ: Իսկ ստարտափը ֆինանսավորելու համար նա ցանկանում էր մի քանի տասնյակ միլիարդ դոլար ներգրավել Մերձավոր Արևելքի սուվերեն հիմնադրամներից։

Ալթմանը նաև հանդիպել է ճապոնական ֆինանսական կոնգլոմերատի՝ SoftBank Group-ի գործադիր տնօրեն Մասայոշի Սոնի և Apple-ի նախկին դիզայներ Ջոնի Այվի հետ, որպեսզի քննարկի նորարարական սպառողական սարքի գործարկման բազմամիլիարդանոց նախագիծը։ Խոսքը «արհեստական բանականության ոլորտում iPhone-ի» նման սարքի մասին է:

Ամենայն հավանականությամբ, Ալթմանը, եթե, իհարկե, չվերադառնա OpenAI, կստեղծի նոր ընկերություն, որտեղ կհավաքի իր նախկին աշխատակիցներին։ Bloomberg-ի աղբյուրները վստահ են, որ մոտ ապագայում OpenAI-ում, ընկերության իսկ որոշմամբ, կրճատումների մեծ ալիք կլինի, և այդ աշխատակիցներից շատերը պատրաստակամորեն կգնան Ալթմանի մոտ աշխատելու։

Թե կոնկրետ ինչով է զբաղվելու Ալթմանի նոր նախագիծը կամ նախագծերը, դեռևս անհայտ է: Հավանաբար, նրա նոր ընկերությունը կանի նույնը, ինչ OpenAI-ը, և, հավանաբար, կկենտրոնանա արհեստական ​​բանականության արագացուցիչների և հզոր արհեստական բանականություն ունեցող սպառողական սարքի արտադրության վրա: