Իլոն Մասկը ժամանակ չի կորցնում. 44 մլրդ դոլարով Twitter-ը ձեռք բերելուց հետո 24 ժամ չանցած՝ նա որոշել է փոխել սոցցանցի գլխավոր էջը: Եվ սա միակ փոփոխությունը չէ. խոսակցություններ կան, որ սոցցանցը կարող է բարձրացնել նաև ստուգված և վերիֆիկացված էջերի ամսավճարը։
Twitter-ի նոր ղեկավարը («Chief Twit») դառնալուց հետո Մասկը ցանկացել է, որ օգտատերերը իրենց էջից դուրս գալուց հետո (log out) վերաուղղորդվեն դեպի Explore էջ, որտեղ կարող են տեսնել թրենդային թվիթներն ու նորությունները: Նախկինում, երբ այցելում էինք Twitter-ի գլխավոր էջ, համակարգից դուրս գալիս երեւում էր միայն գրանցման ձևը, որը խրախուսում էր ստեղծել հաշիվ՝ թվիթները դիտելու համար:
Մասկի գաղափարը կյանքի կոչելու համար պահանջվել է ընկերության փոխնախագահի ներգրավումը, որպեսզի չեղարկվի հոկտեմբերի 27-ին ներդրված կոդի սառեցումը: Դա արվել էր նրա համար, որ աշխատակիցները չկարողանան փոփոխություններ կատարել ծրագրային կոդում՝ ընկերության կլանման ընթացքում:
Twitter-ի աշխատակիցները, որոնք ցանկացել են անանուն մնալ, ասել են, որ նախկինում գլխավոր էջի տեսքը փոխելու որոշումը կքննարկվեր շաբաթներ շարունակ։ Հիմա դա արվեց հաշված ժամերի ընթացքում։
The Verge-ը, վկայակոչելով սեփական աղբյուրները, հայտնում է, որ Twitter-ը նախատեսում է վերիֆիկացված էջերի ամսավճարը հասցնել ամսական 19,99 դոլարի։
Ըստ հրապարակման՝ Իլոն Մասկը պատվիրել է փոխել Twitter Blue տարբերակը, որն արժե ամսական 4,99 դոլար և վերիֆիկացված օգտատերերին հասանելիություն է տալիս լրացուցիչ ֆունկցիաների: Այժմ նրանք ստիպված են լինելու ամսական ավելի շատ վճարել։ Եթե 90 օրվա ընթացքում նրանք չգրանցվեն նոր բաժանորդագրության համար, կկորցնեն իրենց կապույտ նշանը, որը ցույց է տալիս, որ նրանք վերիֆիկացված օգտատեր են:
Կիրակի Twitter-ի որոշ աշխատակիցների տեղեկացրել են, որ նրանք պետք է գործարկեն նոր գործառույթը մինչև նոյեմբերի 7-ը, հակառակ դեպքում կազատվեն աշխատանքից։
Ավելի վաղ Twitter-ի իր էջում Մասկը հայտնել էր, որ վերիֆիկացիայի ողջ գործընթացը ներկայումս վերանայվում է, սակայն մանրամասներ չէր հայտնել։
Ավելի վաղ ասվում էր, որ Մասկը նախատեսում է կրճատել ընկերության աշխատակիցների երեք քառորդը, օպտիմալացնել ընկերության՝ իր կարծիքով ուռճացված ՏՏ ենթակառուցվածքը և զգալիորեն նվազեցնել դրա ծախսերը։ Սակայն անձամբ Մասկը, գնման գործարքի նախօրեին այցելելով ընկերության գլխամասային գրասենյակ, խոստացել է չհեռացնել աշխատակիցների 75%-ին։ Այնուամենայնիվ, առաջին օրը նա աշխատանքից ազատել է Twitter-ի գործադիր տնօրեն Պարագ Ագրավալին, ֆինանսական տնօրեն Նեդ Սեգալին և իրավական քաղաքականության, վստահության և անվտանգության բաժնի ղեկավար Վիջայա Գադեին:
Մասկը նաև վերջերս հարցում է հրապարակել, թե արդյոք պետք է վերադարձնել Vine հավելվածը, որը թույլ է տալիս ստեղծել կարճ` վեց վայրկյանանոց տեսանյութեր: Ընդամենը մի քանի ժամում հարցմանը մասնակցել է ավելի քան 2,2 միլիոն օգտատեր, իսկ մեծամասնությունը քվեարկել է ծառայության վերադարձի օգտին, որը փակվել է 2016 թ․։
Ինչ վերաբերում է այլ փոփոխություններին, սպասվում է, որ Twitter-ը կդադարեցնի օգտատերերի մշտական արգելափակումը։ Մասկը նախատեսում է ստեղծել հատուկ խորհուրդ, որը կուսումնասիրի մոդերացիայի հարցը։
Նաեւ նշվում է, որ Մասկը ծրագրում է Twitter-ի հենքի վրա ստեղծել սուպերհավելված, որը նման է չինական WeChat-ին, որը ունիվերսալ ծառայություն է եւ միավորում է Facebook-ի, Twitter-ի, Instagram-ի, Substack-ի և Uber-ի հնարավորությունները: Ինքը՝ Մասկը, իր գաղափարը, որը պայմանականորեն կոչվում է «X», անվանում է «հավելված ամեն ինչի համար»։
ամիս
շաբաթ
օր