Ո՞ր մասնագիտություններին են ավելի շատ սպառնում նեյրոցանցերը

Գրասենյակային աշխատողները արհեստական բանականությամբ փոխարինելու համար աշխատողների ամենահարմար կատեգորիան են։ Այս մասին ասվում է Աշխատանքի միջազգային կազմակերպության (ԱՄԿ) պաշտոնական կայքում հրապարակված նոր զեկույցում։

Հետազոտության համաձայն՝ գրասենյակային աշխատողների առաջադրանքների մոտ 25%-ը կարող է ամբողջությամբ ստանձնել գեներատիվ արհեստական ​բանականությունը։ Այն կարող է մասամբ հաղթահարել առաջադրանքների կեսը։ Այս համատեքստում նեյրոնային ցանցերն ավելի քիչ են սպառնում ղեկավար կազմին. դրանք կարող են մասամբ հաղթահարել նրանց առաջադրանքների մեկ քառորդը միայն:

ԱՄԿ-ն կարծում է, որ արհեստական բանականության ազդեցությունը գրասենյակային աշխատողների զբաղվածության վրա հավանաբար կարտահայտվի ոչ թե աշխատատեղերի վերացման, այլ դրանց վերափոխման տեսքով։ Հավանական է, որ կնվազի աշխատանքի ինտենսիվությունը, բայց միևնույն ժամանակ կաճի աշխատողների ինքնավարությունը։

Հետազոտությունը նաև ցույց է տվել, որ բարձր եկամուտ ունեցող զարգացած երկրներում արհեստական բանականությունն ազդում է աշխատատեղերի միայն 5,5%-ի վրա։ Ցածր եկամուտ ունեցող երկրներում այս ցուցանիշը կազմում է 0,4%:

Զեկույցում նաև ասվում է, որ գրասենյակային աշխատողների ոլորտում գեներատիվ արհեստական բանականության պոտենցիալ ազդեցությունը, ամենայն հավանականությամբ, զգալիորեն կտարբերվի տղամարդկանց և կանանց համար․ կանանց վրա աշխատանքի ավտոմատացումը երկու անգամ ավելի շատ կազդի, քանի որ կանայք այս ոլորտում կրկնակի շատ են տղամարդկանցից։

Ուսումնասիրությունը եզրակացնում է, որ գեներատիվ արհեստական բանականության սոցիալ-տնտեսական ազդեցությունը մեծապես կախված կլինի նրանից, թե ինչպես է կառավարվում դրա տարածումը: Ըստ զեկույցի՝ անհրաժեշտ է մշակել այնպիսի քաղաքականություն, որը կաջակցի կանոնավոր, արդար և խորհրդակցության միջոցով անցմանը մարդուց դեպի արհեստական բանականություն:

«Աշխատողների ձայնը, հմտությունները և համապատասխան սոցիալական պաշտպանվածությունը առանցքային կլինեն անցումը կառավարելու համար: Հակառակ դեպքում վտանգ կա, որ նոր տեխնոլոգիայից կշահեն միայն մի քանի, լավ պատրաստված երկրներ և շուկայի մասնակիցներ»,- ասվում է զեկույցում: