Հայկական ArmSat-1 արբանյակն առաջիկայում կսկսեն ղեկավարել մասնագետները Հայաստանից։ Այս մասին Ազգային ժողովի մշտական հանձնաժողովների համատեղ նիստի ժամանակ ասաց բարձր տեխնոլոգիական արդյունաբերության նախարար Ռոբերտ Խաչատրյանը։
Նախարարի խոսքով՝ արբանյակի կառավարման կենտրոնը, որը խոստացվել էր բացել մինչև տարեվերջ, գրեթե պատրաստ է և սարքավորված։
«Սպասում ենք, որ մոտակա ամիսներին ընդունիչ կայանը նաև կստանանք։ Այժմ արբանյակն արդեն կարող է երկրից հրամաններ ստանալ հայկական կենտրոնից։ Տեղացի մասնագետները, որոնք պետք է կառավարեն այն, վերապատրաստվում են արտերկրում»,- ասաց Խաչատրյանը։
Առայժմ արբանյակը վերահսկում է իսպանական «Սատլանտիս» ընկերությունը, որն այս արբանյակը կառուցել է Հայաստանի պատվերով։
«Դրանից արդեն տվյալներ են ստացվում, և արհեստական բանականության միջոցով պատկերների մշակման ոլորտում մասնագիտացած հայկական ընկերությունները սկսել են կապ հաստատել նախարարության հետ»,- ասաց նախարարը։
Հայաստանի առաջին արբանյակ «ArmSat-1»-ը տիեզերք է արձակել 2022-ի մայիսի 25-ին՝ ԱՄՆ Կանավերալի հրվանդանում գտնվող տիեզերակայանից՝ «SpaceX» ընկերության տիեզերանավով: Արբանյակի արձակումը տեղի է ունեցել հայկական պետական «Գեոկոսմոս» և իսպանական «Սատլանտիս» ընկերությունների համագործակցության շրջանակում։
«ArmSat-1»-ը պատկանում է CubeSats 16U փոքր արբանյակների դասին։ Նման սարքերը կշռում են ընդամենը 15,5 կգ։ Արբանյակը համալրված է iSIM-90 մոնիտորինգի սարքով, որը մշակվել է Բասկերի երկրի Լայոայի համալսարանի գիտական պարկում և կարող է 500 կիլոմետր բարձրությունից դիտել մինչև 1,65 մետր չափի առարկաներ։ Սարքն աշխատում է չորս սպեկտրային տիրույթում և կարող է ստանալ 26 կմ լայնությամբ պատկերներ։ Ultra-High Pixel (UHP) տեխնոլոգիան հնարավորություն կտա երկու-երեք անգամ բարելավել ստացված պատկերները։
ՀՀ պաշտոնյաները հայտնել են, որ արբանյակից ստացված տվյալները հասանելի կլինեն միայն Հայաստանին և կօգտագործվեն ինչպես սահմանային իրավիճակի մոնիտորինգի, այնպես էլ արտակարգ իրավիճակների կանխարգելման և վերացման, շրջակա միջավայրի պաշտպանության, քաղաքաշինության, ճանապարհաշինության, երկրաբանության և այլն նպատակների համար։ Ակնկալվում է, որ արբանյակը մեզ տվյալներ կտրամադրի առնվազն չորս տարի։
ամիս
շաբաթ
օր