NASA-ի 10 միլիարդ դոլար արժողությամբ James Webb տիեզերական աստղադիտակը տիեզերք է դուրս բերվել 2021 թ․ դեկտեմբերի 25-ին Ֆրանսիայից։ Սպեկտրի ինֆրակարմիր տիրույթում աշխատող աստղադիտակը 2022 թ․ հունվարի 24-ին ժամանել է իր նոր տիեզերական «տուն»՝ Լագրանժի կետ 2 կոչվող տարածք և այդ պահից ի վեր տիեզերքից հիասքանչ տեսարաններով լուսանկարներ է ուղարկում Երկիր: Ստորև ներկայացնում ենք դրանցից մի քանիսը։
Լուսանկարում Արարման սյուներն են, որոնք փոշու և գազի ամպեր են։ Արարման սյուները գտնվում են Օձեր համաստեղությունում՝ Երկրից մոտ 7000 լուսատարի հեռավորության վրա, և Արծվի միգամածության մասն են կազմում: Նախկինում դրանք լուսանկարել է նաև Hubble աստղադիտակը, սակայն իրենց դետալներով այդ լուսանկարներն էապես զիջում են James Webb-ի լուսանկարներին։
Լուսանկարում Պանդորայի կլաստերն է, որը գտնվում է Երկրից մոտ 3,5 միլիարդ լուսատարի հեռավորության վրա։ Լուսանկարն արվել է James Webb-ի ինֆրակարմիր սպեկտրի մերձակա տիրույթում աշխատող NIRCam տեսախցիկով, որն աննախադեպ մանրամասներ է ֆիքսում։ Կիրառվել է նաև James Webb-ի Ultradeep NIRSpec սարքը։
Սա Նեպտունի առաջին լուսանկարն է, որն արել է James Webb-ը։ Պատկերում տպավորիչ մանրամասներով երևում են սառցե հսկայի շուրջն առկա օղակները: Վերջին 32 տարվա մեջ սա Նեպտունի լավագույն պատկերն է համարվում։ Նեպտունի հարավային կիսագնդի պայծառ բծերը մեծ բարձրության վրա գտնվող սառցե ամպեր են, որոնք արտացոլում են արևի լույսը նախքան այն կկլանի ամպերում առկա մեթանը։
2022 թ․ սեպտեմբերի 26-ին NASA-ի DART զոնդը հարվածեց Դիդիմը աստերոիդի շուրջը պտտվող Դիմորֆ աստերոիդին՝ դրա ուղեծիրը փոխելու համար: James Webb-ը հետևել է այս առաքելությանը և մի շարք լուսանկարներ արել, որոնք ցույց են տալիս, թե ինչպես է Դիդիմը-Դիմորֆ աստերոիդների համակարգը պայծառացել հարվածից հետո։
Wolf-Lunmark-Melotte անունով միայնակ գաճաճ գալակտիկայի այս աստղազարդ պատկերն ստացվել է James Webb-ի մերձակա ինֆրակարմիր տիրույթի տեսախցիկով: Այն հետաքրքիր է աստղագետների համար, քանի որ ամենահեռավոր անդամներից է տեղական գալակտիկաների խմբի, որում գտնվում է նաև Ծիր Կաթին գալակտիկան:
Հետևեք NEWS.am Tech-ին Facebook-ում և Twitter-ում