Հայաստան է գալիս միկրոչիպեր արտադրող, $50 մլրդ կապիտալիզացիա ունեցող Microchip Technology ընկերությունը

Հայաստան է գալիս միկրոչիպերի արտադրությամբ զբաղվող և մոտ 50 մլրդ դոլար շուկայական կապիտալիզացիա ունեցող ամերիկյան Microchip Technology ընկերությունը, այս մասին Հանրային հեռուստաընկերության եթերում ասել է էկոնոմիկայի նախարար Վահան Քերոբյանը։

Նախարարը տեղեկացրել է, որ երկու տարի առաջ Microchip Technology ընկերությունը նախնական պայմանավորվածություն էր ձեռք բերել Instigate ընկերությունների խմբի հետ, որպեսզի իրենք Հայաստանում համատեղ թիմ ստեղծեն, և Instigate-ը հաջողությամբ կատարել է աշխատանքը՝  ընկերության ներսում ստեղծված դպրոցի, իրենց ընկերությունում ձևավորված նոու-հաուի շնորհիվ։

Microchip Technology ընկերությունը հիմնադրվել է 1989-ին։  2021-ի տվյալներով ընկերությունն ունի 19,500 աշխատող, հասույթը կազմել է 8 մլրդ դոլար, իսկ զուտ շահույթը՝ 349.4 մլն դոլար։ Ընկերության կենտրոնական գրասենյակը տեղակայված է ԱՄՆ Արիզոնա նահանգի Չանդլեր քաղաքում։

Վահան Քերոբյանը հիշեցրել է, որ անցած տարի Հայաստան է եկել միկրոչիպերի արտադրության ոլորտի խոշարագույն խաղացողներից NVIDIA ընկերությունը, որը Հայաստանում արդեն 100-ից ավելի աշխատող ունի։ Հայաստան է եկել նաև միկրոչիպերի աշխարհի առաջատար ընկերություններից AMD-ն, որը INTEL-ի ուղիղ մրցակիցներից է։

Վահան Քերոբյանը նաև հաստատել է տեղեկությունները, որ Հայաստան է գալիս նաև հայտնի Shell ընկերությունը, որն այս տարվա մարտին Հայաստանում կբացի երեք ժամանակակից բենզալցակայան։

Նախարարը նշել է, որ բավական բարդ է եղել ընկերությանը Հայաստանը բերելը, սակայն Հայաստանի համար կարևոր է, որպեսզի երկիր գան աշխարհի թոփ 500 ընկերությունները՝ իրենց հետ գիտելիքներով, իրենց նոու-հաուով, ինչը կօգնի Հայաստանում պատրաստել բարձրակարգ մասնագետներ, կատարել աշխարհի համար կարևոր գիտահետազոտական աշխատանքներ, ինչը կբերի մեր տնտեսության արտադրողականության, նորարարությունների աճին։