Նախընտրելի
Telegram-ը մեծ թարմացում է ստացել, որն առաջարկում է մի շարք երկար սպասված գործառույթներ: Այժմ տեսահոլովակ նվագարկելիս ավտոմատ կընտրվի տեսանյութի օպտիմալ որակը՝ կախված ինտերնետ կապի արագությունից: Խմբերի և ալիքների սեփականատերերը կարող են օգտվել հեշթեգերի նոր ձևաչափից, իսկ բոտերն ու մինի հավելվածները կարող են եկամուտ ստանալ գովազդից։ Նաև խմբագրման միջոցով այժմ հնարավոր է լուսանկար ավելացնել արդեն ուղարկված հաղորդագրությանը:
Telegram-ը ներկայացրել է տեսանյութի որակի ընտրության համակարգ, որն ավտոմատ կերպով հարմարվում է յուրաքանչյուր օգտատիրոջ ինտերնետ կապի արագությանը. եթե կապը դանդաղ է, հավելվածը կընտրի տեսանյութի սեղմված տարբերակը, իսկ եթե արագ է, ապա այն կառաջարկի առավելագույն որակ։ Բացի դրանից՝ հնարավոր կլինի ընտրել տեսանյութի որակի մակարդակը (ցածր, միջին կամ բարձր):
Ալիքների սեփականատերերն այժմ կարող են ավելի բարձր որակով տեսանյութեր հրապարակել, որոնք կպահվեն սեղմման մի քանի տարբերակներով, ինչը կբարելավի բովանդակության հասանելիությունը տարբեր որակի կապ ունեցող օգտատերերի համար։ Նաև հեշտացվել է Picture in Picture ռեժիմ մուտք գործելը iOS սարքերի համար՝ այժմ այն ակտիվանում է պարզապես տեսանյութը վերև սահեցնելով:
Telegram-ը նաև ավելացրել է տեսահոլովակների նվագարկման արագությունը կառավարելու հնարավորություն՝ օգտագործելով նոր ժեստերը։ Այժմ օգտատերերը կարող են արագացնել տեսանյութերը մինչև 1,5 անգամ՝ պարզապես մատը պահելով էկրանի աջ կողմում: Դեպի աջ մատը սահեցնելը կմեծացնի արագությունը մինչև 2,5 անգամ: Իսկ մատը թողնելու դեպքում, տեսանյութը կվերադառնա նվագարկման նորմալ արագության:
Խմբերի և ալիքների սեփականատերերը հեշթեգերով աշխատելու նոր հնարավորություն ունեն։ Այժմ նրանք կարող են օգտագործել #hashtag@username ձևաչափը, որը սեղմելիս կցուցադրվեն գրառումներն ու պատմությունները միայն նշված չատից՝ հեշտացնելով նավիգացիան ու որոնումը առանձին չատերում և ալիքներում:
Բացի դրանից՝ Telegram-ն ընդլայնել է բոտեր և մինի հավելվածներ ստեղծողների հնարավորությունները։ Բովանդակություն ստեղծողները և մշակողները եկամտի 50%-ը կկարողանան ստանալ պաշտոնական գովազդից, որը ցուցադրվում է իրենց բոտերում և ալիքներում: Նաև հաղորդագրությունների թիվը, որոնք բոտերը կարող են անվճար ուղարկել, ավելացվել է մինչև վայրկյանում 30, իսկ հավելավճարով՝ մինչև 1000 հաղորդագրություն վայրկյանում։
Փոփոխություններ են տեղի ունեցել նաև արձագանքների հետ փոխազդեցության մեջ։ Օգտատերերը կկարողանան հետևել արձագանքների թվին: Դա անելու համար պարզապես պետք է սեղմել և պահել արձագանքների հաշվիչի վրա՝ տեսնելու մնացած արձագանքների կամ Telegram Stars-ի ճշգրիտ թիվը:
