Չինացի տիեզերագնացներ Յե Գուանգֆուն և Լի Գուանգսուն մայիսի 28-ին 8,5 ժամ են անցկացրել բաց տիեզերքում՝ սահմանելով նոր ռեկորդ Չինաստանի համար։

Դա առաջին տիեզերական զբոսանքն է եղել «Շենչժոու 18» վեցամսյա առաքելության ընթացքում, որը «Տիանգոնգ» տիեզերակայան էր ժամանել այս տարվա ապրիլի վերջին։

Բաց տիեզերքում եղած ժամանակ չինացի տիեզերագնացները տեղադրել են տիեզերական աղբի դեմ պաշտպանիչ սարք և ստուգել կայանից դրսի հատվածի սարքավորումներն ու համակարգերը:

Տիեզերական աղբը Չինաստանի տիեզերական ծրագրի համար լուրջ խնդիր է դառնում: Վերջերս  «Տիանգոնգ» տիեզերակայանը մասամբ հոսանքազրկվել էր այն բանից հետո, երբ տիեզերական աղբի բեկորները վնասել էին դրա արևային մարտկոցները։

Տիեզերական այս զբոսանքն առաջինն էր Լի Գուանգսուի համար, և երկրորդը՝ Յե Գուանգֆուի համար, որը նախկինում բաց տիեզերք դուրս էր եկել «Շենչժոու 13» առաքելության ժամանակ 2021-ի դեկտեմբերին։ «Շենչժոու 1»-ի անձնակազմի երրորդ անդամը՝ Լի Կոնգը, աջակցություն է ցուցաբերել կայանի ներսից՝ վերահսկելով տիեզերագնացների գործողությունները բաց տիեզերքում:

«Շենչժոու-18» առաքելության շրջանակում նախատեսվում է անցկացնել մի շարք գիտական ​​փորձեր ու փորձարկումներ, ինչպես նաև մի քանի լրացուցիչ տիեզերական զբոսանքներ։

2008-ից ի վեր մինչ օրս չինացի տիեզերագնացները 16 զբոսանք են կատարել բաց տիեզերքում։  Չժայ Չժիգանգն այդ ժամանակ դարձավ առաջին չինացի տիեզերագնացը, որը քայլեց տիեզերանավից դուրս տարածքում:

Խորեն Գրիգորյան