Նախընտրելի
ՀՀ բարձր տեխնոլոգիական արդյունաբերության նախարարության և Հնդկաստանի Հանրապետության էլեկտրոնիկայի և տեղեկատվական տեխնոլոգիայի նախարարության միջև ստորագրվել է Թվային փոխակերպումների համար բնակչության մասշտաբով իրականացված հաջող թվային լուծումների փոխադարձ տրամադրման ոլորտում համագործակցության մասին փոխըմբռնման հուշագիր:
Հուշագիրը ստորագրել են հունիսի 12-13-ն աշխատանքային այցով գտնվող ՀՀ բարձր տեխնոլոգիական արդյունաբերության նախարարի առաջին տեղակալ Գևորգ Մանթաշյանը և Հնդկաստանի Հանրապետության էլեկտրոնիկայի և տեղեկատվական տեխնոլոգիայի նախարարության գլխավոր քարտուղար Ալկեշ Կուար Շարման: 
Փաստաթուղթը ստորագրվել է Հնդկաստանի Պունի քաղաքում G20 Digital Economy Working Group-ի հանդիպման շրջանակում անցկացվելիք «Գլոբալ թվային հանրային ենթակառուցվածք գագաթնաժողովի» (Global Digital Public Infrastructure (DPI) Summit) շրջանակում։
Ստորագրված փաստաթղթով կողմերն արտահայտում են իրենց պատրաստակամությունը՝ ընդլայնելու համագործակցությունը երկու երկրների միջև ինստիտուցիոնալ համագործակցության խթանման, տեխնիկատնտեսական հիմնավորման, արդիականացման գնահատման և թվային փոխակերպման լուծումների իրականացման ոլորտներում:
Գագաթնաժողովին նախարարի առաջին տեղակալ Գևորգ Մանթաշյանը հանդես է եկել ելույթի խոսքով, որում մասնավորապես նշել է.
«Այժմ մենք քննարկում ենք կարևոր թվային հանրային ենթակառուցվածքները և դրանց կարևորությունը այն մարդկանց համար, որոնք կիրառում են դրանք: Մենք բոլորս պատմական ժամանակաշրջանում ենք ապրում, որտեղ մասնակից ենք տեխնոլոգիաների ստեղծմանը, որոշ ժամանակ անց, միգուցե, այս տեխնոլոգիաները ինքնուրույն ստեղծեն իրենց տեխնոլոգիաները և սեփական լեզուն:
Այստեղ են երկրներ, որոնք ունեն արհեստական բանականության ազդեցության դրական և բացասական փորձառություն: Եվ սա լավ առիթ է երկրների միջև ստեղծելու կոալիցիա՝ տեխնոլոգիաները կարգավորելու համար, և հարկ եմ համարում նշել, որ այո՛, մենք ցանկանում ենք կարգավորել տեխնոլոգիաների կիրառությունը, բայց միևնույն ժամանակ չսահմանափակել դրանց զարգացումը և աճը:
Ես տպավորված եմ, թե ինչպես են Հնդկաստանում, կիրառելով տեխնոլոգիաները, պայքարում աղքատության դեմ և ապահովում որակյալ ենթակառուցվածքների հասանելիությունը: Սա լավ օրինակ է, թե ինչպես պետք է աշխատենք և ինչի վրա կենտրոնանանք: Լիահույս եմ, որ միավորելով մեր ուժերը՝ կկարողանանք ստեղծել տեխնոլոգիաներ, որոնք կարող են նպաստել մարդկության կենսակերպի բարելավմանը»:
Գագաթնաժողովի շրջանակներում Գևորգ Մանթաշյանը հանդիպումներ կունենա Հնդկաստանի պետական և մասնավոր հատվածի ներկայացուցիչների հետ, քննարկումներ կլինեն միջոցառմանը ներկա տարբեր պետությունների մասնակիցների միջև:
«G20»-ում Հնդկաստանի նախագահության տարում Գագաթնաժողովը մեկ հարկի տակ է հավաքվել «G20»-ի անդամներին, հրավիրված երկրների, միջազգային կազմակերպությունների հայտնի փորձագետների, քաղաքականություն մշակողների և պրակտիկ մասնագետների, որոնք աշխատում են թվային կառավարման ոլորտում՝ կիսելու իրենց փորձը, ինչպես նաև ընդունելու թվային հանրային ենթակառուցվածքը՝ համաշխարհային թվային տնտեսությունը բարելավելու համար: Այն համահունչ է «G20»-ի «Մեկ երկիր, մեկ ընտանիք և մեկ ապագա» թեմային: Գագաթնաժողովի շրջանակում տեղի կունենա նաև համաշխարհային թվային հանրային ենթակառուցվածքների ցուցահանդեսը, որտեղ «G20»-ի անդամները և հրավիրված երկրները կցուցադրեն իրենց բնակչության մասշտաբի թվային հանրային ենթակառուցվածքների մասին տեղեկություն։
