Նախընտրելի
Երևանում այսօր՝ ապրիլի 5-ին, մեկնարկել է առաջին «Doing Digital - Բացահայտելով թվային ապագան» խորագրով ֆորումը, որի հիմնադիրն ու կազմակերպիչը SPRING PR ընկերությունն է, համակազմակերպիչը՝ «Ամերիաբանկ»-ը:
Միջոցառման նպատակն է ներկայացնել թվային փոխակերպման վերջին միտումներն ու լավագույն փորձը, համաշխարհային տեխնոլոգիական և բիզնես հանրույթի շրջանում Հայաստանը դիրքավորել որպես թվային փոխակերպման նոր հարթակ՝ նպաստելով երկրի մրցունակության բարձրացմանը:
Բացման խոսքով նախ հանդես եկավ «Ամերիաբանկ»-ի տաղանդների և ծառայությունների գծով տնօրեն Արմինե Ղազարյանը։ Վերջինս նշեց, որ թվային փոխակերպումն անդադար գործընթաց է, այն երբեք չի ավարտվում: Նա ընդգծեց, որ տեխնոլոգիաները բավարար չեն, տեխնոլոգիաների հիմքում մարդն է, և եթե մարդիկ իմանան «ինչո՞ւ» հարցի պատասխանը, ապա նրանք հաստատ կգտնեն նաև «ի՞նչ» և «ինչպե՞ս» հարցերի պատասխանները:
Այնուհետև բացման խոսքով հանդես եկավ ՀՀ փոխվարչապետ Մհեր Գրիգորյանը, որը նշեց, որ նման միջոցառումները կարևոր նշանակություն ունեն առնվազն կառավարության տեսանկյունից:
«Ուրախ եմ տեսնել Doing Digital ֆորումի անցկացումը Հայաստանում նման հագեցած օրակարգով՝ թվային և տեխնոլոգիական ոլորտը ներկայացնող ականավոր հյուրերի ու խոսնակների մասնակցությամբ: Վերջին տարիներին մեր երկրում տեխնոլոգիական խորագրով անցկացվող միջոցառումների ինտենսիվացումն ինքնին ցուցիչ է, որ ՀՀ տնտեսական ու հանրային կյանքում թվային փոխակերպումը գերակայող օրակարգ է դարձել:
Թվային ապագան պետք է իրականություն դառնա հենց քաղաքացիների ու մասնավոր հատվածի էական դերակատարությամբ: Պետությունը ջանքեր է գործադրելու բաց և հասանելի տվյալների քաղաքականություն ներդնելու, կրիտիկական ենթակառուցվածքներ, խաղի կանոններ, նպաստավոր և անվտանգ միջավայր ձևավորելու գործում: Սա է կառավարության հիմնարար մոտեցումը թվային բարեփոխումների իրականացման գործում»,- ասաց Մհեր Գրիգորյանը:
Փոխվարչապետն ընդգծեց, որ կառավարությունը հաստատել և հանրության դատին է ներկայացրել թվային հասարակության և տնտեսության տեսլականն ու ինը գլխավոր թիրախները։
«Թիրախները շեշտադրում են հետևյալ սկզբունքները. բոլոր քաղաքացիները հասանելիություն են ունենալու թվային նույնականացման լուծումներին և դրա համար ուղղակիորեն չեն վճարելու: Քաղաքացիները, տնտեսվարողները պետական համակարգին տվյալները տրամադրելու են «միայն մեկ անգամ» սկզբունքով: Պետության կողմից մատուցվող ծառայությունները նախագծվելու են կյանքի իրավիճակների շուրջ: Մեր համոզմամբ, թվայնացման ոլորտում ներդրումները հանգեցնելու են հասարակության, տնտեսության և կառավարության փոխակերպմանը: Թվային տնտեսության դարաշրջանում հասարակության առաջընթացի գրավականն առաջին հերթին վստահության միջավայրը, միտքն ու նորարարությունն են, ինչի ներուժը Հայաստանը վստահաբար ունի»,- ընդգծեց Մհեր Գրիգորյանը:
Հայաստանի կենտրոնական բանկի նախագահ Մարտին Գալստյանն իր ելույթում ասաց, որ թվային տնտեսությունը փոխում է մեր կենսակերպը, բիզնես անելու եղանակները, և բոլորի պես մենք էլ ենք հետևում տեխնոլոգիական զարգացման արագ տեմպերին:
«Հույս ունենք, որ արագընթաց տեխնոլոգիական բեկումները թույլ կտան մեր հասարակությանն ավելի արդյունավետ ու ավելի բարգավաճ լինել: Իսկ զգուշավորությունը բխում է նրանից, որ այն կարող է խլել մարդկանց աշխատանքը և ամբողջ աշխարհը մեր ձեռքից: Մարդկանց նկատմամբ գերհսկողությունը կարող է հանգեցնել բարդ գործիքների կիրառման՝ առանց պատշաճ կարողունակությունների ստուգման: Եթե այս ամենը պատշաճ չկառավարվի, այն բաշխման սարսափելի հետևանքներ կունենա, որովհետև ընդամենը մի քանիսը կկարողանան տեխնոլոգիական առաջընթացից օգտվել»,- ասաց նա:
Մարտին Գալստյանի խոսքով՝ ԿԲ-ի կողմից ուշադրության արժանի երեք հիմնական կետերը հետևյալն են՝
- Մասնավոր հատվածի հետ համագործակցություն,
- Ենթակառուցվածքների ստեղծում, ինչը թույլ կտա ընկերություններին և տնային տնտեսություններին ավելի արդյունավետ լինել,
- Տվյալներ։
ԿԲ նախագահի խոսքով, Հայաստանը ներդրումներ է անում իր կիբեռանվտանգության կարողություններում և՛ համակարգերի, և՛ գործընթացների մասով։ «Մենք նախաձեռնել ենք մեր վճարային ենթակառուցվածքների վիճակի գնահատում: Մեր նպատակն է էլ ավելի ամրապնդել համակարգերը: Մենք այստեղ քննարկում ենք ծառայություն մատուցողներին ավելի մեծ դերակատարություն տալու և ռիսկերին դիմակայելու հնարավորություններ ընձեռելու հարցերը»,- ընդգծեց նա:
Նշենք, որ Doing Digital ֆորումի գլխավոր խոսնակը թվային փոխակերպումների և ֆինթեքի միջազգային փորձագետ Քրիս Սքիներն է, ով այսօր տեխնոլոգիաների և ֆինանսական շուկաների ամենաազդեցիկ մասնագետներից ու ամենավաճառվող հեղինակներից մեկն է աշխարհում: Քրիս Սքիները նաև The Finanser խորհրդատվական ընկերության հիմնադիրն է, ֆինանսական տեխնոլոգիաների և բանկային գործունեության վերաբերյալ մի շարք գրքերի հեղինակ, այդ թվում՝ «Digital Human», «Digital Bank», «The Future of Banking», «ValueWeb»:
Սքիները որպես գլխավոր խոսնակ է հանդես գալիս ֆինթեքի առաջատար միջազգային համաժողովների ու միջոցառումների ժամանակ, ներկայացնում իր մոտեցումները ոլորտի վերջին զարգացումների և թվային փոխակերպումների ապագայի վերաբերյալ: Doing Digital ֆորումը նրան Հայաստանում հյուրընկալելու և ունկնդրելու բացառիկ հնարավորություն է ընձեռում:
Ֆորումի շրջանակում ելույթների ու պանելային քննարկումների միջոցով բիզնեսի ու թվային տեխնոլոգիաների ոլորտում լավագույն փորձով, իրենց գիտելիքով և տեսլականով կկիսվի նաև ավելի քան 15 խոսնակ Սինգապուրի սոցիալական գիտությունների համալսարանից ու Forbes-ից, Visa, Apricot Capital, Revytech, Hexens, Beta Financial Technologies, ICDT Global ընկերություններից, ինչպես նաև ՀՀ կառավարությունից, SPRING PR ու «Ամերիաբանկ» ընկերություններից։
Doing Digital ֆորումի խոսնակները կպատմեն, թե ինչպես թվային փոխակերպումները ծառայեցնել բիզնեսի աճին, նոր տեխնոլոգիաների կիրառմամբ հասնել մրցակցային առավելության, կխոսեն տվյալների պաշտպանության և կիբեռանվտանգության ռիսկերի կառավարման ու թվային փոխակերպման հաջողված նախաձեռնությունների մասին։ Անդրադարձ կլինի նաև կրիպտոարժույթներին, Metaverse-ին, NFT-ին, եկամտի հնարավոր աղբյուրներին և դրանց առնչվող ռիսկերին։
Doing Digital ֆորումը բոլոր նրանց համար է, ովքեր հետաքրքրված են թվային փոխակերպմամբ, դրա ներդրմամբ ու թվային տնտեսության զարգացմամբ, այդ թվում՝ բիզնեսի առաջնորդներ, ՏՏ մասնագետներ, ստարտափներ, ներդրողներ և վենչուրային կապիտալիստներ, PR-ի, մարքեթինգի ու վաճառքի մասնագետներ, պետական կառույցների աշխատակիցներ և այլն:
Միջոցառման ինովացիոն գործընկերը Visa ընկերությունն է, ներդրումային գործընկերը՝ Apricot Capital-ը, ինֆորմացիոն գործընկերը՝ NEWS.am Tech-ը:
