Մասկը «պատերազմ» է հայտարարել գովազդատուներին, որոնք բոյկոտում են X-ը

Ամերիկացի ձեռներեց Իլոն Մասկին պատկանող X սոցցանցը դատի է տվել Global Alliance for Responsible Media-ին (GARM, բրենդերի և գովազդային գործակալությունների ասոցիացիա), ինչպես նաև Գովազդատուների համաշխարհային ֆեդերացիային՝ X սոցցանցը «համակարգված ապօրինաբար բոյկոտելու» համար, ասել է X-ի գլխավոր տնօրեն Լինդա Յակկարինոն։

Մասկը X-ում գրել է. «Երկու տարի մենք փորձեցինք խաղաղություն, հիմա պատերազմ է»։ Նա խորհուրդ է տվել, որ յուրաքանչյուր ընկերություն, որը «գովազդատուների կողմից համակարգված բոյկոտի» է ենթարկվում, օրինական միջոցներ ձեռնարկի:

Ի լրումն ասոցիացիաների, դատական ​​հայցեր են ներկայացվել նրանց առանձին անդամների դեմ, որոնց թվում Financial Times-ը նշում է Unilever և Mars ընկերությունները, ինչպես նաև ամերիկյան CVS Health դեղատների ցանցը: Յակկարինոյի խոսքով՝ ընկերությունների գործողություններից տուժել են ոչ միայն սոցցանցը, այլև դրա օգտատերերը։

«Բոլոր այս գործողությունները հակասում էին գովազդատուների միակողմանի շահերին. տնտեսական առումով դրանք իմաստ ունեն միայն առաջ մղելու դավադրությունը, որն իրականացվել է այն համոզմունքով, որ մրցակից գովազդատուները նույնն են անում»,- ասվում է բողոքում, որի տեքստը մեջբերում է Axios-ը:

Ինչպես նշում է Financial Times-ը, X-ը հայցը ներկայացրել է այն բանից հետո, երբ հանրապետականների գլխավորած Ներկայացուցիչների պալատի դատական ​​հանձնաժողովը հրապարակել էր զեկույց, որից պարզ էր դառնում, որ GARM-ը և նրա անդամները «պայմանավորվել են» բոյկոտել Twitter-ը Մասկի կողմից այն գնելուց հետո՝ սահմանափակելով սպառողների ընտրությունը և խախտելով հակամենաշնորհային օրենքները:

GARM-ի համահիմնադիր Ռոբ Ռակովիցը հերքել է այդ պնդումները՝ մյուսների հետ միասին պնդելով, որ բրենդներն իրավունք ունեն իրենք որոշել, թե որտեղ ծախսեն իրենց «գովազդային գումարները»:

Գովազդատուների հետ սոցցանցի խնդիրներն սկսվել են այն բանից հետո, երբ Մասկը գնեց այն 2022-ին։ Անձնակազմի կրճատման նոր քաղաքականության պատճառով մի շարք ընկերություններ, այդ թվում՝ Apple-ը, դադարեցրել էին գովազդը։ Անցյալ ամառ գործարարը վերանվանեց Twitter-ը X-ի և հրաժարվեց հին տարբերանշանից։ Հենց այդ ժամանակ էլ նա հայտնեց, որ գովազդից ստացված եկամուտները նվազել են մոտ 50%-ով:

Աշնանը սկանդալ ծագեց այն բանից հետո, երբ Մասկը հրապարակավ պաշտպանեց X օգտատերերից մեկի գրառումը, որում վերջինս նշել էր, թե հրեաները «ատելություն են հրահրում սպիտակամորթների նկատմամբ»։ Դրանից հետո այս սոցցանցում գովազդը դադարեցնելու մասին հայտարարեցին այնպիսի ընկերություններ, ինչպիսիք են Disney-ը, Warner Bros.-ը, Apple-ը, IBM-ը, Comcast-ը։