Մարդկանց մեծ մասը չի կարողացել տարբերել Sora նեյրոցանցի ստեղծած տեսանյութերն իրականից

Մի քանի շաբաթ առաջ Open AI ընկերությունը ներկայացրեց Sora նեյրոցանցը, որը տեքստային նկարագրության հիման վրա մինչև մեկ րոպե տևողությամբ (1920 × 1080 պիքսել կետայնությամբ) իրատեսական տեսանյութեր է ստեղծում։ Այժմ HarrisX ընկերությունը հարցում է անցկացրել ամերիկացի մեծահասակների շրջանում՝ խնդրելով տարբերակել արհեստական բանականության (ԱԲ) միջոցով ստեղծված տեսանյութերն իրականից: Պարզվել է, որ հարցվածների մեծ մասը սխալվել է և չի կարողացել տարբերել ԱԲ-ով ստեղծվածներն իրականից։

Մարտի 1-ից 4-ը ԱՄՆ-ում անցկացված հարցմանը մասնակցել է ավելի քան 1000 ամերիկացի։ Հետազոտության հեղինակները ստեղծել են չորս բարձրորակ տեսանյութ՝ օգտագործելով Sora նեյրոցանցը, ինչպես նաև ընտրել են չորս կարճ տեսանյութեր, որոնք նկարահանվել են իրական աշխարհում: Հարցվողներին այդ տեսանյութերը ցուցադրվել են պատահական կարգով, և նրանց նպատակն է եղել պարզել՝ տեսանյութը մարդո՞ւ կողմից է արված, թե՞ ԱԲ-ի: Հարցման մասնակիցների կարծիքները տարբեր են եղել, սակայն ութ դեպքից հինգում հարցվածների մեծ մասը տվել է սխալ պատասխան։

Ինչպես գրում է Variety պարբերականը, այս հետազոտությունը ցույց է տալիս, որ գեներատիվ նեյրոցանցերի միջոցով ստեղծված բովանդակությունը գնալով ավելի իրատեսական է դառնում, և այն իրականից տարբերելը գնալով ավելի է դժվարանում: Այդ իսկ պատճառով տարբեր երկրներում հաճախակի են դարձել այս ոլորոտի օրենսդրական կարգավորման անհրաժեշտության մասին իշխանություններին ուղղված կոչերը։ Ի թիվս այլ բաների, առաջարկվում է նեյրոցանցեր օգտագործողներին պարտավորեցնել, որ համապատասխան կերպով նշեն գեներացված բովանդակությունը, որպեսզի այն չմոլորեցնի մյուսներին և չդառնա ապատեղեկատվության աղբյուր։

Sora ալգորիթմը դեռ հասանելի չէ լայն հանրությանը, սակայն այն արդեն լուրջ մտահոգություն է առաջացնում հասարակության շրջանում, հատկապես զվարճանքի ոլորտում, որտեղ վիդեո բովանդակության ստեղծման տեխնոլոգիաների զարգացումը շատ բացասական հետևանքներ է առաջացնում, օրինակ՝ կինոստուդիաների համար։ Բացի դրանից՝ ավելի ու ավելի է բարձրացվում այն ​​հարցը, որ Sora-ի նման ալգորիթմները կարող են օգտագործվել քաղաքական գործիչների և հայտնի մարդկանց մասնակցությամբ կեղծ տեսանյութեր ստեղծելու համար, ինչը կարող է հանգեցնել ամենաանկանխատեսելի հետևանքների: