Claude 3. Anthropic-ն ստեղծել է ԱԲ նոր մոդելներ, որոնք գերազանցում են Google-ի և OpenAI-ի մոդելներին

Anthropic ընկերությունը, որը հիմնադրել են OpenAI ընկերության նախկին աշխատակիցները, գործարկել է արհեստական բանականության (ԱԲ) նոր սերնդի մոդելներ, որոնք միավորված են Claude 3 անվան տակ: Դրանք մեքենայական ուսուցման ոլորտում քրտնաջան աշխատանքի արդյունք են և զգալի առաջընթաց են ներկայացնում իրենց նախորդ մոդելների, ներառյալ OpenAI-ի և Google-ի մոդելների համեմատ:

Claude 3-ը բազմամոդալ է, ունակ է հասկանալ և մշակել ինչպես տեքստ, այնպես էլ տեսողական տվյալներ: ԱԲ այս մոդելի ֆունկցիոնալության նման ընդլայնումը ոչ միայն այն դարձնում է ավելի ճկուն օգտագործման համար, այլև նոր հորիզոններ է բացում դրա կիրառման համար տարբեր ոլորտներում՝ կրթությունից մինչև բժշկություն:

Claude 3 ընտանիքը ներառում է երեք մոդել՝ Haiku, Sonnet և Opus: Վերջինս ամենաառաջադեմ մոդելն է, որն ընկերությունը բնութագրում է որպես ամենախելացի։ Ներկայումս Opus և Sonnet մոդելները հասանելի են օգտատերերին պաշտոնական claude.ai կայքի և հավելվածների ծրագրային միջերեսի (API) միջոցով: Haiku մոդելը, որը կարողանում է տվյալները մշակել բարձր արագությամբ՝ նվազագույն ծախսերով, մոտ ապագայում կներկայացվի հանրությանը։

Նշենք, որ համատեքստը ոչ բավարար կերպով ընկալելու պատճառով Claude-ի նախորդ տարբերակները երբեմն հրաժարվում էին պատասխանել որոշ օգտվողների հարցումներին, նույնիսկ եթե դրանք անվնաս էին: Նոր Claude 3 մոդելներում, սակայն, բարելավվել է համատեքստի ընկալումը, մոդելներն ավելի քիչ են միտված հարցումներին չպատասխանելուն, ինչը դրանք դարձնում է ավելի հարմարվող և ճկուն:

Claude 3-ն ունի բացառիկ ունակություն և երեք վայրկյանից պակաս ժամանակում կարող է մշակել և վերլուծել բարդ նյութերը, ինչպիսիք են գիտական ​​հոդվածները, ներառյալ դիագրամներով և գծապատկերներով տեքստը: Այսպիսի հնարավորությունների շնորհիվ այս մոդելը դասվում է շուկայի ամենաարագ և տնտեսող մոդելների շարքում:

Օրինակ՝ Opus-ն ավելի լավ ցուցանիշներ է գրանցել, քան OpenAI-ի մոդելները, հատկապես այն խնդիրներում, որոնք պահանջում են մագիստրոսի ​​մակարդակի հիմնավորում։ Այստեղ Opus-ը գերազանցում է GPT-4-ին՝ գրանցելով 50,4% արդյունք GPT-4-ի 35,7%-ի դիմաց: Սա հաստատում է նրա բարձր վերլուծական կարողությունները և նյութի ըմբռնման խորությունը:

Anthropic Claude 3 մոդելների ուսուցումն իրականացրել է՝ օգտագործելով խառը տվյալների հավաքածու, ներառյալ ոչ միայն հանրությանը հասանելի աղբյուրները, այլև ներքին տվյալները, որոնք թույլ են տվել հասնել տեղեկատվության բարձր որակի մշակման: Մոդելները վերապատրաստվել են Amazon AWS և Google Cloud ամպային ծառայությունների հզորության վրա, ինչն ընդգծում է նախագծի մասշտաբն ու նշանակությունը։ Թե՛ Amazon-ը, և թե՛ Google-ը մեծ ներդրումներ են կատարել Anthropic-ի զարգացման մեջ։