«Մենք պետք է առաջնորդենք այս տեխնոլոգիական հեղափոխությունը». Հակոբ Արշակյանը՝ արհեստական բանականության մասին

Ես ուզում եմ, որ մենք շատ լուրջ վերաբերվենք արհեստական բանականության (ԱԲ) զարգացմանը Հայաստանում, հետ չմնանք այս տեխնոլոգիական հեղափոխությունից, անգամ կարողանանք առաջնորդել այդ հեղափոխությունը: Այս մասին այսօր Մատենադարանի նոր մասնաշենքում «Արհեստական բանականությունը բիզնեսի համար» խորագրով համաժողովի բացման ժամանակ իր ելույթում ասաց ԱԺ փոխնախագահ Հակոբ Արշակյանը:

«Առաջինն ուզում եմ խոսել Cognaize ընկերության մասին, որը հայկական ստարտափ է 450-ից ավելի աշխատակիցներով և շուրջ 20 մլն դոլար ներդրում է ներգրավել: Նրանք զբաղվում են խորհրդակցական մեծ ընկերությունների համար արհեստական բանականության վրա հիմնված ֆինանսական և փաստաթղթային ամբողջ համակարգի վերլուծությամբ: Դրա արդյունքում հնարավոր է դառնում ընկերության ֆինանսական առողջության մասին, ներդրումների ներգրավման կարողությունների մասին դատողություններ անել և այլն:

Ես խնդրեցի ֆինանսների նախարարի հետ հանդիպում, որպեսզի կարողանա այս ընկերությունը ներկայացնել, թե իրենք ինչ են անում, միգուցե պետության համար նույնպես նման ծառայությունների անհրաժեշտություն լինի:

Եվ հայտնաբերեցինք մի քանի հետաքրքիր փաստ. առաջինն այն է, որ մենք չունենք այնպիսի  տվյալների բազա, որի հիման վրա հնարավոր կլինի արհեստական բանականության ալգորիթմը աշխատեցնել և ավտոմատացնել այդ ամբողջ փաստաթղթաշրջանառությունը և դրա վրա հիմնված և արհեստական բանականությամբ զինված վերլուծություններ անել: Սա մեզ բերեց  ընկալման, որ մենք արհեստական բանականության ոլորտում, այո՛, ունենք ուժեղ ընկերություններ, սակայն պետությունը չունի բավարար տվյալների բազա, որոնց վրա այդ ալգորիթմները կարող են սովորել»,- ասաց նա:

Հակոբ Արշակյանը մեկ օրինակ բերեց. «Եթե որևէ մեկի ձայնը արհեստական բանականության ալգորիթմը ցանկանա  ճանաչել, որ հնարավոր լինի ավտոմատ կերպով որևէ գործողություն անել, անհրաժեշտ է շատ մեծ քանակի տարբեր ինտոնացիաներով, լեքսիկոններով խոսողների դեպքում այլ ալգորիթմ սովորեցնել: Մենք ունենք մարտահրավեր, որպեսզի նման բազաներ կարողանանք ՀՀ-ում ունենալ»,- ասաց նա:  

ԱԺ նախագահը տեղեկացրեց, որ նախօրեին ԱԺ պատգամավոր Գևորգ Պապոյանի հետ այցելել է BostonGene ընկերություն. «Այն նոր է տեղափոխվել Հայաստան, 2022-ին, չնայած արդեն 200 նոր մարդ է ընդունել: Նրանք զբաղվում են քաղցկեղի տեղորոշմամբ և բուժմամբ: Օրինակ՝ եթե քաղցկեղի ախտորոշման համար բժիշկը պետք է որոշակի տվյալներ ուսումնասիրի, հետո լաբորատոր փորձաքննությունների արդյունքում հասկանա, թե այդ քաղցկեղն ինչ բնույթի է, որտեղ է գտնվում, ինչ մեծության է, հետո տա դրա բուժումը, այս ընկերությունը միլիոնավոր տեսակի տվյալներ է հավաքում ամբողջ աշխարհից, դրա վրա արհեստական բանականությունը սովորում է, թե որ դեպքերում ինչպիսի ախտորոշում է տրվում և որ բուժումն է ամենաարդյունավետը: Այնուհետև իր ալգորիթմը սովորում է բժշկին խորհրդատվություն տալ: Այսինքն՝ բժիշկը ոչ թե հիմնվում է իր կամ իր աշխատակիցների փորձի, այլ ամբողջ աշխարհի միլիոնավոր իր նման բժիշկների փորձի վրա»,- ընդգծեց նա:

Հակոբ Արշակյանի համոզմամբ, արհեստական բանականությունը շատ մոտ ապագայում շատ մեծ փոփոխություններ է անելու աշխարհում և այն ընկերությունները և պետությունները, որոնք չեն սովորի օգտագործել արհեստական բանականության բոլոր դրական հնարավորությունները, նրանք կարող են  հայտնվել խորը ճգնաժամի և հետամնացության մեջ։ «Ես ուզում եմ, որ մենք շատ լուրջ վերաբերվենք դրան: Ես կոչ եմ անում, որ մեր գործընկերները աշխատեն այս ուղղությամբ, որպեսզի մենք հետ չմնանք այս կարևոր, ես կասեի, տեխնոլոգիական հեղափոխությունից, կարողանանք առաջնորդել այդ հեղափոխությունը»,- հայտարարեց ԱԺ փոխխոսնակը:

Նշենք, որ «Արհեստական բանականությունը բիզնեսի համար» խորագրով համաժողովի նպատակն է միավորել ոլորտի առաջնորդներին, նորարար մտածողներին և արհեստական բանականության ոլորտի փորձագետներին՝ ուսումնասիրելու արհեստական բանականության գերժամանակակից ռազմավարություններն ու լուծումները, որոնք կարող են հեղափոխել բիզնեսի գործառնությունները:

Համաժողովի բանախոսների թվում են «Embodied» ընկերության հիմնադիր և գործադիր տնօրեն Պաոլո Պիրջանյանը, ABBYY ընկերության հիմնադիր Դավիթ Յանը: