Չինաստանում արհեստական բանականության (ԱԲ) օգնությամբ գրված գիտաֆանտաստիկ ժանրի վիպակն ազգային մրցանակ է ստացել։ Սակայն ԱԲ-ը վտանգ է ներկայացնում գրողների համար և անուղղելի վնաս է հասցնում գրական լեզվին, պնդում է ստեղծագործության հրատարակիչը։
Երբ Պեկինի Ցինհուայի համալսարանի պրոֆեսոր Շեն Յանը որոշում է գիտաֆանտաստիկ վեպ գրել մետավերսի և մարդանման ռոբոտների մասին, նա ոգեշնչման համար դիմում է ԱԲ-ի օգնությանը: Արդյունքում ԱԲ-ն գրում է «Հիշողությունների երկիր» վերնագրով ամբողջ վիպակը, որը գրեթե 6000 նիշից է բաղկացած և այժմ Ցզյանսուի երիտասարդական գիտաֆանտաստիկայի մրցույթում մրցանակի է արժանացել: Հոկտեմբերյան մրցանակաբաշխության ժամանակ պատմվածքը 17 այլ պատմվածքների հետ միասին արժանացել է երկրորդ մրցանակի, ինչը նշանակում է, որ այն ստացել է ժյուրիի վեց անդամներից երեքի ձայները:
Մրցույթի մասին զեկույցի համաձայն՝ ժյուրիի անդամներից միայն մեկին են ծանուցել, որ Շենն իր աշխատանքում ԱԲ է օգտագործում։ Սակայն ժյուրիի մեկ այլ անդամ, որն ուսումնասիրում է ԱԲ-ի վրա հիմնված բովանդակության ստեղծման առնչվող հարցեր, հասկացել է, որ Շենի աշխատանքը ստեղծվել է ԱԲ-ի կողմից: Նա ասել է, որ ինքը չի քվեարկել աշխատանքի օգտին, քանի որ այն չի համապատասխանում ստանդարտներին և «զուրկ է վառ զգացմունքներից»:
«Այն բանից հետո, երբ մենք տասնյակ հուշումներ պատրաստեցինք, ԱԲ-ն ստեղծեց ողջ բովանդակությունը՝ սկսած հեղինակի անունից, վերնագրից և տեքստից մինչև տեքստի նկարազարդումներ: Նրան խնդրել էինք գրել Կաֆկայի գրական ոճով։ Գրականության և արհեստական բանականության պատմության մեջ առաջին անգամ ԱԲ-ի կողմից գրված պատմությունն արժանացել է գրական մրցանակի»,- ասել Շենը։
Նա նաև նշել է, որ այս պատմության ստեղծման գործընթացը մանրամասն նկարագրված կլինի և կհրապարակվի «բոլորի համար, ովքեր կցանկանան իմանալ, թե ինչպես ստեղծել լավ գեղարվեստական գրականություն՝ օգտագործելով արհեստական բանականությունը»:
«Ժողովրդական գրականություն» հրատարակչության խմբագրական բաժնի տնօրեն Ֆու Ռուչուն ասել է, որ հեշտ չէր հասկանալ, որ Շենի ստեղծագործությունը ստեղծվել է արհեստական բանականության միջոցով։ «Գիտական ֆանտաստիկայի ժանրի գրողները հաճախ ավելի շատ կենտրոնանում են ստեղծագործության և տեսարանի նկարագրության, քան լեզվի վրա»,- նշել է Ֆուն՝ հավելելով, որ այս պատմությունը լավ է գրված։
Այնուամենայնիվ, Ֆուն ասել է, որ ԱԲ-ը կարող է վտանգ ներկայացնել գիտաֆանտաստիկ ժանրի գրողների համար, և զգուշացրել է, որ, իր կարծիքով, ԱԲ-ը կարող է անուղղելի վնաս հասցնել գրական լեզվին։ «Այս պատմվածքում լեզվի զգացողությունն ու ռիթմը շատ թույլ է։ Կարծում եմ, որ ապագայում, գրականության վրա արհեստական բանականության ազդեցության աճի հետ մեկտեղ, լեզվում ուժեղ հույզերը կարող են էլ ավելի հազվադեպ դառնալ»,- նշել է նա։
ամիս
շաբաթ
օր