OnePlus 12-ը 2023-ի ամենահզոր սմարթֆո՞ն․ սարքը ռեկորդ է սահմանել AnTuTu-ում

OnePlus 12-ը կարող է դառնալ 2023-ի ամենահզոր սմարթֆոնը. GSMArena-ի վերջին հաշվետվության համաձայն՝ սարքը AnTuTu-ի անցկացրած թեստի արդյունքներով ռեկորդներ է գերազանցել՝ հավաքելով ավելի քան 2 միլիոն միավոր։

Ֆլագմանային OnePlus 12-ը հավաքել է տպավորիչ 2,11 միլիոն միավոր՝ գերազանցելով Snapdragon 8 Gen 2 չիպ ունեցող սարքերի ներկայիս ցուցանիշները, որոնք սովորաբար հավաքում են շուրջ 1,5-1,6 միլիոն միավոր: Միևնույն ժամանակ, ոլորտի փորձագետներն ակնկալում են, որ նոր Snapdragon 8 Gen 3 չիպ ունեցող բոլոր ֆլագմանային սմարթֆոնները, որոնք կթողարկվեն 2024-ին, նույնպես հավանաբար կհատեն 2 միլիոն միավորի սահմանագիծը:

Ուշագրավ է, որ փորձարկված սմարթֆոնն ունեցել է 12 ԳԲ օպերատիվ հիշողություն: Հաշվի առնելով, որ խոսվում է այն մասին, թե OnePlus 12-ը հասանելի կլինի 24 ԳԲ օպերատիվ հիշողությամբ լավագույն կոնֆիգուրացիայով, կարելի է ենթադրել, որ սմարթֆոնի ավելի բարձրակարգ տարբերակը կապահովի կատարողական նույնիսկ էլ ավելի բացառիկ արդյունքներ:

Թեև OnePlus 12-ի թողարկման կոնկրետ ամսաթիվը դեռևս հայտնի չէ, համացանցում արտահոսել են ինժեներական նմուշի «գաղտնի» պատյանով լուսանկարներ։ Շատերն ակնկալում են, որ սարքը կթողարկվի մինչև 2023-ի վերջ։

Ըստ լուրերի՝ OnePlus 12-ը կունենա 6,82 դյույմանոց BOE X1 էկրան՝ QHD+ լուծաչափով և տպավորիչ 2600 նիտ պայծառությամբ: Ակնկալվում է, որ սարքը կունենա 5,400 մԱ/ժ հզորությամբ մարտկոց, որն ապահովում է 100 Վտ լարային լիցքավորում և 50 Վտ անլար լիցքավորում՝ օգտատերերի համար ապահովելով սմարթֆոնի օգտագործման ամբողջական և հզոր փորձառության հնարավորություն:

Ակնկալվում է, որ OnePlus նոր սմարթֆոնները կունենան նաև աշխարհի ամենապայծառ էկրանները, ընդ որում OnePlus 12-ը կունենա 2K լուծաչափով էկրան՝ տպավորիչ 3000 քդ/մ² առավելագույն պայծառությամբ: