Սպամ և անպարկեշտ լուսանկարներ ուղարկելն ավելի կդժվարանա. Instagram-ը խստացրել է անձնական հաղորդագրություններ ուղարկելու կանոնները

Instagram սոցիալական ցանցը նոր քայլեր է ձեռնարկել անցանկալի անձնական հաղորդագրությունների դեմ պայքարի շրջանակում։ Պլատֆորմի կողմից ներդրված նոր սահմանափակումներն ուղղված են սպամի նվազեցմանը, դրանց շնորհիվ նաեւ ավելի կբարդանա անպարկեշտ կոնտենտ պարունակող հաղորդագրություններ ուղարկելը, հատկապես, կանանց:

Թարմացված կանոնների համաձայն՝ հաղորդագրություն ուղարկողները, ովքեր օգտատիրոջ բաժանորդը չեն, այժմ կարող են ուղարկել միայն մեկ հաղորդագրություն։ Ստացողի հետ նամակագրությունը շարունակելու համար հարկավոր կլինի ստանալ նրա համաձայնությունը՝ զրույցը սկսելու համար: Այս միջոցը կդժվարացնի սպամի և զանգվածային հաղորդագրություններ ուղարկելը, եթե հասցեատերը դրանք չի ցանկանում տեսնել:

Մյուս կարևոր փոփոխությունը բովանդակության տեսակի սահմանափակումն է, որը կարող է ուղարկվել անձնական հաղորդագրություններում: Այժմ անպատշաճ բովանդակությամբ կոնտենտի դեմ պայքարի շրջանակներում անջատվել է լուսանկարներ, տեսանյութեր և ձայնային հաղորդագրություններ ուղարկելու հնարավորությունը: Այսպիսով, սպամերները չեն կարողանա չարաշահել այս բովանդակության ձևաչափերը՝ սպամ տարածելու համար:

Քաղաքականության այս փոփոխությունները այժմ ներդրվում են Instagram-ի նոր տարբերակում։ Պլատֆորմն արդեն ունի մի շարք հակասպամի գործիքներ, օրինակ՝ Hidden Words, որը թաքցնում է անհամապատասխան հիմնաբառերով և էմոջիներով հաղորդագրությունները: Այժմ ներդրվել են լրացուցիչ զտիչներ՝ խարդախությունն ու սպամը հայտնաբերելու համար։

Instagram-ի ներկայացուցիչների խոսքով, այս փոփոխությունները կարեւոր են օգտատերերի, հատկապես՝ կանանց անվտանգության համար։ Կանայք հաճախ հանդիպում են ոչ պատշաճ բովանդակության, այդ թվում՝ անպարկեշտ լուսանկարների, և նոր սահմանափակումները կարող են օգնել պայքարել այս խնդրի դեմ: Չնայած դրան, կանոնները չեն կարող կանխել կոպիտ տեքստի ուղարկումը, բայց կարող են կանխել պատկերների և տեսանյութերի տարածումը, որոնք կարող են անհանգստություն առաջացնել կամ նույնիսկ խախտել գաղտնիության մասին օրենքները:

Այս փոփոխությունները տեղի են ունենում Instagram-ի մայր ընկերության՝ Meta-ի վրա քաղաքական գործիչների և օգտատերերի կողմից աճող ճնշումների ֆոնին, որոնք պահանջում են ավելի խիստ հակաչարաշահումների միջոցներ, հատկապես դեռահասների նկատմամբ: ԱՄՆ Սենատում քննարկվում է օրինագիծ, որը պահանջում է ծնողների համաձայնությունը դեռահասների համար սոցիալական ցանցերից օգտվելու համար: Արկանզաս նահանգը վերջերս օրենք է ընդունել, որը պահանջում է օգտատերերի տարիքային ստուգում:

Հիշեցնենք, որ վերջերս Instagram-ում կհայտնվի արհեստական բանականությամբ աշխատող չաթ-բոտ, որը կարող է օգնել գրառումներ գրելիս։ Վերջերս սոցցանցում նաեւ հնարավոր է դարձել գրառումներին պատասխանել GIF պատկերներով։ Սոցցանցի այլ նորամուծություններից է չատի գործառույթը, որը կոչվում է Channels: