Բրիտանացիները, ամերիկացիներն ու արհեստական բանականությունը ջերմամիջուկային շարժիչով հրթիռ կստեղծեն, որով Մարս կարելի է հասնել 30 օրում

Բրիտանական Pulsar Fusion ընկերությունը համագործակցության մասին համաձայնագիր է կնքել ամերիկյան Princeton Satellite Systems ընկերության հետ, որի շրջանակում կստեղծեն ջերմամիջուկային շարժիչով հրթիռ, որը կարող է Մարս հասնել 30 օրում։ Աշխատանքի հիմնական գործիքը կլինի արհեստական բանականությունը, որը կուսումնասիրի շարժիչի պլազմայի ֆիզիկան և կօգնի օպտիմալացնել դրա դիզայնը։

Բրիտանական Pulsar Fusion-ը հայտնի է «կանաչ» տեխնոլոգիաներին իր հավատարմությամբ. այն մշակում է հրթիռային շարժիչ, որն աշխատում է պլաստիկ թափոններից ստացվող վառելիքով: Սակայն ընկերությունն իր համար որպես երկրորդ նպատակ է դրել ջերմամիջուկային հրթիռային շարժիչի ստեղծումը։ Ընդհանրապես, սա ևս «կանաչ» ուղղություն է հրթիռային գիտության և, ընդհանրապես, էներգետիկայի մեջ։ Այնուամենայնիվ, Princeton Satellite Systems-ի հետ միասին բրիտանացիները կկատարելագործեն ամերիկացիների զարգացումները, և ոչ թե իրենցը: Մասնավորապես, նրանք կվերլուծեն Princeton field-reversed configuration (PFRC-2) սարքում պլազմայի ֆիզիկան։

PFRC սարքն առաջարկվել է 2000-ականների սկզբին Փրինսթոնի պլազմային ֆիզիկայի լաբորատորիայում: Այն իրականացնում է շրջված մագնիսական կոնֆիգուրացիայի գաղափարը: Բարձր ճնշման ջերմամիջուկային պլազման մագնիսական թակարդի օգնությամբ պահվում է շարժիչի ներսում, իսկ սառը վառելիքը նույն պլազմայի (իոնների և էլեկտրոնների) տեսքով հոսում է տաք միջուկի շուրջը և կլանում դրա էներգիան, որից հետո այն մեծ արագությամբ դուրս է գալիս էլեկտրամագնիսական վարդակների միջոցով:

Princeton Satellite Systems-ը 20 տարվա ընթացքում դրամաշնորհային մի շարք պետական ​​նախագծեր է իրականացրել, ներառյալ NASA-ի ֆինանսավորմամբ: Հետագայում նախատեսվում է մինչև 2025-ը ստեղծել PFRC-3 և PFRC-4 սարքերը։ Վերջինս պետք է ստանա ջերմամիջուկային սինթեզի ռեակցիա, որից հետո կմեկնարկի թռիչքի նախատիպի ստեղծման գործընթացը։ Ըստ ամենայնի, դրանք կստեղծվեն Pulsar Fusion-ի հետ համատեղ հետազոտությունների հիման վրա։

«Մենք կարծում ենք, որ ջերմամիջուկային շարժիչները կցուցադրվեն տիեզերքում տասնամյակներ առաջ, նախքան մենք կկարողանանք ջերմամիջուկային սինթեզն օգտագործել Երկրի վրա էներգիա ստանալու համար»,- ասել է Pulsar Fusion-ի հիմնադիր և գործադիր տնօրեն Ռիչարդ Դինանը:

Միկրոավտոբուսի չափեր ունեցող ջերմամիջուկային սինթեզի շարժիչը 10 տոննա կշռող տիեզերանավի դեպքում կկարողանա զարգացնել մինչև 500,000 մղոն/ժամ արագություն կամ 223,5 կմ/վ: Այս արագությամբ Մարսին կարելի է հասնել մոտ 30 օրվա ընթացքում, երբ այն ամենամոտը լինի Երկրին, կամ կարելի է Տիտանին (Սատուրնի արբանյակ) հասնել երկու ամսում։ Այնուամենայնիվ, սա առավելագույն արագությունն է, և բացի դրանից, ժամանակ է պահանջվում արագացման և տիեզերանավի արագությունը դանդաղեցնելու համար։

Ջերմամիջուկային սինթեզի սարքը կարող է նաև էլեկտրաէներգիա արտադրել տիեզերանավի համակարգերի համար, իսկ աշխատանքային վառելիքը տիեզերքում կարելի է ստանալ  փոշուց, գազից և գրեթե ցանկացած նյութից: Շարժիչում ջերմամիջուկային ռեակցիա սկսելու և պահպանելու համար անհրաժեշտ կլինեն հելիում-3 և դեյտերիումի փոքր ծավալներ, որոնք շատ տեղ չեն գրավի։