Ջրասուզակները լճի հատակում iPhone են գտել. այն միացել է և աշխատել, թեև ջրի տակ եղել էր մոտ մեկ տարի

ԱՄՆ Վիսկոնսին նահանգի Մեդիսոն քաղաքի Four Lakes ջրասուզման ակումբի անդամները լիճն աղբից մաքրելու ժամանակ iPhone հեռախոս են հայտնաբերել։ Սարքը, որը գրեթե մեկ տարի եղել էր լճի հատակում, միացել է և սկսել աշխատել։

Ջրասուզման ակումբը ժամանակ առ ժամանակ կամավոր հիմունքներով կազմակերպում է լճերի մաքրման աշխատանքներ։ Ակումբի անդամները հավաքում են պոլիէթիլենային տոպրակներ, շշեր և այլ աղբ, սակայն երբեմն գտնում են նաև էլեկտրոնիկա, այդ թվում՝ սմարթֆոններ։

Ակումբի նախագահ Էլեն Էվանսը Channel3000-ին ասել է, որ լճի հատակում հայտնաբերված ցանկացած սարք սուզորդները փորձում են միացնել: Շատերն, իհարկե, չեն աշխատում, բայց վերջին հայտնաբերված սարքը բացառություն է դարձել․ երբ այն միացրել են լիցքավորիչին, հեռախոսն սկսել է լիցքավորվել, էկրանը ևս միացել է։

Քանի որ սմարթֆոնն աշխատել է, ակումբի անդամներն այն հանձնել են ոստիկանությանը, որին հաջողվել է գտնել հեռախոսի տիրոջը․ պարզվել է, որ հեռախոսը պատկանել է Մեդիսոնի համալսարանի շրջանավարտ Էլլի Էյզենբերգին, որն ասել է, որ այն կորցրել է 2022-ի ամռանը նավակով զբոսանքի ժամանակ:

Հեռախոսի մոդելը չի ​​նշվում, սակայն, դատելով հրապարակված լուսանկարից, այն կարող է լինել iPhone Pro 12 կամ 13։

Նշենք, որ iPhone-ի վերջին մոդելներն ստացել են խոնավությունից և փոշուց պաշտպանություն IP68 ստանդարտի համապատասխան, ինչի շնորհիվ սմարթֆոնը կարող է մինչև 6 մետր խորության վրա աշխատել ջրի տակ, իհարկե, ընդամենը 30 րոպե։ Իսկ լճի հատակին մեկ տարի մնալն ու դրանից հետո աշխատելն իսկապես շատ տպավորիչ արդյունք է:

Վերջերս մեկ այլ iPhone արժանապատվորեն դիմացել էր բարձրությունից ընկնելու փորձությանը, երբ պարաշյուտով թռիչքի ժամանակ այն ընկել էր տիրոջ գրպանից, բախվել գետնին, սակայն չէր կոտրվել։