5 նոր նյութ, որոնք կփոխեն շինարարությունը

Գիտության զարգացմանը զուգահեռ ավելի ու ավելի շատ նոր գյուտեր են ի հայտ գալիս, որոնք փոխում են մեր կյանքն ու աշխատանքի նկատմամբ մեր մոտեցումները: Ավելին, դրանք իրականություն են դարձնում այն, ինչ նախկինում անհնար էր թվում։

Ձեր ուշադրությանն ենք ներկայացնում մի քանի հետաքրքիր նոր նյութեր, որոնք շատ բան կարող են փոխել շինարարության ոլորտում։

Թափանցիկ ալյումին

Ալյումինի օքսինիտրիդը օքսիդի և ալյումինի նիտրիդի համաձուլվածք է՝ նյութ, որը միավորում է մետաղի ուժը և ապակու թափանցիկությունը: Ենթադրվում է, որ այն մի քանի անգամ ավելի ամուր է, քան թրծված ապակին, բայց միևնույն ժամանակ՝ շատ ավելի բարակ, քան նմանատիպ պաշտպանիչ ապակիների այլ տեսակները:

Այսպիսի նյութը շատ տարբեր կիրառություններ ունի՝ թափանցիկ պաշտպանիչ միջնորմներից մինչև ԱՄՆ ռազմաօդային ուժերի ռազմական մեքենաների զրահապատ ապակիներ: Այն նաև որպես սուբստրատ օգտագործվում է կիսահաղորդչային ինտեգրալ սխեմաների և որոշ լուսավորող սարքերի արտադրության մեջ:

Ինքնավերականգնվող բետոն

Ինքնավերականգնվող բետոնը հեղափոխական շինանյութ է, որը թույլ կտա խնայել շենքերի վերանորոգման վրա:

Այսօր բետոնն աշխարհում ամենատարածված շինանյութերից է, սակայն դրա հիմնական խնդիրն այն է, որ ժամանակի ընթացքում դրա մեջ առաջանում են ճաքեր, որոնց մեջ հետո խոնավություն է մտնում։ Արտաքին ջերմաստիճանի ազդեցության տակ այս խոնավությունը սառում է, հալվում է, ինչի պատճառով ճաքերն էլ ավելի են ընդլայնվում, և որոշ ժամանակ անց խոնավությունը կարող է հասնել մետաղական ամրաններին, ինչից հետո կարող է սկսվել կոռոզիա՝ դրան հաջորդող բոլոր խնդիրներով:

Նախկինում բետոնի բոլոր ճաքերը պետք է վերանորոգվեին ձեռքով, սակայն ինքնավերականգնվող բետոնը կարող է ամբողջությամբ փոխել իրավիճակը. երբ խոնավությունը մտնում է ճաքեր, բակտերիաները կենդանանում են և արտազատում բնական կալցիտ, որը լցնում է ճաքերն ու կարծրանում։

Փայլող ցեմենտ

Փայլող ցեմենտն արդեն օգտագործվում է Նիդեռլանդներում՝ որոշ ճանապարհների կառուցման մեջ, ինչը հնարավորություն է տալիս խնայել էլեկտրաէներգիան, նաև գեղեցիկ տեսք ունի։

Այլ երկրներում այս նյութը դեռ առանձնապես չի օգտագործվում, թեև դրա համար շատ կիրառումներ կարող են լինել՝ ավտոկայանատեղիների կառուցումից մինչև լոգարաններ, որտեղ հնարավոր կլինի դրա շնորհիվ գիշերը չմիացնել լույսերը։

Ճկուն սալիկ

Ճկուն սալիկը ևս մեկ հետաքրքիր նյութ է՝ ամուր, ինչպես կերամիկական աղյուսները, բայց միևնույն ժամանակ ճկուն: Արտաքինից նման սալիկը չի տարբերվում սովորականից, այնուամենայնիվ, այն կարող է թեքվել, կորանալ և ստանալ ցանկալի ձև՝ հեշտացնելով դրա հետ աշխատելը, եթե դրանով ծածկվող մակերեսը անհարթություններ ունի։ 

Նման սալիկները պատրաստվում են սովորական կավից, որին ավելացվում է պլաստիկացնող նյութ, որն էլ սալիկին նման առաձգականություն է հաղորդում։ Ստացված նյութին ամրություն է հաղորդում ապակե մանրաթելը։

Թափանցիկ բետոն

Թափանցիկ բետոնը յուրահատուկ նյութ է, որը փոխանցում է որոշակի քանակությամբ լույս, բայց միևնույն ժամանակ տեխնիկական բնութագրերով չի զիջում սովորական բետոնին, ապահովում է լավ ջերմամեկուսացում, ջրակայունություն, ձայնամեկուսացում։

Առայժմ այս նյութը բավականին թանկ է, և այն լայնորեն չի օգտագործվում, բայց շատ փորձագետներ կարծում են, որ ապագայում այն ​​ավելի պոպուլյար կդառնա. այն կարող է օգտագործվել պատերի, լողավազանների կառուցման, ինչպես նաև արձանների մեջ և մի շարք դեկորատիվ արտադրանքներում: