Apple ընկերությունը, կատարելով Եվրոպական միության պահանջը, iPhone հեռախոսների լիցքավորման Lightning համակարգից կանցնի USB-C-ի, սակայն սեպտեմբերի 12-ին կայանալիք շնորհանդեսի ժամանակ դա կգովազդի որպես նորարարություն և նույնիսկ չի հիշատակի ԵՄ պահանջները, այս մասին ասել է Bloomberg-ի լրագրող և վերլուծաբան Մարկ Գուրմանը։
Հիշեցնենք, որ ԵՄ-ն բջջային սարքեր արտադրողներից պահանջել է մինչև հաջորդ տարվա վերջ արդեն անցնել USB-C ստանդարտին: Apple-ը որոշել է չսպասել մինչև հաջորդ տարվա վերջ և ավելացրել է USB-C ստանդարտը iPhone 15 բոլոր չորս մոդելներին, ինչպես նաև նոր AirPods Pro-ին: «Apple-ը սա կանվանի մեծ հաղթանակ հաճախորդների համար: Պատրաստվեք լսել այս փոփոխությունների անհամար առավելությունների մասին»,- գրում է Մարկ Գուրմանը։
Ըստ նրա՝ Apple-ը USB-C-ին անցումը կգովազդի հետևյալ կերպ.
Հաճախորդները կկարողանան օգտագործել լիցքավորման մեկ մալուխ iPhone-ի, Mac-ի և iPad-ի համար; iPhone-ի նոր բարձրակարգ մոդելների դեպքում դա կբերի տվյալների փոխանցման արագության հեղափոխական աճի; Որոշ դեպքերում հեռախոսներն ավելի արագ կլիցքավորվեն; Եվ վերջապես, հեռախոսները համատեղելի կլինեն երրորդ կողմի միլիարդավոր սարքերում օգտագործվող լիցքավորիչների հետ։«Ընկերությունն ունի երկաթյա կանոն՝ երբ ներկայացնում է նոր ապրանք կամ շփվում է լրատվամիջոցների հետ, միշտ ցանկանում է հանդես գալ ուժի դիրքերից։ Apple-ի հիմնական շնորհանդեսում չի հիշատակելու Եվրոպական միությունը, ինչպես նաև չի նշվելու, որ ընկերությունը վերջին մի քանի տարիներին բազմիցս քննադատել է USB-C-ի վերաբերյալ ԵՄ պահանջը»,- ասել է Գուրմանը։
Նա հավելել է, որ այս փոփոխությունները նաև թերություններ ունեն Apple-ի համար.
Apple-ը կարող է կորցնել եկամուտների մի մասը, որոնք ստանում էր Lightning ստանդարտն օգտագործող աքսեսուարներ արտադրողներից լիցենզավորման դիմաց; Դրա համար անհրաժեշտ է հատկացնել ինժեներական ռեսուրսներ և գումար; Android-ի էկոհամակարգի հետ համատեղելիության ավելացման շնորհիվ հաճախորդներն ավելի հեշտությամբ կարող են հեռանալ Apple-ից; PR մղձավանջի վտանգ միշտ կա: Երբ 2012-ին Apple-ն անցավ Lightning ստանդարտին, օգտատերերը վրդովված էին: Վրդովմունք կար նաև առ այն, որ ընկերությունը 2016-ին վերացրել էր ականջակալների խցիկը:Apple-ը պաշտոնապես հաստատել է, որ աշնանային շնորհանդեսը տեղի կունենա սեպտեմբերի 12-ին՝ Սթիվ Ջոբսի անվան թատրոնում՝ Կուպերտինոյում գտնվող Apple Park կամպուսում (Կալիֆոռնիա, ԱՄՆ): Այն կանցկացվի Wonderlust կարգախոսի ներքո, որն անգլերենից թարգմանվում է որպես «հրաշքների ծարավ»:
Նոր սարքերը, վաճառքի կհանվեն սեպտեմբերի 22-ին, իսկ նախապատվեր հնարավոր կլինի անել արդեն սեպտեմբերի 15-ին։
Ավելի վաղ հայտնի էր դարձել, որ iPhone 15-ի շնորհանդեսից հետո iPhone 14 Pro-ն և Pro Max-ը կհանվեն արտադրությունից, մյուս հեռախոսների գները կիջեցվեն։
Հետևեք NEWS.am Tech-ին Facebook-ում և Twitter-ում