Նախընտրելի
Չինաստանում Honor User Carnival փակ միջոցառման ժամանակ ընկերությունը առաջին անգամ ցուցադրել է Robot Phone կոնցեպտուալ սմարթֆոնի աշխատող նախատիպը։ Պաշտոնական պրեմիերան նախատեսված է 2026 թվականի փետրվարին՝ Բարսելոնայում կայանալիք MWC ցուցահանդեսի շրջանակում, բայց արդեն հիմա պարզ է դարձել. Honor-ը պատրաստում է վերջին տարիների ամենաարտասովոր նորույթներից մեկը։
Ամենագրավիչը, որ անմիջապես աչք է ընկնում, ռոբոտացված կախովի մեխանիզմի (gimbal) վրա տեղադրված ծալվող տեսախցիկն է։ Մոդուլն ամբողջությամբ թաքնվում է կորպուսի մեջ, իսկ ակտիվացնելիս սահուն դուրս է գալիս և կարող է ազատ պտտվել՝ փոխելով նկարահանման անկյունը։ Honor-ի ներկայացուցիչների խոսքով՝ ներկառուցված արհեստական բանականությունը իրական ժամանակում հետևում է օբյեկտներին, ինքնուրույն կարգավորում է տեսախցիկի դիրքը և ընտրում օպտիմալ կարգավորումները. այսինքն՝ սա սմարթֆոն է, որը ինքնուրույն «հետևում» է տեղի ունեցողին և նկարում է ավելի լավ, քան մարդը հասցնում է ուղղել օբյեկտիվը։
Նախատիպը ցուցադրվել է երեք գույներով՝ սև, սպիտակ և ոսկեգույն։ Կախված տարբերակից՝ հետնամասը պատրաստված է կամ կոփված ապակուց, կամ պրեմիում դասի արհեստական կաշվից։
Առայժմ Honor-ը չի բացահայտում ոչ ճշգրիտ բնութագրերը, ոչ գները, ոչ էլ առևտրային տարբերակի վերջնական անվանումը։ Հայտնի է միայն, որ սերիական Robot Phone-ը իսկապես կհայտնվի վաճառքում. սա պարզապես ցուցադրական կոնցեպտ չէ։ Հաշվի առնելով, որ ընկերությունն արդեն մի քանի տարի է՝ փորձարկում է մեխանիկական տարրեր (ծալվող Magic V սերիա), ռոբոտացված տեսախցիկը բավականին իրատեսական տեսք ունի զանգվածային արտադրանքի համար։
Հակիրճ
Honor-ը ներկայացրել է Robot Phone նախատիպը՝ սմարթֆոն ծալվող տեսախցիկով կախովի մեխանիզմի վրա և առաջադեմ ԱԲ-հետևմամբ։ Ամբողջական անոնսը և վաճառքի մեկնարկը՝ 2026 թվականի փետրվար, MWC-ում։ Եթե Honor-ին հաջողվի գաղափարը հասցնել սերիական արտադրության՝ առանց լուրջ զիջումների, սա կարող է դառնալ 2026 թվականի ամենաօրիգինալ և ֆոտոգենիկ սմարթֆոնը։
