ՀՀ ԳԱԱ բաժանմունքներն այսօր, ապրիլի 23–ին, տարեկան ընդհանուր ժողովներում մի շարք որոշումներ են ընդունել:

ՀՀ ԳԱԱ բնական գիտությունների բաժանմունքի տարեկան ընդհանուր ժողովի որոշման մեջ, մասնավորապես, նշված է․ «Առկա են լուրջ խնդիրներ՝ կապված ՀՀ ԳԱԱ կազմակերպությունների և ՀՀ բուհերի ինտեգրման գաղափարի հեռանկարի հետ: Բաժանմունքի բոլոր կազմակերպությունները համարում են, որ այդ գործընթացի ճանապարհային քարտեզը կազմելուց պետք է հիմնվել աստիճանական և կշռադատված քայլերի վրա: Այդ ինտեգրումը պետք է բխի գիտության, կրթության, ռազմաարդյունաբերության, տնտեսության, անվտանգության և հասարակական տարբեր ոլորտների զարգացման ռազմավարությունից: ՀՀ ԳԱԱ կազմակերպությունների և ՀՀ բուհերի ինտեգրումը պետք է իրականացվի փուլերով, ռիսկերի գնահատման և կառավարման հստակ մեխանիզմների կիրառմամբ»:

Անդրադարձ է կատարվել նաև գիտության հանրայնացման խնդրիներին։ «ՀՀ ԳԱԱ նախագահությունը պետք է ապահովի անհրաժեշտ կազմակերպչական և ֆինանսական պայմաններ ԳԱԱ-ի գրախոսական և գիտության հանրայնացման ասպարեզում, զարգացնի միջգիտակարգային և համատեղ դրամաշնորհների համակարգը», - նշված է որոշման մեջ:

ՀՀ ԳԱԱ ֆիզիկայի և աստղաֆիզիկայի բաժանմունքի տարեկան ընդհանուր ժողովը որոշել է․

  1. քննարկել կազմակերպությունների՝ տարիներ առաջ հաստատված թեմատիկայի վերանայման անհրաժեշտությունը՝ հաշվի առնելով արդիականությունը, հանրապետության համար կարևորությունը և կադրերով ապահովվածությունը:
  2. Կարևորել հիմնարար հետազոտությունների արդյունքների հիման վրա հանրապետության՝ հատկապես անվտանգային և  առողջապահական բնագավառներում կիրառման նպատակով հեռանկարային նորարարական աշխատանքների իրականացումը:
  3. Նախատեսել հանրապետական և միջազգային գիտական համագործակցության վերաբերյալ տնօրենների զեկույցներ (5 սեմինար)։
  4. Կազմակերպել արտասահմանյան գիտնականների սեմինարներ, համատեղ իրականացվող հետազոտությունների արդյունքների վերաբերյալ (8 սեմինար)։
  5. Ձևավորել նախաձեռնող խումբ տիեզերական հետազոտությունների բնագավառի աշխատանքները համակարգելու, միջգիտակարգային ծրագրեր մշակելու և ՀՀ ԳԱԱ նախագահությանն առաջարկներ ներկայացնելու համար:

ՀՀ ԳԱԱ մաթեմատիկական և տեխնիկական գիտությունների բաժանմունքի տարեկան ընդհանուր ժողովը որոշել է․

  • շարունակել առանձնակի ուշադրություն դարձնել Հանրապետության համար հատուկ նշանակության խնդիրների լուծմանը;
  • հատուկ ուշադրություն դարձնել բաժանմունքի ինստիտուտների միջև միջգիտակարգային հետազոտությունների իրականացմանը;
  • ընդլայնել բաժանմունքի ինստիտուտների համագործակցությունը ՀՀ բարձր տեխնոլոգիական արդյունաբերության նախարարության և Ռազմարդյունաբերության կոմիտեի հետ;
  • առաջարկել «ՀՀ ԳԱԱ տեղեկագիր. Մեխանիկա», «Mathematical Problems of Computer Science» և «ՀՀ ԳԱԱ տեղեկագիր. տեխնիկական գիտություններ» հանդեսների խմբագրակազմերին ակտիվ միջոցներ ձեռնարկել «Scopus» շտեմարանի ցուցակային կազմում այդ ամսագրերն ընդգրկելու ուղղությամբ;
  • առաջարկել ՀՀ ԿԳՄՍՆ բարձրագույն կրթության և գիտության կոմիտեին գիտական աստիճանաշնորհման ցուցակում ընդգրկված ամսագրերի և հրատարակչությունների համար սահմանել տեղական նշանակության ազդեցության գործոն (impact factor)։

ՀՀ ԳԱԱ քիմիայի և Երկրի մասին գիտությունների բաժանմունքի տարեկան ընդհանուր ժողովը որոշեց դրական համարել բաժանմունքի 2024թ. գործունեությունը:

Նշենք, որ այսօր, ապրիլի 23–ին,  տեղի են ունեցել ՀՀ ԳԱԱ բաժանմունքների տարեկան ընդհանուր ժողովները, որոնց ժամանակ ներկայացվել են կատարված աշխատանքի վերաբերյալ հաշվետվությունները և տարբեր գիտական զեկույցներ։

ՀՀ ԳԱԱ տարեկան ընդհանուր ժողովը տեղի կունենա ապրիլի 23-ին՝ ժամը 10։30-ին, ՀՀ ԳԱԱ նիստերի դահլիճում։