Նախընտրելի
Samsung Galaxy Z Fold6 և Flip6 ծալվող սմարթֆոնների սեփականատերերը բողոքում են, որ առաջատար այս հեռախոսների տեսախցիկի ոսպնյակները պոկվում են, այս մասին հայտնում է Mobiltelefon կայքը։
Դատելով այս սմարթֆոնների առաջին տերերի բողոքներից՝ տեսախցիկի մոդուլները պաշտպանող ոսպնյակները սարքի կորպուսին ամրացված են սոսնձով։ Արդյունքում ոսպնյակները պոկվում են և կորում, ինչի արդյունքում տեսախցիկները խոցելի են դառնում փոշու և կեղտի նկատմամբ: Սա նաև կասկածի տակ է դնում սմարթֆոնների պաշտպանությունը ջրից՝ համաձայն IP48 ստանդարտի, ինչպես հայտարարել է ընկերությունը։
Նշվում է, որ այս պահին խնդիրը համատարած չէ։ Այնուամենայնիվ, փորձագետները զգուշացնում են, որ ջերմաստիճանի փոփոխությունները կարող են վատթարացնել իրավիճակը, և եթե Samsung-ը չփոխի իր տեխնոլոգիան, ոսպնյակներն ավելի հաճախ կսկսեն պոկվել ու կորել։
«Պարզվում է, որ գումար խնայելու համար դրանք ոչ թե հետևի վահանակի կառուցվածքի մաս են կազմում, այլ սոսնձով են ամրացվում։ Պոկվելը ժամանակի հարց է, նաև կախված է դրսում ջերմաստիճանից, խաղերի հետևանքով պատյանի տաքանալուց»,- իրավիճակը մեկնաբանել է Mobiltelefon-ի գլխավոր խմբագիր Եվգենի Մակարովը` նշելով, որ սա այն դեպքում, երբ այս սարքերն ավելի քան 2000 դոլար արժեն Ռուսաստանում։
Հուլիսի վերջին Samsung Galaxy Buds3 և Buds3 Pro ականջակալների առաջին գնորդները բախվել էին ինչպես ականջակալների, այնպես էլ լիցքավորման պատյանի որակի հետ կապված խնդիրների։ Որոշ օգտատերեր հայտնել էին, որ լիցքավորման տուփի կափարիչի և կորպուսի միջև զգալի տարածք կա: Նրանք նաև դժգոհել էին, որ ականջակալի սիլիկոնե բարձիկները պատռվում են, ներկը շատ շուտ մաքրվում է։ Ոմանք նույնիսկ ուրիշի մազեր էին գտել փաթեթավորված տուփում: Այս խնդիրների պատճառով Samsung-ը ստիպված էր եղել այս ականջակալները ժամանակավորապես հանել վաճառքից։
