Ավելի ճշմարտանման, քան երբևէ. վիրտուալ իրականությունում կարող են հոտեր հայտնվել

Ոչ հեռու ապագայում վիրտուալ իրականությունում կարող են հայտնվել ոչ միայն պատկերներ ու ձայներ, այլ նաև հոտեր, որոնք էլ ավելի ճշմարտանման ու գրավիչ կդարձնեն վիրտուալ իրականությունը։ Բայց ինչպե՞ս կարելի է հոտեր բերել վիրտուալ աշխարհ: Հենց այս տեխնոլոգիայի վրա են ներկայումս աշխատում Ստոկհոլմի և Մալմյոյի (Շվեդիա) համալսարանների հետազոտողները:

Տեխնոլոգիան, որը նկարագրված է Journal of Human-Computer Studies ամսագրում, հետազոտողները ցուցադրել են գինու համտեսի խաղում, որտեղ խաղացողը կարող է վիրտուալ նկուղում հոտ քաշել գինիներից և միավորներ վաստակել բույրերը ճիշտ գուշակելու համար:

Դա հնարավոր դարձնելու համար հետազոտողները մշակել են յուրօրինակ կոնսոլ՝ չորս փոքր տարաներով, որոնք պարունակում են անուշաբույր հեղուկներ: Յուրաքանչյուր տարա ունի փականներ, որոնք կարող են բացվել տարբեր աստիճաններով (սա վերահսկվում է համակարգչի կողմից), ինչը թույլ է տալիս բուրմունքների տեսակները տարբեր համամասնություններով միախառնել: Այնուհետև հատուկ օդափոխիչը ցանկալի բուրմունքը մատակարարում է խողովակի մեջ, որով այն հասնում է մինչև օգտատիրոջ քիթը:

Խաղում համային խառնուրդները կարող են նմանակել իրական գինիների հոտերը: Ավելին, կան դժվարության տարբեր մակարդակներ:

«Խաղային աշխարհում պասիվից դեպի ավելի ակտիվ հոտառության անցնելու ունակությունը ճանապարհ է բացում խաղային բոլորովին նոր մեխանիզմների զարգացման համար, որտեղ հոտերը կարող են ազդել խաղացողների շարժումների և դատողությունների վրա», - ասում է Ամալյայի համալսարանի փոխազդեցությունների հարցերով մասնագետ և խաղերի հետազոտող Սայմոն Նիդենտալը:

Ոչ շատ հեռավոր ապագայում այս տեխնոլոգիան կարող է մեծ տարածում գտնել խաղերի ոլորտում: Պարզապես պատկերացրեք վիրտուալ իրականությունում խաղեր, որտեղ կարող եք ծխի հոտ առնել, կարծես խաղում հրդեհ է, կամ խարույկ է վառվում, խոնավության հոտն ստորգետնյա անցումներում, կամ բնության հոտեր, երբ խաղի հերոսը անձրևից հետո երևակայական անտառում է: Խաղերին բույրեր ավելացնելը դրանք ավելի գրավիչ կդարձնի ավելի շատ մարդկանց համար:

Բայց, իհարկե, այս տեխնոլոգիան կարող է օգտագործվել ոչ միայն խաղերում։ Դրա օգնությամբ, օրինակ, կարող են վերապատրաստվել համտեսողներն ու օծանելիք ստեղծողները։ Ավելին, տեխնոլոգիան կարող է օգնել «մարզելու» այն մարդկանց հոտառությունը, որոնք կորցրել են իրենց զգայունությունը հոտերի նկատմամբ կորոնավիրուսային վարակի հետևանքով։

Նշենք, որ հետազոտողները հրապարակել են բոլոր գծագրերը, հրահանգները և ծրագրային կոդերը հանրային տիրույթում, և այժմ 3D տպիչի յուրաքանչյուր սեփականատեր կարող է սարք ստեղծել դրանց մշակման համար։