Ինչպե՞ս են ժամանակակից տեխնոլոգիաները փոխում գովազդի ոլորտը. Հարցազրույց Յանա Յանիկյանի հետ

Գովազդի շուկան, չնայած վերջին տարիների բոլոր վայրիվերումներին ու խնդիրներին, շարունակում է մնալ ամենադինամիկ զարգացողներից մեկը՝ ինչպես աշխարհում, այնպես էլ Հայաստանում։ Ժամանակակից տեխնոլոգիաների տարածման և դրանց ստեղծած բոլոր հնարավորությունների ֆոնին գովազդի շուկան չի կորցնում իր արդիականությունը, ընդհակառակը, տեխնոլոգիաները նպաստում են գովազդային դաշտի զարգացմանը և դարձնում այն ավելի արդիական, հարմար և գրավիչ։ EconoMIX ծրագրի հեղինակ, տնտեսագետ Սուրեն Պարսյանի հետ զրույցում այս կարծիքը հայտնեց Media Systems գովազդային գործակալության գործադիր տնօրեն Յանա Յանիկյանը։

Նոր գործիքներ և առանձնահատկություններ

Յանա Յանիկյանի կարծիքով՝ այսօրվա գովազդային շուկան բազմաթիվ հեռանկարներ և հնարավորություններ է տրամադրում գովազդատուներին, որոնք ցանկանում են իրենց արտադրանքը ներկայացնել աշխարհին, ինչպես նաև գովազդային ընկերություններին, որոնք պատրաստ են մատուցել բարձրորակ և բարեխիղճ ծառայություններ:

Ժամանակակից տեխնոլոգիաները հեշտացնում են երկուսի աշխատանքն էլ։

Մասնավորապես, գովազդի ոլորտում վերջին տարիներին ի հայտ են եկել բազմաթիվ նոր գործիքներ և հնարավորություններ, որոնք ուղղակիորեն առնչվում են տեխնոլոգիաներին. դրանք գնալով ավելի մատչելի են դառնում ինչպես սպառողների, այնպես էլ գովազդ ստեղծողների համար։

Համեմատաբար նոր հնարավորությունների օրինակներից մեկը, որոնք ի հայտ են եկել համացանցի զարգացման հետ մեկտեղ, թվային գովազդն է: Եթե նախկինում ձեր ապրանքի մասին ամենից հաճախ «պատմում էին» գովազդային վահանակները և հեռուստատեսությունը, ապա այժմ այն կարող է գտնել իր տեղը և իր սպառողներին համացանցում:

«Ամբողջ աշխարհն այսօր ձգտում է թվայնացման, ուստի սա բնական և սպասելի գործընթաց է։ Մենք արթնանում ենք առավոտյան, և շատ գործառույթներ, որոնք նախկինում կատարում էինք՝ ֆիզիկապես ինչ-որ տեղ հասնելով, այժմ հասանելի են մեզ առցանց: Բնականաբար, երբ ամբողջ կյանքը ձգտում է թվայնացման, գովազդային ոլորտը չի կարող տեղում դոփել: Ահա թե ինչու է վերջերս առաջին պլան մղվել թվային գովազդը»,- պարզաբանեց մասնագետը։

Ինչու են գովազդատուները սիրում թվային գովազդը

Այս ամենը, իհարկե, չի նշանակում, որ գովազդի մյուս տեսակները կորցնում են արդիականությունը։ Սակայն այն, որ այսօր շատերն են ձգտում անցնել այսպես կոչված թվային դաշտ, մնում է անվիճելի փաստ։ Առավել եւս, որ հենց թվային գովազդն է առաջարկում հնարավորություններ և առավելություններ, որոնք պարզապես հնարավոր չէ գտնել գովազդի շատ այլ տեսակների դեպքում։

Խոսքը այնպիսի առավելությունների մասին է, ինչպիսիք են թափանցիկությունը, չափելիությունը, ավելի ճշգրիտ թիրախավորումը և այլն։

Տարիներ առաջ շատ ավելի դժվար էր գնահատել և չափել գովազդի արդյունավետությունը. այո, գովազդատուն կարող էր տեսնել իր ապրանքի գովազդը, այն կարող էին տեսնել նաև նրա հարազատներն ու ընկերները, բայց ճշգրիտ տվյալներ չկային, թե քանի պոտենցիալ սպառող է ուշադրություն դարձրել վահանակներին, նրանցից քանիսն են որոշել գնել տվյալ ապրանքը և այլն:  Գովազդային արշավի արդյունավետությունը սովորաբար չափվում էր ամսվա վերջում կամ հենց այդ արշավի վերջում եկամուտների հաշվարկով: Միանգամայն ակնհայտ է, թե ինչ լուրջ թերություններ կան այս մոտեցման մեջ։

Ժամանակակից տեխնոլոգիաները հնարավորություն են տալիս ճշգրիտ չափումներ կատարել և պարզել, թե արդյոք գովազդը հասել է ճիշտ լսարանին և ինչ արդյունքներ է այն բերել։ Ինչպես նշեց Յանա Յանիկյանը, ժամանակակից թվային գովազդի արդյունավետությունը գնահատելու բազմաթիվ եղանակներ և մեթոդներ կան, և դրանք ընտրվում են՝ կախված գովազդվող ապրանքի առանձնահատկություններից, ընկերության գործունեության ոլորտից և բազմաթիվ այլ գործոններից։

«Սովորաբար ապրանքն ինքն է թելադրում, թե ինչպես պետք է չափել դրա գովազդի արդյունավետությունը»,- ասաց մասնագետը։

Որոշ դեպքերում, օրինակ, կարող եք գնահատել, թե քանի մարդ է եկել գովազդատուի էջ մեկ այլ կայքի հղման միջոցով, արդյոք նրանք որևէ գործողություն են կատարել գովազդատուի էջում, արդյոք որևէ փոխազդեցություն եղել է գովազդվող ապրանքի հետ և այլն: Թվային գովազդում սրանք բոլորը չափելի մեծություններ են:

Ծառայությունների արտահանման հնարավորություններ

Թվային գովազդը բազմաթիվ նոր հնարավորություններ է բացում ոչ միայն գովազդատուների, այլ նաև գովազդային ընկերությունների համար. նստելով երևանյան գրասենյակներում՝ նրանք կարող են ծառայություններ մատուցել առանց աշխարհագրական սահմանափակման։

Այս ամենը գովազդային ընկերությունների համար հնարավորություն է ստեղծում աշխատել արտասահմանյան հաճախորդների հետ և խթանել տեղական ընկերությունների ապրանքների ու ծառայությունների ներկայացվածությունը միջազգային շուկայում:

«Այսօր շատ ընկերություններ, որոնք ապրանքներ և ծառայություններ են արտահանում, հետաքրքրված են արտասահմանում գովազդով։ Սա ներառում է տեխնոլոգիական ոլորտը, սպառողական ապրանքները և այլն: Կան եզակի ոլորտներ, որոնք դեռ չեն ցանկանում իրենց գործունեությունը գովազդել միջազգային շուկայում, բայց նույնիսկ նրանց համար, լավ մտածելու դեպքում, հեռանկարներ կան»,- նշեց մասնագետը։

Յանա Յանիկյանի հետ հարցազրույցն ամբողջությամբ կարող եք դիտել ստորև.