ՏՏ կրթության հետ կապված ի՞նչ խնդիրներ կան Հայաստանում. hարցազրույց EPAM Armenia-ի ղեկավարի հետ

Համաշխարհային ՏՏ ոլորտում մրցակցությունը մնում է շատ բարձր, և, հետևաբար, ինչպես առանձին ընկերությունները, այնպես էլ ամբողջ երկրները ստիպված են մեծ ջանքեր գործադրել ուշադրություն գրավելու և շուկային լավագույն լուծումներ առաջարկելու համար: Հայաստանին անհրաժեշտ են լավ մասնագետներ, որպեսզի երկրի ՏՏ ոլորտը կարողանա զուգընթաց քայլել համաշխարհային միտումներին և մնալ արդիական ու մրցունակ: Որակյալ մասնագետների բացակայությունը, սակայն, ըստ EPAM Armenia ընկերության ղեկավար Բենիամին Գյուրջյանի, շարունակում է արդիական խնդիր լինել մեր երկրում։

NEWS.am Tech-ի հետ զրույցում նա նշեց, որ այսօր Հայաստանում ՏՏ ոլորտի մասնագետների ավելցուկ միանշանակ չկա, հակառակը՝ մարդկային ռեսուրսների սուր պակաս կա։ Սակայն խնդիրը նաև այն է, որ առկա մասնագետները կարող են չաշխատել իրենց վրա, հետ մնալ շուկայի պահանջներից և չբավարարել թափուր աշխատատեղ ունեցող ընկերությունների կարիքները։

«Սովորեցնում ենք ոչ միայն մեզ համար»

Կադրերի պակասի խնդիրը լուծելու համար EPAM Armenia-ն վերջին տասնամյակի ընթացքում նոր մասնագետներ է պատրաստել իր կրթական կենտրոնում, որը վերջերս վերանվանվել է EPAM Campus: Այստեղ ուսանողներին տրամադրվում է ինչպես տեսական, այնպես էլ գործնական ուսուցում ՏՏ ոլորտի ավելի քան 20 տարբեր ոլորտներում: Ինչպես ընդգծեց Գյուրջյանը, ծրագրի նպատակն է պատրաստել նոր մասնագետներ ոչ միայն կոնկրետ իրենց ընկերության, այլև ավելի լայն շուկայի կարիքների համար։

«Ուսանողներին սովորեցնում ենք անկախ նրանից, թե այս տարի մեզ պետք է 10, թե 100 մարդ: Մենք մասնագետներ ենք պատրաստում ամբողջ շուկայի համար։ Մեր շրջանավարտների մոտ 10-15 տոկոսը մնում է մեզ մոտ, մնացածը կաշխատեն այլ ընկերություններում, բայց ապագայում մեր ճանապարհները կարող են հատվել»,- նշեց նա։

EPAM Armenia-ն, ինչպես նշեց Գյուրջյանը, ուսուցանում է ոչ միայն սեփական ծրագրերի շրջանակում, այլ նաև աշխատում է բուհերի հետ, այդ թվում՝ Հայաստանի ամերիկյան համալսարանի և Եվրոպական համալսարանի։

Անգլերենը և տեխնիկական գրագիտությունը՝ լուրջ խնդիրներ

Հայաստանում ՏՏ կրթության ոլորտում հիմնական խոչընդոտներից ու խնդիրներից մեկը Գյուրջյանը համարում է բնակչության շրջանում անգլերենի իմացության ցածր մակարդակը, հատկապես մարզերում։ Նրա խոսքով՝ անգլերենի իմացությունը վճռորոշ դեր ունի միջազգային ընկերությունների համար, և լեզվի չիմացության պատճառով տեղի տաղանդները չեն կարողանում համապատասխանել համաշխարհային չափանիշներին։

Բացի դրանից՝ ըստ Գյուրջյանի, Հայաստանում անհրաժեշտ է բարելավել ամենատարրական ՏՏ կրթությունն ու տեխնիկական գրագիտությունը։ Ներկայիս դպրոցական համակարգը չի ապահովում բոլոր անհրաժեշտ հմտությունները, և շատերը ստիպված են դրանք ձեռք բերել ավելի մասնագիտացված կրթություն ստանալու հետ մեկտեղ: Իսկ լավագույն տարբերակն այն է, որ երեխաներին հենց դպրոցում է պետք սովորեցնել համակարգչից օգտվել, ինտերնետ գրագիտություն և այլն:

«Ինչպես աշխատել համակարգչի հետ, ինչպես մուտքագրել ստեղնաշարի վրա, ինչպես օգտագործել ինտերնետը, ինչպես գտնել դրա վրա տեղեկություններ, ինչպես տարբերել կեղծը իրականությունից. այս բոլոր գիտելիքները մեծ արժեք ունեն, և այս ամենը պետք է դասավանդել 3-4-րդ դասարաններում։ Ինչով էլ երեխան որոշի զբաղվել ապագայում, ինչ մասնագիտություն էլ ընտրի, օրինակ՝ բժիշկ, այս գիտելիքը կօգնի նրան դառնալ լավ մասնագետ»,- ասաց նա։

Մարզերի զարգացում

Քանի որ Հայաստանում ռեսուրսները, ներառյալ մարդկային, սահմանափակ են, երկրի մարզերի ներուժը չի կարելի անտեսել։ Սա Silicon Mountains Shirak ֆորումում հնչած հիմնական մտքերից մեկն է: Բենիամին Գյուրջյանը, իհարկե, նույնպես կիսում է այն։

Խոսելով մարզերի զարգացման մասին՝ Գյուրջյանը նշեց, որ այս զարգացմանն էապես նպաստում է առցանց աշխատելու և սովորելու հնարավորությունը. այսօր ոչ ոք ստիպված չէ ճանապարհորդել կամ որևէ տեղ տեղափոխվել որակյալ կրթություն կամ աշխատանքի հնարավորություն ստանալու համար:

Մյուս կողմից՝ դեռևս պահպանվում է ուսանողներին ավելի լավ հնարավորություններ փնտրելու համար մեծ քաղաքներ տեղափոխվելուց հետ պահելու խնդիրը։

«Հիմնական ուշադրությունը պետք է դարձնել բարենպաստ պայմաններ ստեղծելու վրա, որոնք երիտասարդ տաղանդներին հնարավորություն են տալիս մնալ և աշխատել իրենց հայրենի մարզերում։ Սա ներառում է նրանց կրթության նույն որակի, ռեսուրսների և աշխատանքի հնարավորությունների հասանելիության ապահովումը, ինչ քաղաքում»,- ասաց Գյուրջյանը:

Նրա խոսքով՝ այս խնդիրների լուծումը պետության կողմից որոշակի աշխատանք է պահանջում։ Կրթության որակի բարելավումը, հարկային արտոնությունների տրամադրումը և մարզերում բարենպաստ կենսապայմանների ստեղծումը կարևորագույն քայլերն են, որոնք պետք է ձեռնարկվեն, և այս ամենը պետք է արվի պետական ​​մակարդակով։ Կառավարության աջակցությունը, ըստ Գյուրջյանի, էական նշանակություն ունի մարզերի զարգացման կենսունակությունն ու կայունությունն ապահովելու համար։

Հիշեցնենք, որ Silicon Mountains Shirak ֆորումը տեղի է ունեցել հուլիսի 4-ին Գյումրիում։ Միջոցառումը կազմակերպել է Տեղեկատվական և հաղորդակցության տեխնոլոգիաների գործատուների միությունը՝ Հայաստանի բարձր տեխնոլոգիական արդյունաբերության նախարարության աջակցությամբ։ Ֆորումի պլատինե գործընկերն է Unicomp-ը, ֆինթեք գործընկերը՝ EasyPay-ը, տեխնիկական գործընկերը՝ Ucom-ը, արծաթյա գործընկերներն են Synopsys Armenian-ն և Ovio-ն: Միջոցառման տարածաշրջանային գործընկերներն են EIF-ը և GTC-ն, իսկ մեդիա գործընկերը՝ NEWS.am Tech-ը: