Լուսնի վրա լույսն արտացոլող տարօրինակ «անոմալիաները» առեղծված են դարձել գիտնականների համար (լուսանկար)

Մոլորակագետները տարօրինակ «անոմալիաներ» են հայտնաբերել արևի լույսն անդրադարձնող մասնիկների մեջ, որոնք ծածկում են Լուսնի վրա գտնվող՝ միջինը մոտ մեկ մետր մեծության քարերը: Ուսումնասիրությունը, որը հրապարակվել է Journal of Geophysical Research - Planets ամսագրում, կարող է օգնել գիտնականներին ավելի լավ հասկանալու գործընթացները, որոնք ձևավորել և փոփոխել են Լուսնի ընդերքը և ստեղծել մագնիսական անբացատրելի անոմալիաներ: Սակայն առայժմ, համենայն դեպս, տարօրինակ ժայռերն ու փոշու մասնիկները մնում են չբացահայտված առեղծված:

Հետազոտողները պատահաբար են նկատել Լուսնի վրա այս գոյացությունները՝ ուսումնասիրեով NASA-ի Lunar Reconnaissance Orbiter տիեզերանավի արած լուսանկարների կատալոգը: Արհեստական ​բանականության օգնությամբ նրանք ավելի քան մեկ միլիոն լուսանկարից իրենց հետաքրքրող քարերի թիվը կրճատել են մոտ 130,000-ի:

«Մենք շարունակում ենք անհայտ օբյեկտներ գտնել այս եղանակով, ինչպես օրինակ անոմալ քարերը, որոնք ուսումնասիրում ենք այս նոր հետազոտության մեջ»,- ասել է Բեռնի համալսարանի գիտաշխատող, հետազոտության համահեղինակ Վալենտին Բիկելը։

Նրանք նկատել են, որ Ռայներ K խառնարանի շուրջ գտնվող ժայռերից մի քանիսը նկատելի մութ կետեր ունեն: «Սովորաբար, լուսնային փոշին շատ ծակոտկեններ ունի և շատ լույս է արտացոլում այն ​​ուղղությամբ, որտեղից գալիս է լույսը,- բացատրել է Դորտմունդի տեխնիկական համալսարանից լուսանկարների վերլուծության մասնագետ Մարսել Հեսը,- Սակայն, երբ փոշին դառնում է ավելի խիտ, դրա պայծառությունը սովորաբար մեծանում է: Սա չի կարելի ասել մեր դիտարկած փոշով ծածկված քարերի մասին»։

Թիմը քարերի լույսի արտացոլման տարօրինակ հատկությունները նկարագրել է՝ օգտագործելով ֆոտոմետրիկ վերլուծության տեխնիկան, որը չափում է, թե ինչպես է լույսը անդրադարձվում առարկաներից: Հետազոտողները կասկածում են, որ փոշով ծածկված քարերը ցրվել են հարվածից, որի հետևանքով առաջացել է խառնարանը: Այնուամենայնիվ, Ռայներ K խառնարանի շրջակայքում գտնվող ոչ բոլոր քարերն են ծածկված անհայտ փոշով:

Ի՞նչ փոշի է սա և ինչու է այն նստել միայն որոշ քարերի վրա, իսկ մյուսների վրա՝ ոչ, դեռ առեղծված է մնում։ Հետազոտության հեղինակները ենթադրում են, որ դա կարող է պայմանավորված լինել լուսնային լանդշաֆտի ֆիզիկական առանձնահատկություններով, ժայռերի մանրադիտակային կառուցվածքով, փոշու ստատիկ հատկություններով կամ Լուսնի մագնիսական դաշտով: Ռայներ Գամմա շրջանը, որտեղ գտնվում են խառնարանները, հայտնի է իր բարձր մագնիսականությամբ։

Հետազոտողները հուսով են, որ NASA-ի առաջիկա առաքելությունը դեպի Լուսին՝ Lunar Vertex, որը կհավաքի նմուշներ տարածաշրջանից, լույս կսփռի այս առեղծվածի վրա: Առաքելությունը նաև կկազմի Ռայներ Գամմայի մագնիսական դաշտի քարտեզ, որպեսզի պարզի, թե ինչպես են Լուսնի որոշ մասեր ձեռք բերել իրենց բնորոշ անկանոնությունները: Սա կօգնի մոլորակագետներին հասկանալ ոչ միայն, թե ինչպես է առաջացել Լուսինը, այլ նաև մեր Արեգակնային համակարգի այլ աստղագիտական ​​օբյեկտներ՝ բարակ կամ առանց մթնոլորտի: