Որո՞նք են պատմության մեջ ամենաշատ վաճառվող բջջային հեռախոսները. ցանկը չի գլխավորում iPhone-ը

Պատմության մեջ ամենաշատ վաճառված բջջային հեռախոսը iPhone մոդելի չէ, ինչպես շատերը կարող են մտածել, այլ ստեղներով Nokia 1100 հեռախոսը, որը թողարկվել է 2003-ին: Հենց այս հեռախոսը, որը վաճառվել է 250 միլիոն օրինակ, գլխավորել է պատմության մեջ ամենահայտնի բջջային հեռախոսների՝ Visual Capitalist-ի կազմած ցանկը։

Երկրորդ տեղում է նույն արտադրողի ստեղներով մեկ այլ հեռախոս՝ Nokia 1110-ը, որը վաճառվել է  248 միլիոն օրինակով։ Սակայն երրորդ տեղում արդեն Apple-ի սմարթֆոնն է՝ iPhone 6-ը և 6 Plus-ը՝ վաճառքի 222 միլիոն միավոր ցուցանիշով: Չորրորդ տեղում Nokia 105-ն է (200 մլն միավոր), հինգերորդում՝ iPhone 6s-ն ու 6s Plus-ը (174 մլն միավոր):

Պատմության մեջ ամենահայտնի հեռախոսների ցանկը ներառում է նաև հետևյալ հեռախոսները՝

• iPhone 5s (165 մլն միավոր),
• Nokia 3210 (161 մլն միավոր),
• iPhone 7 և 7 Plus (160 մլն միավոր),
• iPhone 11, 11 Pro և 11 Pro Max (159 մլն միավոր),
• iPhone XR, XS և XS Max (151 մլն միավոր),
• Nokia 6600 (150 մլն միավոր),
• Nokia 1200 (150 մլն միավոր),
• Nokia 5230 (150 մլն միավոր),
• Samsung E100 (150 մլն միավոր),
• iPhone 5 (146 մլն միավոր)։

Նախկինում, հատկապես մինչև սմարթֆոնների հայտնվելն ընդհանրապես և iPhone-ի հայտնվելը մասնավորապես, Nokia-ն գերիշխում էր բջջային հեռախոսների շուկայում: Ներկայումս ֆիննական այս ապրանքանիշի սարքերից ոչ մեկը ներառված չէ ամենահայտնի մոդելների թոփ տասնյակում:

Մասնավորապես, 2023-ի վերջին ամենահայտնի հեռախոսներն էին iPhone 14 Pro Max-ը, iPhone 14-ը և iPhone 14 Pro-ը՝ վաճառքի համապատասխանաբար 31 միլիոն, 26 միլիոն և 24 միլիոն միավոր ցուցանիշներով:

Ցանկի ավելի ցածր հորիզոնականներն են զբաղեցրել հետևյալ հեռախոսները՝

• iPhone 13 (22 մլն միավոր),
• Samsung Galaxy A14 (20 մլն միավոր),
• Samsung Galaxy A14 5G (14 մլն միավոր),
• Samsung Galaxy A54 5G (14 մլն միավոր),
• Samsung Galaxy S23 Ultra (13 մլն միավոր),
• Samsung Galaxy A04e (11 մլն միավոր),
• Xiaomi Redmi 12С (11 մլն միավոր)։

Nokia-ն ակնհայտորեն չկարողացավ հարմարվել շուկայի նոր պահանջներին և գտնել իր արժանի տեղը. 2024-ի փետրվարի 1-ին Nokia-ի պաշտոնական կայքից կանհետանա այս ապրանքանիշի սմարթֆոններով բաժինը։ Այժմ այնտեղ ներկայացված են HMD Global-ի Nokia ապրանքանիշի սարքերը, որոնք բջջային հեռախոսների բիզնեսը գնել են Nokia-ից։ 2026-ից, սակայն, HMD Global-ն այլևս չի վաճառի Nokia սմարթֆոններ։