Գայլի Լուսին. ե՞րբ է սպասվում նահանջ տարվա առաջին լիալուսինը և ինչպե՞ս այն կազդի մարդկանց ինքնազգացողության վրա

2024-ի առաջին լիալուսինը սպասվում է հունվարի 25-ին. հունվարի 26-ի գիշերը Լուսինը կունենա կատարյալ կլոր ձև և այդպիսի տեսք կունենա ևս մի քանի օր։ Մարդիկ տարվա առաջին լիալուսինն անվանում են Գայլի Լուսին:  

Կարո՞ղ է այս լիալուսինն ազդել մարդկանց ինքնազգացողության կամ վարքագծի վրա: Թե՞ դա պարզապես առասպել է:

Ինչո՞ւ Գայլի Լուսին

Իրականում «Գայլի Լուսին»-ն այս երեւույթի միակ անվանումը չէ: Կան այլ տարբերակներ ևս, օրինակ՝ «Խաղաղ Լուսին», «Հին Լուսին», «Սառը Լուսին», «Եղնիկների Լուսին», «Մեղրալուսին» և այլն:

Իսկ ինչո՞ւ «Գայլի Լուսին»: Ինչպես պարզվում է, ամեն ինչ պարզ է. այս շրջանում գայլերը սովորաբար ավելի ակտիվ են դառնում և ավելի հաճախ են դուրս գալիս Լուսնի վրա ոռնալու համար:

Ազդեցությունն ինքնազգացողության վրա․ ճի՞շտ է դա, թե՞ առասպել

Հաճախ կարելի է լսել կարծիք, թե լիալուսնի ժամանակ մարդիկ դառնում են ավելի անհանգիստ, դյուրագրգիռ, մտահոգ, վատ են քնում։ Այնուամենայնիվ, սա հաստատող որևէ գիտական ​​ապացույց չկա: Ժամանակակից գիտության տվյալները վկայում են, որ համոզմունքը, թե Լուսնի փուլերը կարող են ինչ-որ կերպ ազդել մարդկանց առողջության և ինքնազգացողության վրա, ժողովրդական բանահյուսության մի մասն է միայն, թեև արմատավորված է տարբեր մշակույթներում:

• Լուսնի փուլերը և մարդու վարքագիծը։ Գիտական ​​հետազոտությունները չեն կարողացել ապահովել հետևողական և համոզիչ ապացույցներ հօգուտ այն պնդումների, թե լուսնային փուլերը կարող են ազդել մարդու վարքագծի վրա և, օրինակ՝ նպաստել մարդկանց հոսպիտալացման թվի աճին։
• Մակընթացություններ և ձգողության ուժեր։ Լուսնի ձգողության ուժն իսկապես ազդում է Երկրում մակընթացությունների վրա, սակայն գաղափարը, որ այդ ուժը կարող է ազդել մարդու մարմնի վրա, որը հիմնականում կազմված է ջրից, չունի գիտական ​​հիմք: Լուսնի ձգողության ազդեցությունը մարդու վրա շատ ավելի թույլ է, քան, օրինակ՝ բուն Երկրի ձգողության ուժը։
• Հոգեբանական գործոններ և կողմնակալություն։ Համոզմունքը, որ լիալուսինը կարող է ունենալ հոգեբանական ազդեցություն՝ ստիպելով մարդուն որոշակի վարքագիծ դրսևորել կամ, օրինակ՝ գլխացավեր առաջացնել, կարող է մարդուն ստիպել ընտրողաբար ուշադրություն դարձնել այն դեպքերին, որոնք հաստատում են իր ակնկալիքները՝ անտեսելով մնացած բոլոր փաստերը և գործոնները։

Այսպիսով, թեև պահպանվում են մարդու առողջության և ինքնազգացողության վրա Լուսնի փուլերի և հատկապես լիալուսնի ազդեցության վերաբերյալ համոզմունքները, գիտական ​​հանրությունը, ընդհանուր առմամբ, թերահավատորեն է վերաբերվում այս գաղափարներին: Փորձագետները հիշեցնում են, որ մարդու առողջության և վարքի վրա կարող է ազդել կենսաբանական, հոգեբանական և շրջակա միջավայրի գործոնների բարդ փոխազդեցությունը, և դրանք չեն կարող վերագրվել բացառապես լուսնային փուլերին:

Նշենք, որ հաջորդ անգամ Գայլի Լուսինը հնարավոր կլինի տեսնել 2025-ի հունվարի 13-ին: