Apple-ը փոխել է իր հավակնությունները՝ կապված իր Apple Car ավտոմեքենայի թողարկման հետ: Եթե ի սկզբանե ընկերությունը պատրաստվում էր թողարկել ամբողջովին ինքնակառավարվող էլեկտրական ավտոմեքենա, ապա այժմ Apple-ը մտադիր է ստեղծել ավելի ավանդական էլեկտրական մեքենա՝ վարորդի աջակցության առաջադեմ համակարգով: Բացի այդ, Apple-ը կրկին հետաձգել է նախագծի իրականացման վերջնաժամկետը, տեղեկացնում է Bloomberg-ը։
Apple-ն այժմ կենտրոնանալու է վարորդի աջակցության գործառույթների վրա, որոնք նման են Tesla-ի Autopilot-ին (2+ մակարդակի համակարգ): Երկրորդ մակարդակի ինքնավար վարումը ներառում է ղեկի և արգելակման/արագացման աջակցություն, սակայն վարորդը պահպանում է ավտոմեքենայի կառավարումը և պետք է զգոն լինի:
Apple Car-ի գործարկման ժամանակացույցը ևս ճշգրտվել է: Apple-ը ցանկանում էր ավտոմեքենան ներկայացնել 2026-ին, սակայն ընկերությունն այժմ նախատեսում է այն թողարկել 2028-ից ոչ շուտ: Ըստ Bloomberg-ի՝ սա «շրջադարձային» է Apple Car-ի համար։ Եթե ընկերությանը չհաջողվի արտադրել այս հնարավորություններով էլեկտրական ավտոմեքենա, ղեկավարները կարող են «լրջորեն վերանայել» նախագծի նպատակահարմարությունը։
2014-ից Apple Car նախագծի մշակումից ի վեր այն մի քանի անգամ փոխվել և զարգացել է: Խոսակցություններ էին պտտվում, թե Apple-ն ընդհանրապես կհրաժարվի ավտոմեքենայի գաղափարից և փոխարենը կկենտրոնանա ինքնավար համակարգի վրա, սակայն, ինչպես երևում է, Apple-ը հետևում է ավտոմեքենա թողարկելու ծրագրերին:
Նշենք, որ Apple Watch-ի ղեկավար Քևին Լինչն էր ստանձնել նախագիծն իրականացնելու պարտականությունը և աշխատել է Թիմ Կուկի հետ այն բանից հետո, երբ Apple-ի տնօրենների խորհուրդը ճնշումներ էր գործադրել, որպեսզի ընկերությունը նոր ռազմավարություն որդեգրի այս նախագծի համար։ Այժմ Apple-ը հանդիպումներ է անցկացնում Եվրոպայում հնարավոր գործընկերների հետ՝ քննարկելու նոր ծրագիրը:
ամիս
շաբաթ
օր