Թողարկվել է Apple iOS 17.3-ը․ անվտանգության ի՞նչ գործառույթներ է այն առաջարկում iPhone-ների օգտատերերին

Թողարկվել է Apple iOS 17.3 թարմացումը, որը զուտ տեխնիկական թարմացում չէ: Այն ներառում է անվտանգության լրացուցիչ ֆունկցիա iPhone-ի ներկայիս մոդելների համար, որը որոշակի գործողություններ կատարելու համար պահանջում է օգտագործել Face ID կամ Touch ID։ Բացի դրանից, այն թույլ չի տալիս սարքի գաղտնաբառը կամ Apple ID գաղտնաբառը փոխել անմիջապես․ դրա համար այսուհետ որոշակի ժամանակ է կպահանջվի։

iOS 17.3-ի հիմնական նորամուծությունը գողությունների դեմ (Anti-Theft) նորարարական գործառույթն է: Այն նախատեսված է սարքերին և դրանցում պահվող տվյալներին չարտոնված մուտքը կանխելու համար: Ի տարբերություն նախորդ տարբերակների, որտեղ անվտանգությունը հիմնականում սահմանափակվում էր էկրանը գաղտնաբառով կողպելով, մի շարք կարևոր գործողություններ կատարելու համար նոր համակարգը պահանջում է օգտագործել կենսաչափական տվյալները՝ սկանավորել մատնահետքը կամ օգտագործել Face ID: Սա ներառում է պահպանված գաղտնաբառերը դիտելը, Apple ID-ի կարգավորումները կառավարելը և նույնիսկ նոր Apple քարտի համար դիմելը:

Նոր թարմացման մյուս նորարարությունն այն է, որ սարքի հետ կապված կարևոր գործողություններ կատարելու համար ավելի երկար ժամանակահատված է սահմանված (Security Delay): Օրինակ՝ եթե ​​օգտատերը որոշի փոխել իր Apple ID-ի գաղտնաբառը կամ iPhone-ի ծածկագիրը, համակարգն այժմ պահանջում է ոչ միայն կենսաչափական նույնականացում, այլև սահմանում է որոշակի ժամանակահատված այդ գործընթացն իրականացնելու համար: Այս գործառույթի նպատակն այն է, որ նույնիսկ եթե սարքը հայտնվում է այլ մարդու մոտ, սահմանափակվում է նրա մուտքը ամենակարևոր գործառույթներին: Այս գործառույթն ավտոմատ ակտիվանում է, երբ օգտատերը գտնվում է իր առօրյային ոչ բնորոշ վայրերում, օրինակ՝ եթե նա տանը կամ աշխատավայրում չէ։

Anti-Theft գործառույթի ակտիվացումն իրականացվում է «Կարգավորումների» (Settings) Face ID and Passcode բաժնում հավելվածի միջոցով։ Ընթացիկ գաղտնաբառը մուտքագրելուց հետո օգտվողը կկարողանա միացնել նոր գործառույթը: Առավել մանրամասն կարող եք կարդալ Apple-ի կայքում։

Բացի անվտանգության բարձրացումից, iOS 17.3-ն առաջարկում է նաև այլ բարելավումներ: Օրինակ՝ արդեն հասանելի է համատեղ երգացանկերի գործառույթը Apple Music-ում և iOS 17.3-ում և macOS 14.3 Sonoma-ում: Թարմացումը նաև ներկայացնում է որոշ հյուրանոցների հեռուստացույցներով բովանդակություն հեռարձակելու հնարավորություն: