2023-ին, ընդհանուր առմամբ, աշխարհում հաքերները գողացել են 1,7 միլիարդ դոլար, ինչը մի փոքր է պակաս 2022-ին գողացված 4 միլիարդ դոլարի կեսից, իսկ Հյուսիսային Կորեայի հետ փոխկապակցված հաքերները գողացել են մոտ 600 մլն դոլարի կրիպտոարժույթ, այս մասին ասվում է բլոկչեյն և կրիպտոարժույթների վերլուծությամբ զբաղվող TRM Labs ընկերության ուսումնասիրությունում:
CoinDesk-ին տված հարցազրույցում TRM Labs-ի իրավական և կառավարության հետ հարցերի վարչության ղեկավարը Արի Ռեդբորդը կոնկրետ գումարներ գողանալու ցուցանիշի նվազումը վերագրել է մի քանի գործոնների. նախ, անցյալ տարի ավելի քիչ խոշոր հաքերային հարձակումներ են եղել, նաև անցյալ տարվա ընթացքում իրավապահ մարմինները հաջող են գործել, բացի դրանից, բարելավվել է կիբեռանվտանգության վերահսկողությունը:
Հյուսիսային Կորեայի հետ փոխկապակցված հաքերներն անցյալ տարի ներգրավված են եղել, մասնավորապես, կրիպտոարժույթների ոլորտում կիրառվող վնասակար ծրագրերի տարածման և գողության դեպքերի մեկ երրորդին և գողացել են ընդհանուր մոտ 600 միլիոն դոլար արժողությամբ կրիպտոարժույթ։ Վերջին վեց տարվա ընթացքում Հյուսիսային Կորեայի կառավարության հետ կապված հաքերներին հաջողվել է գողանալ գրեթե 3 միլիարդ դոլար։
Այնուամենայնիվ, այս երկրի կառավարության հետ առնչվող հաքերները 2023-ին մոտ 30%-ով ավելի քիչ են գողացել, քան 2022-ին, որի ընթացքում գողացել են մոտ 850 միլիոն դոլար: Այդ գումարի մեծ մասը ստացվել է Ronin Bridge-ի վնասակար ծրագրի միջոցով։
2023-ին հաքերները միջոցների մեծ մասը գողացել են վերջին մի քանի ամիսների ընթացքում։ Դեռ օգոստոսին TRM-ը հայտնել էր Հյուսիսային Կորեայի հետ կապված հաքերների կողմից մոտ 200 մլն դոլարի հափշտակության մասին, իսկ տարեվերջին նրանց կողմից գողացված միջոցների չափը հասել է 600 մլն դոլարի։
Ռեդբորդի խոսքով՝ հյուսիսկորեացի հաքերները համակարգչային համակարգերի վրա հարձակվում են աննախադեպ արագությամբ՝ շատ դեպքերում օգտագործելով սոցիալական ճարտարագիտությունը։
ամիս
շաբաթ
օր