Ձեր գաղտնաբառը կարող է այնքան ուժեղ չլինել, որքան կարող եք կարծել. արհեստական բանականությամբ աշխատող PassGAN մոդելը գաղտնաբառերի 51%-ը կարող է գուշակել մեկ րոպեից պակաս ժամանակում, 65%-ը՝ 60 րոպեից պակաս ժամանակում և 71%-ը՝ ընդամենը մեկ օրում։ Իսկ մեկ ամսվա ընթացքում այն կարող կոտրել գաղտնաբառերի 81%-ը։
Home Security Heroes-ի իրականացրած ուսումնասիրությունը նաև ցույց է տվել, որ 4-6 նիշանոց գաղտնաբառերը գուշակելը ամենահեշտն է: Նույնիսկ եթե դրանք ոչ միայն թվեր են, այլ նաև սիմվոլներ, մեծատառ և փոքրատառ տառեր, ԱԲ-ն անմիջապես կոտրում է նման գաղտնաբառերը: ԱԲ-ից կպահանջվի ընդամենը մոտ յոթ ժամ՝ տարբեր տառեր, սիմվոլներ և թվեր պարունակող ութ նիշանոց գաղտնաբառը կոտրելու համար: Իսկ նշված բոլոր տարբերակները և ինը նիշ պարունակող գաղտնաբառն այն կկարողանա կոտրել երկու շաբաթում։
PassGAN-ը որպես մուտքային տվյալներ օգտագործում է Rockyou բառարանը, որը հատուկ ստեղծվել է գաղտնաբառերը գուշակելու համար և 15 միլիոն գրառում է պարունակում։ PassGAN-ի հաջողության բանալին համարվում է այն, որ այն «ինքնավար կերպով սովորում է իրական գաղտնաբառերի բաշխումն իրական արտահոսքի ժամանակ»:
Ինչպես ցույց է տվել ուսումնասիրությունը, պետք է հետևել կիբեռանվտանգության մասնագետների հայտնի խորհրդին. գաղտնաբառը պետք է բաղկացած լինի առնվազն 12 նիշից, այն պետք է պարունակի մեծատառ և փոքրատառ տառեր, թվեր և հատուկ նիշեր։
Այս բոլոր չափանիշներին համապատասխանող գաղտնաբառ կոտրելու համար ԱԲ-ից մոտ 30,000 տարի կպահանջվի: Իսկ թվեր, տառեր և նիշեր պարունակող 18 նիշից բաղկացած գաղտնաբառն ընդհանրապես համարվում է անկոտրելի. այն գուշակելու համար ԱԲ-ից կպահանջվի 6 կվադրիլիոն տարի:
Թե որքանով է ուժեղ ձեր գաղտնաբառը, կարող եք ստուգել հետազոտության արդյունքների էջում: Home Security Heroes-ը պնդում է, որ այս դաշտում մուտքագրված տվյալները ոչ մի տեղ չեն պահվում կամ չեն փոխանցվում: Դրանում կասկածելու պատճառ չկա, բայց ամեն դեպքում, իրական գաղտնաբառեր այնտեղ մուտքագրել չարժե։
ամիս
շաբաթ
օր